موڭعوليادا 1800 جىل ساقتالعان سيانبي ءداۋىرىنىڭ قورىمى تابىلدى

ۇلانباتىر. KAZINFORM - موڭعوليانىڭ سەلەنگە ايماعىنا قاراستى ەرەە سومونىندا ارحەولوگتار شامامەن 1800 جىل بۇرىنعى سيانبي اۋلەتى داۋىرىنە تيەسىلى، بۇلىنبەگەن جانە بىرەگەي اقسۇيەك قورىمىن تاپتى. بۇل تۋرالى Anadolu اگەنتتىگى حابارلادى.

CentralAsia پورتالىنىڭ حابارلاۋىنشا، بۇل - موڭعوليا اۋماعىندا سيانبي زامانىنان قالعان العاش رەت تابىلعان ءىرى ءارى تونالماعان، تاريحي تۇرعىدان ەرەكشە ماڭىزدى قورىم.

قازىرگى ۋاقىتتا زەرتتەۋشىلەر نەگىزگى قابىردى قازۋ جۇمىستارىن جالعاستىرۋدا. ساراپشىلاردىڭ پىكىرىنشە، بۇل جاڭالىق ورحون-سەلەنگە باسسەينىندە سيانبيلەردىڭ مەملەكەتتىك قۇرىلىمى بولعان دەگەن تۇجىرىمدى دالەلدەي تۇسەدى.

بۇل ارحەولوگيالىق ورىن العاش رەت 2019 -جىلدىڭ كۇزىدە موڭعوليا مەملەكەتتىك ۋنيۆەرسيتەتىنىڭ كوشپەلى ارحەولوگيا ينستيتۋتى ماماندارى تاراپىنان انىقتالعان. 2022-2024 -جىلدارى ارالىعىندا مۇقيات ولشەۋلەر مەن 3D قۇجاتتاندىرۋ جۇمىستارى جۇرگىزىلگەن. قازىر سول جەردە قۇتقارۋ ارحەولوگياسى شەڭبەرىندە زەرتتەۋ جۇمىستارى وتۋدە: سونىڭ اياسىندا سول داۋىرگە جاتاتىن ءۇش اقسۇيەك جانە ەكى قاراپايىم ادامنىڭ قورىمى زەرتتەلىپ جاتىر.

ەكسپەديتسيا جەتەكشىسى - تاريح عىلىمدارىنىڭ دوكتورى، ارحەولوگيا كافەدراسىنىڭ دوتسەنتى يدەرحانگاي تومور-وچير الەۋمەتتىك جەلىلەردە قازبا جۇمىستارى بارىسىندا ايرىقشا ارتەفاكتىلەر تابىلعانىن جازدى.

اتاپ ايتقاندا، قالىڭدىعى 7 س م ەكى اعاش تابىت قاتار قويىلعان. سونىڭ بىرەۋى كوك- سارى ءتۇستى ماتامەن مۇقيات ورالعان، ماتاسى جاقسى ساقتالعان. تابىتتىڭ باس جاعىندا قارا سيامەن سالىنعان بەلگىلەر مەن ورنەكتەر ءالى دە كورىنىپ تۇر.

سونىمەن بىرگە قورىمنان ەكى جىلقىنىڭ سۇيەگى تابىلعان - ولاردىڭ بىرەۋى قارا ءتۇستى بولعان.

سونداي-اق اعاشتان جاسالعان اربا، قۇمىرا ءتارىزدى سازدان جاسالعان ۆازا جانە قۇرباندىققا ارنالعان باسقا دا بۇيىمدار انىقتالعان.

ارحەولوگتاردىڭ ايتۋىنشا، بۇل قورىم قۇرىلىمى جاعىنان عۇندار مەن سيانبي اقسۇيەكتەرىنىڭ جەرلەۋ ءداستۇرىنىڭ اراسىنداعى وتپەلى كەزەڭدى بىلدىرەدى. ماسەلەن، سيانبيلەر ءتورتبۇرىش ءپىشىندى شۇڭقىر قازىپ، بورەنەلەرمەن قاپتاعان - بۇل عۇنداردا دا بولعان ءتاسىل.

سونىمەن قاتار، اينالاسىن سۋمەن قورشاپ، قورعان تۇرعىزۋ - سيانبي داۋىرىنە ءتان ساۋلەتتىك سيپات.

بۇل تابىلعان جادىگەرلەر عۇنداردان سيانبي مادەنيەتىنە وتۋدەگى جەرلەۋ داستۇرلەرىنىڭ ەۆوليۋتسياسىن زەردەلەۋگە مۇمكىندىك بەرەدى.

قازبا بارىسىندا تابىلعان ارتەفاكتىلەردى ساقتاۋ جانە قالپىنا كەلتىرۋ ىسىنە موڭعوليانىڭ مادەنيەت مينيسترلىگى، ۇلتتىق مادەني مۇرا ورتالىعى جانە ءتيىستى مەكەمەلەردىڭ ماماندارى تارتىلعان.

ايتا كەتەيىك، ماۋسىم ايىندا موڭعوليا پرەزيدەنتىنىڭ جارلىعىنا سايكەس، موڭعوليادا «جاڭا حارحورۋم» قالاسىنىڭ ىرگەتاسى قالاندى. حارحورۋم قالاسىنىڭ قۇرىلىسى سالتاناتتى تۇردە مەملەكەتتىك تۋدى كوتەرۋ راسىمىمەن باستالدى. بۇل تۋ «ۇلى حاندار باعىندا» ماڭگى جەلبىرەيتىن بولادى.

اۆتور

جاراسقان نۇرىبايەۆ