نۇراي سەرىكبايدى ءولتىردى دەگەن كۇدىكتى ءماجبۇرلى پسيحياتريالىق ەمدەۋگە جىبەرىلدى

الەۋمەتتىك جەلىدە تاراعان اقپاراتقا سايكەس، نۇرايدىڭ اعاسى سۇلتان سەرىكباي قازىرگى تاڭدا كۇدىكتى شەرحان ايماحاننىڭ «پسيحيكالىق اۋىتقۋى بار» دەپ انىقتالىپ، الماتى وبلىسى تالعار اۋدانىنداعى مەديتسينالىق مەكەمەدە ەم قابىلداپ جاتقانى تۋرالى جازدى.

وسىعان قاتىستى Kazinform تىلشىسىنە رەسمي تۇسىنىك بەرگەن شىمكەنت قالاسى پوليتسيا دەپارتامەنتى تەرگەۋ بارىسىنىڭ قاتاڭ باقىلاۋدا ەكەنىن مالىمدەدى.

ۆەدومستۆو مالىمەتىنشە، قازىرگى تاڭدا كۇدىكتىگە قاتىستى تەرگەۋ كىسى ءولتىرۋ، نەكەگە تۇرۋعا ماجبۇرلەۋ جانە ستالكينگ فاكتىلەرى بويىنشا جالعاسىپ جاتىر.

- ەكى رەت جۇرگىزىلگەن سوت-پسيحياتريالىق ساراپتاما قورىتىندىسى بويىنشا كۇدىكتىدەن پسيحيكالىق بۇزىلۋلار انىقتالدى. وسىعان بايلانىستى ول مامانداندىرىلعان مەكەمەگە ءماجبۇرلى ەمدەۋگە جىبەرىلدى. ەمدەۋ اياقتالعاننان كەيىن كۇدىكتى تەرگەۋ ارەكەتتەرىن جالعاستىرۋ ءۇشىن قايتادان تەرگەۋ يزولياتورىنا ەتاپپەن جەتكىزىلەدى، - دەلىنگەن شىمكەنت قالاسى پوليتسيا دەپارتامەنتى ۇسىنعان اقپاراتتا.

سونداي-اق قۇقىق قورعاۋ ورگاندارىنىڭ وكىلدەرى تەرگەۋشىلەردىڭ جابىرلەنۋشى تاراپپەن تۇراقتى بايلانىس ورناتقانىن اتاپ ءوتتى.

- تەرگەۋ بارىسىندا جابىرلەنۋشىلەرمەن ۇزدىكسىز بايلانىس قامتاماسىز ەتىلگەن. قابىلدانىپ جاتقان بارلىق پروتسەستىك شەشىمدەر بويىنشا جان-جاقتى تۇسىندىرمەلەر بەرىلىپ، زاڭدا بەلگىلەنگەن تارتىپپەن تەرگەۋ بارىسى تۋرالى اقپارات ۇسىنىلادى. سونىمەن قاتار ساراپتاما قورىتىندىلارى مەن ءىس ماتەريالدارى ءتۇسىندىرىلىپ وتىرادى، - دەپ ناقتىلادى ۆەدومستۆو.

پوليتسيا وكىلدەرى ازاماتتارعا جالعان اقپارات تاراتقانى ءۇشىن جاۋاپكەرشىلىك بارىن ەسكە سالىپ، تەك رەسمي دەرەككوزدەرگە عانا سەنۋگە شاقىردى.

ايتا كەتەيىك، بۇدان بۇرىن شىمكەنتتە 21 جاستاعى بويجەتكەندى ولتىرگەن كۇدىكتى ءومىر بويىنا باس بوستاندىعىنان ايىرىلۋى مۇمكىن ەكەنىن جازعان ەدىك.

پوليتسيا قازا تاپقان ستۋدەنت قىزدىڭ وتباسى جاريالاعان دەرەكتەرگە جاۋاپ بەردى.

پرەزيدەنت شىمكەنتتەگى بويجەتكەننىڭ ولىمىنە قاتىستى باس پروكۋراتۋراعا تاپسىرما بەردى.

قىزدى ءولتىرۋ فاكتىسى بويىنشا قوزعالعان قىلمىستىق ءىستى تەرگەۋ ءۇشىن ورتالىق اپپاراتتان ماماندار جىبەرىلدى.

بويجەتكەننىڭ ولىمىنەن كەيىن ءوز قىزمەتىنە سەلقوس قارادى دەگەن كۇدىكپەن پوليتسيا قىزمەتكەرلەرىنە قىلمىستىق ءىس قوزعالدى.