مينيسترلىك وكىلى ساكەن بيبوسىنوۆقا نەگە ارەندالىق پاتەر سىيلانعانىن ءتۇسىندىردى

Фото: pixabay.com.
Фото: pixabay.com.

تۋريزم جانە سپورت مينيسترلىگى سپورت جانە دەنە شىنىقتىرۋ كوميتەتى ءتوراعاسىنىڭ ورىنباسارى ايگۇل بەكتەنوۆا توكيو وليمپياداسىنىڭ قولا جۇلدەگەرى ساكەن بيبوسىنوۆ وزىنە سىيلانعان پاتەردى نەگە 10 جىلدان كەيىن عانا ءوز اتىنا اۋدارا الاتىنىن ءتۇسىندىردى، دەپ Kazinform.

«وليمپيادا جۇلدەگەرلەرىنە پاتەر بەرۋ تۋرالى زاڭ 2014-جىلى قابىلدانعان. ال ول پاتەردى 10 جىل بويى ءوز اتىنا اۋدارۋعا شەكتەۋ قوياتىن نورما 2019-جىلى ەنگىزىلدى. پاتەر س. بيبوسىنوۆقا 2021-جىلى بەرىلدى. سوندىقتان ول پاتەردى ءوز اتىنا 10 جىل وتكەننەن كەيىن عانا اۋدارا الادى»، - دەدى ايگۇل بەكتەنوۆا.

ەسكە سالساق، بۇعان دەيىن بوكسشى ساكەن بيبوسىنوۆقا تۇركىستان وبلىسىنان بەرىلگەن ەكى بولمەلى پاتەردىڭ توڭىرەگىندە شۋ شىققان بولاتىن.

نەگىزى وليمپيادا چەمپيوندارى مەن جۇلدەگەرلەرىنە تۇرعىنجاي بەرۋ ەرەجەسى بويىنشا، سپورتشىمەن اراداعى شارت 10 جىل مەرزىمگە جاسالادى. شارت جاساسقان كۇننەن باستاپ 10 جىل وتكەن سوڭ كورسەتىلەتىن قىزمەتتى الۋشىلار كوممۋنالدىق تۇرعىن ءۇي قورىنان بەرىلگەن، وزدەرى تۇرىپ جاتقان تۇرعىنجايدى وتەۋسىز نەگىزدە مەنشىككە الادى.

ال، سپورتشى دوپينگ قولدانعان نەمەسە پايدالانۋعا ارەكەت جاساعان جاعدايدا سپورتتىق ناتيجە جويىلعاندا، كورسەتىلەتىن قىزمەتتى الۋشىمەن اتالعان قاعيدالاردىڭ 19- تارماعىنا سايكەس 10 جىلعا جاسالعان شارت بۇزىلادى.

سوڭعى جاڭالىقتار