مەكتەپتە اقشا جيناعاندارعا ايىپپۇل سالۋدى ۇسىندى

بىشكەك. KAZINFORM - قىرعىز رەسپۋبليكاسى جوگوركۋ كەنەشىنىڭ قۇقىقتىق ءتارتىپ، قىلمىسقا جانە سىبايلاس جەمقورلىققا قارسى ءىس-قيمىل كوميتەتى قىرعىز رەسپۋبليكاسىنىڭ ءبىلىم تۋرالى زاڭىنا، قۇقىقبۇزۋشىلىق تۋرالى كودەكسىنە مەكتەپتە زاڭسىز اقشا جيناعانى ءۇشىن ايىپپۇل سالۋدى قاراستىراتىن تۇزەتۋلەردى ءبىرىنشى وقىلىمدا قابىلدادى.

زاڭ جوباسىنىڭ باستاماشىسى جك دەپۋتاتى ميرگۇل تەمىربايەۆانىڭ اتاپ وتۋىنشە، قىرعىز رەسپۋبليكاسى پرەزيدەنتىنىڭ جارلىعىمەن سالىنعان تىيىمعا قاراماستان مەكتەپتەردە ءالى دە زاڭسىز اقشا جيناۋ جالعاسىپ جاتىر.

وسىعان وراي، مەكتەپتە تەگىن ءبىلىم الۋ قۇقىعىن قامتاماسىز ەتۋ، زاڭسىز اقشا جيناۋعا جول بەرمەۋ، ونىڭ ىشىندە مەكتەپتەردە مەملەكەتتىك قور قۇرۋ ارقىلى وسى زاڭ جوباسى ازىرلەندى.

اقشانى زاڭسىز ءوندىرۋ فاكتىلەرى انىقتالعان جاعدايدا قۇقىق بۇزۋشىلىق تۋرالى كودەكسىنە سايكەس جاۋاپكەرشىلىككە تارتۋ ۇسىنىلادى.

تۇزەتۋلەر قۇقىق بۇزۋشىلىق تۋرالى كودەكسكە «مەملەكەتتىك ءبىلىم بەرۋ ۇيىمدارىندا اقشالاي قاراجاتتى زاڭسىز ءوندىرۋ» 74-1-بابىن ەنگىزۋدى ۇسىنادى، ونى بۇزعانى ءۇشىن جەكە تۇلعالارعا 200 ەسەپتىك كورسەتكىش (20 مىڭ سوم نەمەسە 113 مىڭ تەڭگەدەن استام) ايىپپۇل سالىنادى.

ەگەر ءدال وسىنداي بۇزۋشىلىق مەكتەپتەردە مەملەكەتتىك قور قۇرۋ ارقىلى ورىن السا، وندا بۇل جەكە تۇلعالارعا 400 ەسەپتىك كورسەتكىش (40 مىڭ سوم نەمەسە 227 مىڭ تەڭگەدەن استام) جانە زاڭدى تۇلعالار ءۇشىن 600 ەسەپتىك كورسەتكىش (60 مىڭ سوم نەمەسە 340 مىڭنان استام تەڭگە) مولشەرىندە ايىپپۇل سالۋعا اكەپ سوعادى.

بۇدان بۇرىن حابارلانعانداي، قىرعىزستاندا بالالارىن قورعانشى مەن قامقورشىسىنسىز قالدىرىپ ەڭبەك ميگراتسياسىنا كەتكەن اتا-انالارعا ايىپپۇل سالۋ ۇسىنىلعان.

سونىمەن قاتار، ەلدە بەتتى جاسىراتىن كيىم كيۋگە ايىپپۇل سالۋ ۇسىنىلىپ وتىر.

سونداي-اق قىرعىزستاندا قوعامدىق ورىندا ازاماتتاردىڭ جەكە باسىن انىقتاۋعا مۇمكىندىك بەرمەيتىندەي بەتىن جاۋىپ تۇراتىن كيىم كيىپ، كولەمدى ساقال قويعان ازاماتتارعا زاڭ بويىنشا ايىپپۇل سالۋ ۇسىنىلعان ەدى.

اۆتور
زارينا تۋعانبايەۆا