مينيسترلىك قازاق فيلم باسشىسىن اۋىستىرۋ ماسەلەسى تۋرالى ۇستانىمىن ايتتى

استانا. KAZINFORM - مادەنيەت جانە اقپارات مينيسترلىگى Kazinform ساۋالىنا جولداعان جاۋاپتا «قازاق فيلم» باسشىسىنىڭ قىزمەتىنە لايىقسىزدىعى تۋرالى جاريا تۇردە ايتىلىپ جۇرگەن سىندار تۋرالى ۆەدومستۆونىڭ ۇستانىمىن ءبىلدىردى.

- قازىرگى تاڭدا «شاكەن ايمانوۆ اتىنداعى «قازاق فيلم» ۇلتتىق كينوستۋدياسى» اكسيونەرلىك قوعامى باسشىسىنىڭ ورىنباسارى ا. و. وماروۆقا باسشىنىڭ مىندەتتەرىن ۋاقىتشا اتقارۋ جۇكتەلگەن. بۇگىنگى تاڭدا مينيسترلىك دەڭگەيىندە كينوستۋديا باسشىسىنا قاتىستى ماسەلەنى قاراۋ جوسپارلانباعان، - دەپ جازىلعان جاۋاپتا.

بۇعان دەيىن مينيستر ايدا بالايەۆا «قازاق فيلم» مەكەمەسىنىڭ باسشىسىنا ەڭ ءبىرىنشى كەزەكتە قانداي تالاپتار قويىلاتىنىن ايتقان بولاتىن.

سونداي-اق جۋىردا «قازاق فيلمدى» وتباسىلىق دەمالىس ورتالىعىنا اينالدىرۋعا كومەكتەسەتىن ينۆەستور ىزدەۋ جۇمىستارى ءجۇرىپ جاتقانى ءمالىم بولدى.

- سول جەردە جەكە كينوتەاتر، جابىق جازعى كينوتەاتر سالساق، «قازاق فيلم» مۋزەيىن قۇرساق، ارنايى تاقىرىپتىق دۇكەندەر مەن باسقا دا نىسانداردى اشساق دەيمىز، - دەدى ا. بالايەۆا.

سونىمەن بىرگە، مينيستر «قازاق فيلمنىڭ» جەرى ساتىلمايتىنىن نەمەسە ءۇشىنشى تۇلعالارعا بەرىلمەيتىنىن، تەك وسى ۇيىمدى دامىتۋ ءۇشىن عانا پايدالانىلاتىنىن اتاپ وتكەن ەدى.