مەكتەپ اۋلاسىنا كىرىپ كەتكەن ايۋ قىزمەتكەردى جاراقاتتادى
تاشكەنت. KAZINFORM - وزبەكستاننىڭ سۇرحانداريا وبلىسىنا قاراستى سارىياسى اۋدانىنداعى تۇرعىن ۇيلەر مەن مەكتەپتىڭ اۋماعىنا كىرىپ كەتكەن ايۋ ىشكى ىستەر ورگاندارىنىڭ قىزمەتكەرىن جاراقاتتادى، دەپ حابارلايدى Kazinform اگەنتتىگىنىڭ تاشكەنتتەگى مەنشىكتى ءتىلشىسى ءاليحان اسقار.
بۇگىن الەۋمەتتىك جەلىلەردە سۇرحانداريا وبلىسىنداعى «جانناتماكون» ماحاللياسىنا كىرىپ كەتكەن ايۋدان قاشىپ بارا جاتقان ادامداردىڭ ۆيدەوسى جاريالانعان بولاتىن.
وسى جاعدايعا بايلانىستى وزبەكستاننىڭ ەكولوگيا، قورشاعان ورتانى قورعاۋ جانە كليماتتىڭ وزگەرۋى مينيسترلىگى تۇسىنىك بەردى.
«ايۋدىڭ كوزىن جويۋعا تىرىسقان ىشكى ىستەر ورگاندارىنىڭ قىزمەتكەرىنە جانۋار شابۋىل جاساپ، ونى جاراقاتتادى. سونداي- اق، ايۋ 74-مەكتەپتىڭ اۋماعىنا كىرىپ كەتتى. ول ۋاقىتتا اۋلادا وقۋشىلار بولعان. جانۋار ءبىلىم الۋشىلاردىڭ ومىرىنە قاۋىپ ءتوندىردى. وسىعان بايلانىستى جەدەل شارا قابىلدانىپ، ايۋ اتىلدى»، - دەلىنگەن مينيسترلىكتىڭ مالىمدەمەسىندە.
جاراقات العان قىزمەتكەر قازىرگى ۋاقىتتا مەديتسينالىق تەكسەرۋدەن ءوتىپ جاتىر.
