مينيستر Pinduoduo سايتىنىڭ ەلىمىزدىڭ ساۋدا سالاسىنا ىقپالى تۋرالى پىكىر ءبىلدىردى
استانا. KAZINFORM -ساۋدا جانە ينتەگراتسيا ءمينيسترى ارمان Pinduoduo سياقتى ماركەتپلەيستەردىڭ بازار نارىعىنا اسەرى تۋرالى پىكىر ءبىلدىردى.
«قازىر Pinduoduo نى بىلمەيتىن قازاق جوق شىعار. ءتىپتى سونىڭ اسەرىنەن بازاردا ساۋدا سايابىرلاپ قالعانىن ايتۋشىلار كوپ. وسى ماسەلەنى زەرتتەپ كوردىڭىزدەر مە؟ بازارلار قاي جىلدارى جابىلا باستاۋى مۇمكىن؟ جابىلاتىن بولسا، جۇمىسسىز قالاتىن ادامداردىڭ ماسەلەسىن قالاي شەشەسىزدەر؟» - دەپ سۇرادى باق وكىلى.
مينيستر ارمان شاققاليەۆ ساۋدانىڭ بازاردان ەلەكتروندى الاڭعا ويىسۋىن قاداعالاپ وتىرعاندارىن ايتتى.
«قازىر ەلەكتروندى ساۋدا دامىعان سايىن ساۋداگەرلەردىڭ كوبى بازاردان كەتىپ جاتىر. ءبىز جىل سايىنعى تەندەنتسيانى باقىلاپ وتىرمىز. كەيىنگى 2-3 جىلدا بولشەك ساۋداداعى ەلەكتروندى الىس- بەرىستىڭ ۇلەسى 15 پايىزدان استام دەڭگەيدە ارتىپ كەلەدى. ءبىزدىڭ بولشەك ساۋدا نارىعىندا، 1,5 ميلليون ادام جۇمىس ىستەپ ءجۇر دەۋگە بولادى. ءسىز ايتىپ وتىرعان تەندەنتسيا وسى كۇيىندە جالعاسسا، جىل سايىن بازاردا جۇمىس ىستەيتىن ادامداردىڭ بەستەن ءبىرى ەلەكتروندى قىزمەتكە اۋىسۋى كەرەك دەگەن ءسوز. وسىنداي تالداۋ ارقىلى ەسەپتەسەك، 2027 -جىلعا قاراي بازارداعى 700 مىڭداي ادامعا ەلەكتروندى ساۋداعا بەيىمدەلۋ كەرەك. ولاردىڭ ءبارى قاراپايىم ساۋداگەرلەر عوي. سوندىقتان ءبىز قازىردەن باستاپ ولارعا ەلەكتروندى ساۋداعا بەيىمدەلۋ كەرەكتىگىن ايتىپ ءجۇرمىز»، - دەدى مينيستر.
