موڭعوليادا 3333 وقۋشى ءبىر مەزەتتە «تاۋەلسىزدىك» اتتى ولەڭدى وقىدى
استانا. KAZINFORM - ەل استاناسىنىڭ باستى الاڭىندا موڭعوليانىڭ گەوگرافيالىق كارتاسى تۇرىندە ساپ تۇزەگەن 3333 وقۋشى «تۋسگاار توگتنول» (تاۋەلسىزدىك) ولەڭىن حورمەن وقىدى، دەپ حابارلايدى مونتسامە.
ولەڭنىڭ اۆتورى- موڭعوليانىڭ حالىق جازۋشىسى، ەڭبەك ەرى دەندەۆين پۋرەۆدورجا.
2016 -جىلى ۇلان- باتىر قالاسىندا «ويۋۋنى ۋندراا» ورتا مەكتەبىنىڭ 3333 وقۋشىسى العاش رەت بۇل ولەڭدى سۋحبااتار الاڭىندا وقىدى. سودان بەرى جىل سايىن ءساۋىر ايىنىڭ ءبىرىنشى اپتاسىندا ورتا مەكتەپ وقۋشىلارى وتانسۇيگىشتىك جانە تاۋەلسىزدىك يدەيالارىن پوەزيا ارقىلى جەتكىزەدى.
بيىلعى جىلى «ويۋۋن ۋندرا» مەكتەبى «تاۋەلسىزدىك 3333» باعدارلاماسىن بۇكىل ەلگە ناسيحاتتاۋ مىندەتىن قويدى. سونىڭ ناتيجەسىندە ءبىر ۋاقىتتا 21 ايماقتىڭ ورتالىق الاڭدارىندا ولەڭ جولدارى وقىلدى.
«ويۋۋن ۋندرا» مەكتەبىنىڭ ديرەكتورى س. نەرگۋيداۆاا اتاپ وتكەندەي، بۇل ولەڭ موڭعول مۇراسىن، مادەنيەتىن، انا ءتىلى مەن جەرىن بەينەلەيدى.
- ءىس- شارانىڭ ماقساتى - ەل تاۋەلسىزدىگى مەن بوستاندىعىنىڭ قۇندىلىعى مەن ءمانىن جەتكىزۋ، وتكەننىڭ، قازىرگى جانە بولاشاق ۇرپاقتىڭ رۋحاني بىرلىگىن قامتاماسىز ەتۋ، وتانسۇيگىشتىككە تاربيەلەۋ جانە بولاشاق ۇرپاق ءۇشىن انا ءتىلى مادەنيەتىن ساقتاۋ، - دەيدى ول.
سونىمەن قاتار مەكتەپتىڭ 6-سىنىپ وقۋشىسى «تاۋەلسىزدىك» ولەڭىن وقىعاننان كەيىنگى اسەرىمەن ءبولىستى.
- مەن «تاۋەلسىزدىك» ولەڭىن وقي وتىرىپ، ءوز ەلىمنىڭ مۇراسىن ناسيحاتتاعانىما وتە قۋانىشتىمىن. ولەڭدى ەكىنشى سىنىپتا جاتتادىم. كىشكەنتاي كەزىمدە ونى وقىپ، ماعىناسىن ءتۇسىنۋ قيىنعا سوقتى، ءبىراق قازىر مەن ونى تەرەڭىرەك ءتۇسىندىم. بۇل وتە ادەمى ولەڭ، - دەپ اتاپ ءوتتى امينحۋسلەن.
