مۇز جارىلىپ كەتكەن - پوليتسەيلەر جاس ءوسپىرىم قىزدى قۇتقاردى - ۆيدەو
اتىراۋ قالاسىندا ورتالىققا جاقىن ماڭدا جايىق جاعالاۋىندا قىز بالا مۇز ويىلىپ، سۋعا ءتۇسىپ كەتكەن، دەپ حابارلايدى Kazinform.
حابارلاما بويىنشا پاترۋلدىك پوليتسيا باتالونىنىڭ قىزمەتكەرلەرى عاپۋ جانارىس، ارسەن مۋراتوۆ، قۇرمانعازى مەرەي جانە اكىمشىلىك پوليتسيا ءبولىمى ينسپەكتورى ارمانبەك گابيتوۆ دەرەۋ وقيعا ورنىنا جەتكەن.
مۇز ويىعىنان باسى عانا كورىنگەن ادامنىڭ ايەل ادام ەكەندىگىن داۋىسىنان عانا ايىرعان پوليتسەيلەر قۇتقارۋعا بىردەن كىرىسكەن.
جانارىس عاپۋ بەلىنە ارقان ءجىپ بايلاپ مۇز ۇستىمەن جاسوسپىرىمگە قاراي بەتتەدى. ارىپتەسى مەرەي قۇرمانعازى وعان كومەكتەسۋ ءۇشىن ءجىپ بويىمەن بىرگە ءجۇردى. وزگە پوليتسەيلەر جاعادا جانارىس عاپۋدى سۋعا باتىپ بارا جاتقان قىز بالامەن بىرگە تارتىپ شىعارۋعا دايىن تۇردى.
اياقاستى ادام ومىرىنە اراشا تۇسكەن پوليتسەيلەردىڭ قىراعىلىعى مەن ەپتىلىگى ناتيجەسىندە جاس ءوسپىرىم جاعاعا شىعارىلىپ جەدەل- جاردەممەن اۋرۋحاناعا جەتكىزىلدى. دەنەسى قاتتى سۋىقتاعان جاس ءوسپىرىم ءمان-جايدى تۇسىندىرە المادى.
جەدەل-تەرگەۋ توبى ءتيىستى شارالاردى باستاپ كەتتى.
ايتا كەتەيىك، ءدال وسىنداي جاعداي اتىراۋ وبلىسىندا 26-جەلتوقسان كۇنى دە بولعان ەدى. ول جولى پوليتسەيلەر مۇز جارىلىپ، سۋعا ءتۇسىپ كەتكەن ايەل مەن وعان كومەكتەسپەك بولعان ەر ادامدى قۇتقارعان ەدى.
