«مەنىڭ التايىم» - قازاق ۇلتى كوشپەندى تۇرمىسىنىڭ كوگىلدىر ەكرانداعى شىنايى بەينەسى - شەتەلدەگى قازاق باسپا ءسوزى
استانا. قازاقپارات - Kazinform ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.
ت م ۇ- نا مۇشە ەلدەردىڭ ىشكى ىستەر مينيسترلەرى كەڭەسىنىڭ العاشقى وتىرىسى ءوتتى - TRT
تۇركى مەملەكەتتەرى ۇيىمىنا مۇشە ەلدەردىڭ ىشكى ىستەر مينيسترلەرى كەڭەسىنىڭ العاشقى وتىرىسى قىرعىزستاننىڭ ىستىقكول وبلىسىنداعى شولپان-اتا قالاسىندا ءوتتى. قىرعىزستان ىشكى ىستەر ءمينيسترى ۇلان نيازبەكوۆ ۇيىمداستىرعان جيىنعا تۇركيا ىشكى ىستەر ءمينيسترى الي يەرليكايا قاتىستى. بۇل تۋرالى وسى اپتادا تۇركيا راديو تەلەۆيزيا پورتالى حابارلادى.
اتالعان ب ا ق- تىڭ دەرەگىنشە، باسقوسۋعا ازەربايجان ىشكى ىستەر ءمينيسترى ۆيلايات ەيۆازوۆ، قازاقستان ىشكى ىستەر ءمينيسترى ەرجان سادەنوۆ، وزبەكستان ىشكى ىستەر ءمينيسترى پۋلات بوبوجونوۆ جانە ت م ۇ باس حاتشىسى قۋانىشبەك ومىراليەۆ تە قاتىستى. جابىق وتكەن جيىن سوڭىندا قورىتىندى دەكلاراتسياعا قول قويىلىپ، كەلەسى وتىرىستىڭ ازەربايجاندا وتەتىنى بەلگىلەندى.
مينيسترلەر قاتىسقان باسپا ءسوز ءماسليحاتىندا مالىمدەمە جاساعان نيازبەكوۆ اۋىزبىرشىلىك ورناتۋ، باۋىرلاستىق پەن دوستىقتى نىعايتۋ، حالىقتاردىڭ قاۋىپسىزدىگىن بارىنشا ارتتىرۋ جانە ءتۇرلى قاۋىپ-قاتەرگە قارسى تۇرۋ ءۇشىن جينالعاندارىن ايتقان.
«نيازبەكوۆ كەڭەس وتىرىسىن جىلىنا كەمىندە ءبىر رەت وتكىزۋ، ساراپتامالىق-تەحنيكالىق دەڭگەيدە جۇمىس توبىن قۇرۋ، ەكىجاقتى تاجىريبە الماسۋ، ىنتىماقتاستىق جانە قىلمىسقا قارسى كۇرەس سالاسىنداعى ۇيلەستىرىلگەن جۇمىس ماسەلەلەرىن تالقىلانعانىن مالىمدەدى»، دەپ جازادى تۇركيالىق ب ا ق.
ايتا كەتەيىك، ت م ۇ مۇشە ەلدەردىڭ ىشكى ىستەر مينيسترلەرىن قىرعىزستان پرەزيدەنتى سادىر جاپاروۆ تا قابىلدادى.
سونداي-اق وسى اپتادا «TRT» - دا «قازاقستاندىق كۋرسانتتار تۇركيادا اسكەري ءبىلىم الادى» دەگەن تاقىرىپتاعى اقپارات جاريالاندى.
ق ر قورعانىس مينيسترلىگىنە قاراستى راديوەلەكترونيكا جانە بايلانىس اسكەري-ينجەنەرلىك ۋنيۆەرسيتەتىنىڭ كۋرسانتتارىنىڭ انت بەرۋ ءراسىمى وتكەن.
تۇركيالىق باسىلىمنىڭ دەرەگىنشە، تۇركيا مەن قازاقستان اسكەري ءبىلىم بەرۋ سالاسىندا ىنتىماقتاستىعىن ارتتىرۋدى جالعاستىرۋدا. الماتىدا تۇركياداعى اسكەري بولىمدە وقۋىن جالعاستىرۋعا جولداما العان قازاقستاندىق ستۋدەنتتەردىڭ انت بەرۋ ءراسىمى ءوتتى. ەندى قازاقستان قورعانىس مينيسترلىگى راديوەلەكترونيكا جانە بايلانىس اسكەري- ينجەنەرلىك ۋنيۆەرسيتەتىنىڭ ءبىرىنشى كۋرس ستۋدەنتتەرى تۇركيادا بىلىمدەرىن جالعاستىرادى. ىرىكتەۋدەن وتكەن ۋنيۆەرسيتەتتىڭ ۇزدىك قىرىق كۋرسانتى تۇركيا، رەسەي جانە وڭتۇستىك كورەيا ۋنيۆەرسيتەتتەرىندە ءبىلىم الادى.
قىتاي تەاترىنىڭ وركەسترى شاۋەشەكتەگى قازاق وركەسترىمەن ونەر باسەكەسىنە ءتۇستى - «حالىق گازەتى»
3-قىركۇيەكتە قىتايدىڭ لياونين ۇلكەن تەاترىنىڭ «YOLO» وركەسترى شىڭجاڭداعى شاۋەشەكتە كونسەرت قويىپ، جەرگىلىكتى قازاقتاردىڭ ۇلتتىق وركەسترىمەن ونەر جاراستىردى. بۇل جولى قويىلعان ونەر باسەكەسى وتە كوڭىلدى بولدى، دەپ حابارلايدى قىتايدىڭ «حالىق گازەتى» باسىلىمى.
قىتايلىق ب ا ق- تىڭ كەلتىرگەن مالىمەتتەرىنە سۇيەنسەك، 23-تامىز بەن 1-قىركۇيەك ارالىعىندا لياونين ۇلكەن تەاترىنىڭ «YOLO» وركەسترى شىڭجاڭنىڭ ىلە قازاق اۆتونوميالى وبلىسىنا قاراستى تارباعاتاي ايماعىنىڭ ءۇش جەرىندە كونسەرت قويعان.
6 ايدا وزبەكستانعا 4 ميلليوننان استام تۋريست كەلگەن- «ءو ز ا»
2024-جىلدىڭ قاڭتار- شىلدە ايلارىندا جالپى 4,2 ميلليون شەتەلدىك ازامات تۋريستىك ماقساتپەن وزبەكستانعا كەلگەن. ستاتيستيكا اگەنتتىگىنىڭ مالىمەتىنشە، بۇل كورسەتكىش وتكەن جىلدىڭ سايكەس كەزەڭىمەن سالىستىرعاندا 562,5 مىڭ ادامعا نەمەسە 15,3 پايىزعا ارتقان، دەپ حابارلايدى وزبەكستاندىق «ءو ز ا» اقپاراتتىق اگەنتتىگى.
وزبەكستاندىق ب ا ق- تىڭ دەرەگىنشە، وزبەكستانعا كەلگەن تۋريستەردىڭ باسىم كوپشىلىگى قىرعىزستان (1,2 ميلليون ادام)، تاجىكستان (1,2 ميلليون ادام)، قازاقستان (845,8 مىڭ ادام)، رەسەي (442,1 مىڭ ادام) جانە تۇرىكمەنستان (83,7 مىڭ ادام) ەلدەرىنەن كەلگەن.
سونىمەن قاتار، تۇركيا (62 مىڭ)، قىتاي (35,5 مىڭ)، ءۇندىستان (33,3 مىڭ)، وڭتۇستىك كورەيا (23,9 مىڭ)، يتاليا (19,5 مىڭ) جانە باسقا مەملەكەتتەردەن (211,2 مىڭ) تۋريستەر دە وسى ماقساتپەن وزبەكستانعا ساپار شەككەن.
سونداي-اق، وسى اپتادا «ءو ز ا» دا «شەتەلدە قيىن جاعدايدا قالعان وزبەكستاندىق بالالار ەلگە قايتارىلدى» دەگەن دەگەن تاقىرىپتا اقپارات جاريالاندى.
شەتەلدە قيىن جاعدايدا قالعان 14 وزبەكستاندىق بالا ەلگە قايتارىلعان.
بۇل تۋرالى «ءو ز ا» باسىلىمى الەۋمەتتىك قورعاۋ ۇلتتىق اگەنتتىگىنە سىلتەمە جاساپ حابارلادى.
حاباردا ايتىلۋىنشا، بالالار رەسەيدىڭ سانكت-پەتەربۋرگ قالاسىنان ىشكى ىستەر جانە دەنساۋلىق ساقتاۋ مينيسترلىكتەرىنىڭ جاۋاپتى قىزمەتكەرلەرىنىڭ ءىس-ساپارى اياسىندا تاشكەنتكە جەتكىزىلگەن.
الەۋمەتتىك قورعاۋ ۇلتتىق اگەنتتىگى دەرەگىنشە، بۇل بالالار وزدەرىنىڭ اتا-انالارىنا جانە جاقىن تۋىستارىنا تاپسىرىلادى. ولارعا «ينسون» الەۋمەتتىك قىزمەتتەر ورتالىعى تاراپىنان پسيحولوگيالىق جانە زاڭگەرلىك كومەك كورسەتىلەدى.
شەتەلدە قاراۋسىز قالعان بالالار تۇراقتى تۇردە وزبەكستانعا قايتارىلۋدا. بۇعان دەيىن 15-تامىز كۇنى 8 بالا وزبەكستانعا قايتارىلىپ، ولاردىڭ 6 ۋى اتا-انالارىنىڭ قاراۋىنا تاپسىرىلعان ەدى.
سونىمەن قاتار اپتا باسىندا تاشكەنتتە «تۇڭعىش پرەزيدەنتتى ەسكە الۋ شاراسى ءوتتى».
اتاپ ايتقاندا، 2-قىركۇيەك كۇنى مەملەكەتتىك ۇيىم وكىلدەرى مەن تاشكەنت قالاسىنىڭ جۇرتشىلىعى يسلام كاريموۆتى ەسكە الۋعا جينالعان، دەپ جازادى Uza.uz.
بۇل شاراعا مەملەكەت باسشىسى، وزبەكستان رەسپۋبليكاسى وليي ءماجليسى، پرەزيدەنت اكىمشىلىگى، مينيسترلەر كابينەتى، مينيسترلىكتەر مەن مەكەمەلەر، قوعامدىق وكىلدەر قاتىسىپ، تۇڭعىش پرەزيدەنتتىڭ ەسكەرتكىشىنە گۇل شوقتارىن قويعان.
«مەنىڭ التايىم» - قازاق ۇلتى كوشپەندى تۇرمىسىنىڭ كوگىلدىر ەكرانداعى شىنايى بەينەسى - Harajorga
كوشپەندىلەر وركەنيەتىندە وزىندىك ەرەكشەلىككە يە مادەنيەت قالىپتاستىرعان قازاق ۇلتى حالىق سانى جاعىنان شىڭجاڭدا ەكىنشى ورىندا تۇرادى. اتالعان وڭىردەگى قازاقتاردىڭ ەڭ العاشقى ءفيلمى 1955-جىلى «قاسەن-ءجاميلا» كينوسى قويىلعاننان بەرى، قىتاي قازاقتارىنىڭ ومىرىنەن تۇسىرىلگەن فيلمدەر تاريحى 69 جىلعا جەتتى. وسى جىلدار ىشىندە كينو، تەلەحيكايا قاتارلى ونەر تۇرلەرى ادامداردىڭ ءوز كوزىمەن كورىپ، ەت قۇلاعىمەن ەستيتىن اسەرى ارقىلى ءداۋىر اعىمىنداعى قازاق حالقىنىڭ تۇرمىسى، مادەنيەتى جاعىنداعى دامۋى مەن وزگەرىسىن ەستەلىككە الىپ، ۇلتتىق مادەنيەتتى جالپاق جۇرتقا جەتكىزەتىن رۋحاني كوپىر بولا ءبىلدى. سول مىندەتتەردى اتقارۋشى تۋىندىلاردىڭ ءبىرى قىتايلىق رەجيسسەر تۇسىرگەن «مەنىڭ التايىم» تەلەحيكاياسى، دەپ حابارلايدى قىتايدىڭ «Harajorga» الەۋمەتتىك جەلىسى.
اتالعان ب ا ق- تا بيىل جازدا عانا تۇساۋى كەسىلگەن «مەنىڭ التايىم» تەلەحيكاياسى تۋرالى ايتىلادى. بۇل تەلەحيكايا وسىناۋ كەڭ- بايتاق التاي وڭىرىنە دەگەن قالىڭ كورەرمەننىڭ قىزىعۋشىلىعىن ارتتىرا تۇسكەنى تۋرالى ءسوز بولادى. «سۋدىڭ تۇنىعى مەن ءشوپتىڭ سونىسىن قۋالاي قونىس اۋداراتىن» كوشپەندى مال شارۋاشىلىق ءداستۇرى، تابيعاتتىڭ قاس- قاباعىن باعاتىن تۇرمىس داعدىسى، سونداي- اق اۋەلەتىپ ءان سالىپ، بۇرالا بيگە باساتىن ەرەكشە سالتى، قازاق حالقىنىڭ ەكولوگيالىق ورتاعا، تىرشىلىك مانىنە جانە كۇندەلىكتى تۇرمىسقا دەگەن داعدىلى سۇيىسپەنشىلىگى مەن قيماس سەزىمىن ايگىلەيدى.
ماقالا اۆتورىنىڭ مالىمەتىنشە، بۇل تەلەحيكايادا التايدا تۋىپ-وسكەن قىتاي قىزى مەن جەرگىلىكتى جاس ءوسپىرىم باتاي باس كەيىپكەر ەتىلىپ، ەكى ۇرپاق ادامداردىڭ قايشىلىعى مەن تالعامى ساباقتاستىرىلىپ، قىتايدىڭ قازاق مالشىلارى ءدوپ كەلىپ وتىرعان جاڭ زامان وزگەرىستەرى مەن قالىپتاسقان داستۇرلەرى تۋرالى فيلمدە كورسەتىلگەن. سونىمەن قاتار تۋىستىق سۇيىسپەنشىلىك پەن ماحابباتتىڭ، دالا وركەنيەتى مەن قالا مادەنيەتىنىڭ قاراما- قايشىلىعى، سونداي-اق ءبىر-بىرىنە بەيىمدەلۋ، ىمىراعا كەلۋ بارىسى بەينەلەنگەن.
بۇل جازبادا «مەنىڭ التايىم» تەلەحيكاياسى تۋرالى ءتۇسىندىرىپ، تالداعان.
اتالعان تەلەحيكايادا ۇلان- بايتاق ساحارانى، مال فەرماسىنداعى مامىراجاي تۇرمىستى، ونداعى باۋىرمال دا مومىن قازاق حالقىنىڭ تۇرمىس- تىرشىلىگى وزگەرە باستاسا دا بايىرعى بايىپتى كوزقاراستارىنان ايىرىلماعانىن اڭعارۋعا بولاتىنى كورسەتىلگەن. اسىرەسە «مەنىڭ التايىم» اتتى تەلەحيكاياسىندا جاڭا زاماننىڭ كەلۋى مەن تۋريزم سالاسىنىڭ كەڭىنەن دامۋىنان قازاق ۇلتىنىڭ كوشپەندى تۇرمىسى بىرتىندەپ وزگەرە باستاعانى تۋرالى ايتىلادى ماقالادا.
ايتا كەتەيىك، «مەنىڭ التايىم» تەلەحيكاياسى قىتايلىق جازۋشى لي جيۋۋاننىڭ شىعارمالار جەلىسى بويىنشا تۇسىرىلگەن. باستى رولدەردە قىتايلىق تانىمال اكتەر ما ييلي جانە چجوۋ يران، شىڭجاڭدىق قانداسىمىز الما مەن قايرات ويناعان.
ەسكە سالا كەتەيىك، قازاق تىلىندە شەتەلدە تۇسىرىلگەن تۇڭعىش كوركەمسۋرەتتى «قاسەن-ءجاميلا» فيلمىنىڭ باستى ءرولى ءجاميلانى - كەڭەس وداعىنىڭ حالىق ءارتىسى، ك س ر و مەملەكەتتىك سىيلىعىنىڭ لاۋرەاتى، ساڭلاق اكتريسا فاريدا ءشارىپوۆا سومداسا، قاسەن ءرولىن ويناعان كەزىندە ىقىلاس دۇكەن ۇلى اتىنداعى رەسپۋبليكالىق ساز اسپاپتارى مۇراجايىنىڭ عىلىمي قىزمەتكەرى بولعان ابىلاي تۇگەلبايەۆ ەدى.
يراننىڭ «يسلام وركەنيەتىندەگى ونەر تاريحى» كىتابى قىتاي تىلىندە جارىق كوردى - Parstoday
يراننىڭ «يسلام وركەنيەتىندەگى ونەر تاريحى» كىتابىنىڭ قىتاي تىلىندەگى اۋدارماسى يران يسلام رەسپۋبليكاسىنىڭ بەيجىڭدەگى مادەني كەڭەس بەرۋ مەكەمەسىندە جارىق كوردى، دەپ جازادى يراننىڭ «Parstoday» اقپارات اگەنتتىگى.
«يسلام وركەنيەتىندەگى ونەر تاريحى» كىتابىن يران ونەر اكادەمياسىنىڭ مۇشەسى، زەرتتەۋشى حاسان بالحاري قاحي جازعان.
«Parstoday» باسىلىمىنىڭ حابارلاۋىنشا، بۇل ەڭبەكتى قىتاي تىلىنە باي دجي سۋ اۋدارىپ، Shang Wu Publications باسىلىمى باسىپ شىعارىپ، تاراتقان. «يسلام وركەنيەتىندەگى ونەر تاريحى» كىتابىن اۋدارۋدى قىتايداعى يران يسلام رەسپۋبليكاسىنىڭ مادەني كەڭەس بەرۋ مەكەمەسى اۋدارما جانە باسپا ءىسىن ۇيىمداستىرۋ ورتالىعىمەن بىرلەسىپ قىتاي جانە يران كلاسسيكتەرىنىڭ اۋدارما جوباسى تۇرىندە جۇزەگە اسىرعان.
اۆتوربەيسەن سۇلتان
