مەملەكەت باسشىسى ق ح ر ءتوراعاسىنا قۇتتىقتاۋ جەدەلحاتىن جولدادى
استانا. KAZINFRM - قاسىم-جومارت توقايەۆ قازاقستاندىقتاردىڭ جانە جەكە ءوزىنىڭ اتىنان شي جينپيڭ مەن قىتاي حالقىن «چۋنجە» مەرەكەسىمەن قۇتتىقتادى، دەپ حابارلايدى اقوردانىڭ باسپا ءسوز قىزمەتى.
- قىتاي حالىق رەسپۋبليكاسىنىڭ قۇرىلعانىنا 75 جىل تولۋىمەن تۇسپا-تۇس كەلەتىن بيىلعى ايداھار جىلى مەملەكەتىڭىزدى ودان ءارى وركەندەتۋ جولىندا جەتىستىكتەرگە تولى بولارىنا سەنىمدىمىن. وسى تۇستا ءسىزدىڭ ماڭىزدى ستراتەگيالىق باستامالارىڭىز بەن تىڭ جوسپارلارىڭىزدىڭ ءساتتى جۇزەگە اسا بەرۋىنە شىنايى تىلەكتەسپىن. ەكى ەل اراسىنداعى ىنتىماقتاستىقتىڭ «التىن 30 جىلدىعى» اياسىندا يگى ماقسات- مىندەتتەرىمىزگە قول جەتكىزىپ، حالىقتارىمىزدىڭ جارقىن بولاشاعى جولىنداعى سىندارلى ارىپتەستىگىمىزدى جاڭا دەڭگەيگە كوتەرۋگە ايرىقشا ءمان بەرەمىن، - دەپ جازىلعان جەدەلحاتتا.
قاسىم-جومارت توقايەۆ شي جينپيڭنىڭ اسا جاۋاپتى قىزمەتىنە تولايىم تابىس، ال دوستاس قىتاي حالقىنا باق-بەرەكە تىلەدى.
