مەملەكەت باسشىسى موناكونىڭ كنيازىن قۇتتىقتادى
استانا. KAZINFORM - مەملەكەت باسشىسى قاسىم-جومارت توقايەۆ كنياز II البەردى موناكونىڭ ۇلتتىق كۇنىمەن قۇتتىقتادى، دەپ حابارلايدى اقوردا.
قازاقستان پرەزيدەنتى موناكونىڭ ورنىقتى دامۋ، قورشاعان ورتانى قورعاۋ جانە بارشا ادامزات ءۇشىن قاۋىپسىز كەلەشەكتى قامتاماسىز ەتۋ ىسىندە ۇلكەن كۇش-جىگەر جۇمساپ كەلە جاتقانىن اتاپ ءوتتى.
قاسىم-جومارت توقايەۆ قازاقستان مەن موناكو اراسىنداعى دوستىققا نەگىزدەلگەن ىنتىماقتاستىق الداعى ۋاقىتتا دا قوس حالىقتىڭ يگىلىگى جولىندا نىعايا بەرەتىنىنە سەنىم ءبىلدىردى.
مەملەكەت باسشىسى كنياز II البەرگە جانە موناكو حالقىنا باق-بەرەكە تىلەدى.
ەسكە سالساق، كەشە قاسىم-جومارت توقايەۆتى بەلگراد اۋەجايىندا سەربيا پرەزيدەنتى الەكساندر ۆۋچيچ قارسى الدى.
قازاقستان پرەزيدەنتىنىڭ بورتىن سەربيا اسپانىندا وسى ەلدىڭ اسكەري اۋە كۇشتەرىنىڭ ۇشاقتارى الىپ ءجۇردى.
مەملەكەتتەر باسشىلارى ەكى ەلدىڭ ساياسي، ساۋدا-ەكونوميكا، كولىك- لوگيستيكا جانە مادەني- گۋمانيتارلىق سالالارداعى ءوزارا ىنتىماقتاستىعىنىڭ پەرسپەكتيۆالارىن تالقىلايدى.
