ەندى كولىكتى 5 مينۋتتان ارتىق قىزدىرساڭىز ايىپپۇل تولەيسىز

استانا. KAZINFORM - قازاقستاندىقتار ەندى كولىكتى 5 مينۋتتان ارتىق قىزدىرعانى ءۇشىن ايىپپۇل ارقالايتىن بولادى.

قازاقستان رەسپۋبليكاسىنىڭ جول ءجۇرىسى ەرەجەلەرىنىڭ 88-بابى 5-تارماعىنا سايكەس ەلدى مەكەندەردە قوزعالتقىشى قوسۋلى كولىكتەردىڭ تۇرۋى، ەگەر ول تۇرعىندارعا قولايسىزدىق تۋعىزسا، تىيىم سالىنادى.

بۇل تالاپتى بۇزعان كولىك جۇرگىزۋشىلەرىنە 5 ايلىق ەسەپتىك كورسەتكىش (ا ە ك) مولشەرىندە ايىپپۇل سالىنادى:

ا ە ك (ايلىق ەسەپتىك كورسەتكىش) 2024-جىلى - 18460 تەڭگەنى قۇراسا، 2025-جىلى - 19660 تەڭگەگە جەتتى.

ەگەر كولىك جۇرگىزۋشىسى بۇل ەرەجەنى 12 اي ىشىندە قايتا بۇزسا، ايىپپۇل مولشەرى 10 ا ە ك، ياعني 39320 تەڭگەگە دەيىن ارتادى.

قالاي شاعىمدانۋعا بولادى؟

ايىپپۇل سالۋ ءۇشىن مەملەكەتتىك تىركەۋ ءنومىرى، قۇقىقبۇزۋشىلىق جاسالعان ۋاقىت پەن كۇنى كورسەتىلگەن 5 مينۋتتان اسقانى كورىنەتىن بەينەجازبا كەرەك.

تۇرعىندار كولىك يەسىنىڭ ەرەجە بۇزعانىن دالەلدەيتىن بەينەجازبانى پوليتسياعا كورسەتۋ ارقىلى ارىزدانا الادى. مۇنداي شاعىمدار اكىمشىلىك قۇقىقبۇزۋشىلىق بويىنشا شارا قولدانۋعا نەگىز بولادى.

سونداي-اق جول قوزعالىسى ەرەجەلەرىنىڭ 2-ءبولىمىنىڭ 9-تارماعىنا سايكەس كولىك جۇرگىزۋشىسى قاۋىپسىزدىك بەلدىگىن تاعۋعا مىندەتتى. ال قاۋىپسىزدىك بەلدىگىن تاقپاعان جولاۋشىلاردى تاسىمالداۋعا تىيىم سالىنادى.

بۇل تالاپتى ورىنداماعان جاعدايدا 5 ا ە ك كولەمىندە ايىپپۇل (19660 تەڭگە) قارالعان.