مەملەكەت باسشىسى Masdar جانە ADNOC كومپانيالارىنىڭ ديرەكتورىن قابىلدادى
استانا. KAZINFORM - مەملەكەت باسشىسى Masdar كومپانياسىنىڭ باس اتقارۋشى ديرەكتورى مۇحاممەد ءال- راماحي مەن ADNOC كومپانياسىنىڭ قايتا وڭدەۋ جانە وتكىزۋ جونىندەگى باس اتقارۋشى ديرەكتورى حاليد ءسالميندى قابىلدادى. بۇل تۋرالى اقوردانىڭ باسپا ءسوز قىزمەتى حابارلادى.
قاسىم-جومارت توقايەۆ ابۋ دابيگە جۇمىس ساپارى اياسىندا Masdar كومپانياسىنىڭ باس اتقارۋشى ديرەكتورى مۇحاممەد ءال- راماحيمەن كەزدەسۋ وتكىزدى.
مەملەكەت باسشىسى قازاقستان مەن Masdar كومپانياسى اراسىنداعى سەرىكتەستىك جاڭا ءارى ساپالى دەڭگەيگە كوتەرىلگەنىن اتاپ ءوتتى. پرەزيدەنت كومپانيا وكىلدەرىمەن بىرگە جامبىل وبلىسىندا قۋاتى 1 گ ۆ ت بولاتىن جەل ەلەكتر ستانتسياسىنىڭ قۇرىلىسىن جۇزەگە اسىرۋعا قاتىستى كەلىسىمدەرگە قول جەتكىزىلگەنىن ايتتى. اتالعان ءىرى جوباعا 1,4 ميلليارد دوللار ينۆەستيتسيا سالىنادى. ءوز كەزەگىندە مۇحاممەد ءال- راماحي كومپانيانىڭ قۇرىلىس جۇمىستارى بويىنشا جوسپارىمەن ءبولىستى. سونداي- اق جوبا اياسىندا جەل تۋربينالارىنىڭ وندىرىسىنە جەرگىلىكتى ونىمدەردى قولدانۋعا قىزىعۋشىلىق تانىتىپ وتىرعانىن جەتكىزدى. قاسىم-جومارت توقايەۆ پەن مۇحاممەد ءال- راماحي Masdar كومپانياسىنىڭ قازاقستانداعى قىزمەت اياسىن كەڭەيتە وتىرىپ، جاڭارتىلاتىن ەنەرگەتيكا جانە تسيفرلاندىرۋ سالالارىنداعى ماڭىزدى جوبالاردى ىسكە اسىرۋ جونىندە پىكىر الماستى.
سونىمەن قاتار كەزدەسۋگە Abu Dhabi National Oil Company (ADNOC) قايتا وڭدەۋ جانە وتكىزۋ جونىندەگى باس اتقارۋشى ديرەكتورى حاليد سالمين قاتىستى.
پرەزيدەنت ەلىمىزدىڭ ADNOC كومپانياسىمەن سەرىكتەستىكتى ودان ءارى دامىتۋعا باسا ءمان بەرەتىنىن اتاپ ءوتتى.
حاليد سالمين ەكى ەلدىڭ ۇلتتىق مۇناي- گاز كومپانيالارى اراسىنداعى ءوزارا ىقپالداستىقتىڭ پەرسپەكتيۆالارىنا توقتالدى.
كەزدەسۋدە مۇناي- گازبەن قاتار گەولوگيالىق بارلاۋ ىسىندەگى بىرلەسكەن ينۆەستيتسيالىق جوبالاردى جۇزەگە اسىرۋ ماسەلەلەرى تالقىلانىپ، تسيفرلاندىرۋ جانە جاساندى ينتەللەكت سالالارىنداعى ىنتىماقتاستىققا ەرەكشە نازار اۋدارىلدى.
ايتا كەتەيىك، پرەزيدەنت قاسىم-جومارت توقايەۆ بىرىككەن اراب امىرلىكتەرىنە جۇمىس ساپارى اياسىندا «ابۋ ءدابيدىڭ ورنىقتى دامۋ اپتالىعى» سامميتىنە قاتىستى.
