ەندى زيرات باسىنا تاس، ءمارمار، گرانيت، مەتال قۇلىپتاستار قويۋعا تىيىم سالىنادى
استانا. قازاقپارات – قىرعىزستان پرەزيدەنتى سادىر جاپاروۆ «جەرلەۋ جانە جەرلەۋ راسىمدەرى تۋرالى» زاڭدى ىسكە اسىرۋ جونىندەگى شارالار تۋرالى جارلىققا قول قويدى.
بۇل تۋرالى قىرعىز رەسپۋبليكاسى پرەزيدەنتىنىڭ سايتىندا جاريالاندى.
جاڭا زاڭعا سايكەس، مۇسىلماندار اراسىندا جەرلەۋ راسىمدەرى ءبىر ستاندارتقا نەگىزدەلەدى. قىرعىزستان مۇسىلماندارى ءدىني باسقارماسى مارقۇمدى جەرلەۋ راسىمدەرى، ونىڭ باسىنا قابىر سالۋ، ەسكەرتكىش ورناتۋ راسىمدەرىن رەتتەۋ ءۇشىن ارنايى پاتۋالار شىعارادى. ماسەلەن، اتالعان زاڭنىڭ 22-بابىنا سايكەس، زيراتقا تاستان، گرانيتتەن، ءمارماردان، مەتالدان جاسالعان ەسكەرتكىش، ءمۇسىن، قۇلىپتاستار قويۋعا رۇقسات جوق. مۇنداي بەلگىلەردى تەك تاريحي-مادەني ماڭىزى بار زيراتتارعا قويۋعا رۇقسات ەتىلەدى.
سونىمەن قاتار، بەيىت بيىكتىگى 70 سانتيمەتردەن اسپاۋى ءتيىس. بۇل قوعام ىشىندە ءزاۋلىم بەيىتتەر سالىپ كەتكەن تەرىس ءۇردىستى جويۋ ءۇشىن قولعا الىنىپ وتىر.
