ناۋقاس بالاعا قور اشىپ 1,3 ميلليارد تەڭگە جىمقىرعان ەرلى-زايىپتىعا قاتىستى تەرگەۋ اياقتالدى
استانا. KAZINFORM - ق م ا استانا قالاسى بويىنشا دەپارتامەنتى ۇلىنىڭ ەمىنە قاراجات جيناۋ ءۇشىن كەڭ كولەمدى جارناما ناۋقانىن ۇيىمداستىرعان ەرلى-زايىپتىعا قاتىستى الاياقتىق فاكتىسى بويىنشا تەرگەپ-تەكسەرۋدى اياقتادى.
تەرگەۋ امالدارىنا ساي، بالانىڭ قاتىسۋىمەن كورسەتىلگەن بەينەروليكتەر، اسەرلى جازبالار Instagram جانە Facebook ارقىلى جۇرگىزىلگەن تارگەتتەلگەن جارناما مىڭداعان قازاقستاندىقتىڭ جۇرەگىنە اسەر ەتكەن.
ازاماتتاردىڭ سەنىمى مەن جاناشىرلىعىن پايدالانا وتىرىپ، كۇدىكتىلەر 1,3 ميلليارد تەڭگەدەن استام كولەمدە قاراجات جيناعان. الايدا، بالانىڭ ەمىنە تەك 6,4 ميلليون تەڭگە جۇمسالعان. قالعان قاراجات ەرلى-زايىپتى جەكە قاجەتتىلىكتەرىنە پايدالانىلعان. ناقتى ايتقاندا، ەلوردادا 3 پاتەر، جەر تەلىمى، 5 اۆتوكولىك ساتىپ الىنعان. سونىمەن قاتار، قاراجاتتىڭ ءبىر بولىگى قۇمار ويىندارىنا جۇمسالعان.
قايىرىمدىلىق قارجىسىن تۇراقتى تۇردە الىپ وتىرۋ ءۇشىن ولار كەلىپ تۇسكەن قاراجاتتىڭ ۇشتەن ءبىر بولىگىن (481 ميلليون تەڭگەدەن استام) الەۋمەتتىك جەلىدەگى پاراقشالارىن جارنامالاۋعا باعىتتاعان. Meta Ads ارقىلى جۇرگىزىلگەن جارناما اۋديتوريانى ەداۋىر كەڭەيتىپ، قايىرىمدىلىق كولەمىن ارتتىرۋعا مۇمكىندىك بەرگەن.
- كۇدىكتىلەر تۇركياداعى LIV Hospital كلينيكاسىندا 84 ميلليون تەڭگە تۇراتىن وتا جاساتامىز دەگەن جەلەۋدى دە پايدالانعان. قاجەتتى سوما جينالعانىمەن، شەتەلدە وتا جاسالماعان. كەرىسىنشە، ولار Instagram پاراقشاسىندا اۋەجايداعى «ۇشىپ بارا جاتقان» كورىنىستى بەينەلەيتىن روليك جاريالاپ، وپەراتسيا ءساتتى ءوتتى دەگەن جالعان اقپاراتپەن جازبا سالعان، - دەلىنگەن حابارلامادا.
سوتقا دەيىنگى تەرگەپ-تەكسەرۋ باستالعانىن بىلگەن سوڭ، ولار قىلمىستىق جولمەن الىنعان اكتيۆتەردى تاركىلەۋدەن جاسىرۋ ماقساتىندا جەر تەلىمىن ءۇشىنشى تۇلعانىڭ اتىنا راسىمدەگەن. الايدا تەرگەۋ بۇل مامىلەنىڭ جالعان ەكەنىن دالەلدەدى. سوت سانكسياسىمەن قىلمىستىق جولمەن الىنعان مۇلىكتەردىڭ بارلىعىنا تىيىم سالىندى. كۇدىكتىلەرگە قاتىستى بۇلتارتپاۋ شاراسى رەتىندە ءۇيقاماق ءتۇرى تاڭدالدى. قازىرگى ۋاقىتتا قىلمىستىق ءىس سوتتا قارالىپ جاتىر.
ق ر كونستيتۋتسياسىنىڭ 77-بابىنىڭ 3-تارماعىنىڭ 1-تارماقشاسىنا جانە ق ر قىلمىستىق-پروتسەستىك كودەكسىنىڭ 19-بابىنىڭ 1-بولىگىنە سايكەس، قىلمىستىق قۇقىق بۇزۋشىلىق جاساۋداعى كىناسى سوتتىڭ زاڭدى كۇشىنە ەنگەن ۇكىمىمەن بەلگىلەنگەنگە دەيىن اركىم كىناسىز دەپ ەسەپتەلەدى.
