ۋمراعا بارعان وزبەكستاندىقتار تۋريستىك كومپانيالاردىڭ كەسىرىنەن دالادا قالدى

استانا. KAZINFORM - الەۋمەتتىك جەلىلەردە مەككە مەن ءماديناعا ۋمرا جاساۋ ءۇشىن بارىپ، ەلگە ورالۋدا بەلگىلى ءبىر قيىندىقتارعا تاپ بولعان وزبەكستاندىق قاجىلار تۋرالى اقپارات تاراپ جاتىر، دەپ حابارلايدى Kazinform.

وزبەكستاننىڭ جيدداداعى باس كونسۋلدىعىنىڭ مالىمەتىنشە، وزبەكستاندىقتاردىڭ ساپارلارىن جەكە تۋريستىك كومپانيالار ۇيىمداستىرادى. بۇل جاعداي اۋە قاتىناسىن جۇزەگە اسىرۋداعى تەحنيكالىق اقاۋلارعا، سونداي-اق تۋريستىك كومپانيالاردىڭ مۇنداي ساپارلاردى ۇيىمداستىرۋدا قاجەتتى داعدىلارى مەن تاجىريبەسىنىڭ بولماۋىنا بايلانىستى بولعان.

وزبەكستاننىڭ كولىك مينيسترلىگى باسقا دا قۇزىرلى ورگاندارمەن بىرلەسىپ، وزبەكستان ازاماتتارىن ەلگە قايتارۋ بويىنشا بارلىق شارالار قابىلداپ، قوسىمشا رەيستەر كەستەسى جاسالعانى اتاپ ءوتىلدى.

2024 -جىلدىڭ 4-اقپانىنداعى جاعداي بويىنشا، قاجىلاردىڭ ءبىر بولىگى وزبەكستانعا قايتارىلدى، قالعان ازاماتتار جاقىن ارادا ۇيلەرىنە قايتادى.

«وزبەكستاننىڭ ەر-ريادتاعى ەلشىلىگى مەن جيدداداعى باس كونسۋلدىعى جاعدايدى باقىلاۋعا الىپ، تۇراقتى تۇردە مونيتورينگ جۇرگىزۋدە، وزبەكستاندىقتارعا قاجەتتى كونسۋلدىق، قۇقىقتىق جانە باسقا دا كومەكتەردى كورسەتۋدە. جوعارىدا ايتىلعاندارعا سۇيەنە وتىرىپ، ءبىز ازاماتتارىمىزدى سابىرلى بولۋعا جانە ساۋد ارابياسىندا قولدانىستاعى تالاپتاردى ساقتاۋعا شاقىرامىز»، - دەلىنگەن حابارلامادا.

 

اۆتور
بەگابات ۇزاقوۆ