مەملەكەتتىك «قۇرمەت» وردەنىنىڭ يەگەرى ناگراداسىنان ايىرىلىپ، 8,6 جىلعا سوتتالدى
استانا. KAZINFORM - استانادا جەل ەلەكتر ستانسياسىن سالۋعا ارنالعان 8,5 ميلليارد تەڭگەنىڭ ۇرلانۋ دەرەگىنە قاتىستى ۇكىم شىعارىلدى، دەپ حابارلايدى استانا قالاسىنىڭ قىلمىستىق ىستەر جونىندەگى اۋدانارالىق سوتى.
2025 -جىلعى 13-مامىردا استانا قالاسىنىڭ قىلمىستىق ىستەر جونىندەگى اۋدانارالىق سوتى الاياقتىق، اتاپ ايتقاندا، ادامدار توبىنىڭ الدىن الا ءسوز بايلاسۋى ارقىلى، الداۋ جانە سەنىمدى تەرىس پايدالانۋ جولىمەن، ءىرى جانە اسا ءىرى مولشەردە جابىرلەنۋشىلەردىڭ اقشالاي قاراجاتىن بىرنەشە رەت ۇرلادى دەپ ايىپتالعان ب. -عا جانە م. -عا قاتىستى ۇكىم شىعاردى.
سوتپەن ب. جانە م. باسقا ادامدارمەن بىرلەسىپ، الدىن الا ءسوز بايلاسۋ ارقىلى ارەكەت ەتە وتىرىپ، 2020-2022 -جىلدار ارالىعىندا «ەرەيمەنتاۋ قالاسىندا قۋاتى 50 م ۆت جەل ەلەكتر ستانتسياسىن سالۋ» جوباسىن ىسكە اسىرۋعا ارنالعان «ە» ج ش س-نىڭ («سامۇرىق- ەنەرگو» اكتسيونەرلىك قوعامىنىڭ ەنشىلەس كومپانياسى) اقشالاي قاراجاتىن ۇرلاعانى انىقتالدى. ۇرلىق جالعان كەلىسىمشارتتارمەن جانە اففيليرلەنگەن كومپانيالارعا اقشا اۋدارۋ ارقىلى جاسالعان. شىعىن مولشەرى 8,5 ميلليارد تەڭگەدەن اسادى.
سونداي-اق، 2021 -جىلدىڭ قازان ايىندا ب. «پ» اكتسيونەرلىك قوعامىمەن ترانسفورماتورلىق قوسالقى ستانتسيالاردى جەتكىزۋگە شارت جاساسقان، الايدا ءوز مىندەتتەمەلەرىن ورىنداماعان. سالدارىنان «پ» اكتسيونەرلىك قوعامىنا 157 ميلليون تەڭگەدەن استام شىعىن كەلتىرىلگەن.
سوتتالۋشىلاردىڭ كىناسى جابىرلەنۋشىلەردىڭ، كۋاگەرلەردىڭ ايعاقتارىمەن، بانك ۇزىندىلەرىمەن، زاتتار مەن قۇجاتتاردى تەكسەرۋ حاتتامالارىمەن راستالدى. پروكۋرور باس بوستاندىعىنان ايىرۋ جازاسىن تاعايىنداۋدى سۇرادى. جابىرلەنۋشىلەر ولاردى كىنالى دەپ تانۋدى جانە تالاپتى قاناعاتتاندىرۋدى سۇرادى. ال سوتتالۋشىلار كىنانى مويىندامادى جانە ولاردى اقتاۋدى ءوتىندى.
ق ك 190-بابى 4-بولىگى 2) تارماعىنىڭ سانكتسياسىنا سايكەس مۇلكى تاركىلەنىپ، بەلگىلى ءبىر لاۋازىمداردى اتقارۋ نەمەسە بەلگىلى ءبىر قىزمەتپەن اينالىسۋ قۇقىعىنان 10 جىلعا دەيىنگى مەرزىمگە نەمەسە ونسىز، 5 جىلدان 10 جىلعا دەيىنگى مەرزىمگە باس بوستاندىعىنان ايىرۋ تۇرىندەگى جازا قاراستىرىلعان.
- سوت ۇكىم شىعارعان كەزدە ب. -عا قاتىستى جەڭىلدەتەتىن جانە اۋىرلاتاتىن ءمان-جايلاردىڭ جوقتىعىن، م. -عا قاتىستى جەڭىلدەتەتىن جاعداي رەتىندە ەكى جاس بالانىڭ بولۋىن، ەكەۋىندە دە سوتتىلىقتىڭ بولماۋىن ەسكەردى. سوت ۇكىمىمەن ب. - 8 جىل 6 ايعا باس بوستاندىعىنان ايىرىلىپ، مەملەكەتتىك ناگراداسى - «قۇرمەت» وردەنى الىندى؛ ق ك-نىڭ 55-بابى 2-بولىگىنىڭ 2-تارماعىن قولدانا وتىرىپ، م. -عا 6 جىل 8 اي باس بوستاندىعىنان ايىرۋ تۇرىندەگى جازا تاعايىندالدى. «ە» ج ش س-نىڭ ازاماتتىق تالاپ قويۋى ءىشىنارا قاناعاتتاندىرىلىپ، 8,5 ميلليارد جانە 3 ميلليون تەڭگەدەن استام سوت شىعىستارى ءوندىرىلدى. تالاپ قويۋدىڭ قالعان بولىگى قاراۋسىز قالدىرىلدى، - دەپ حابارلادى استانا قالاسىنىڭ قىلمىستىق ىستەر جونىندەگى اۋدانارالىق سوتى.
بۇعان دەيىن ۇلەسكەرلەردەن زاڭسىز 5,5 ميلليارد تەڭگەدەن استام قاراجات تارتقان كومپانيا باسشىلارى سوتتالعانىن جازدىق.
