مايقايىڭداعى قايعىلى وقيعا: جارتى جىلدان كەيىن دەنەسى تابىلعان قۇتقارۋشى جەرلەندى
پاۆلودار. KAZINFORM - مايقايىڭداعى وپىرىلىپ تۇسكەن كەنىش تۇبىندە التى جارىم اي ۋاقىت جاتقان ەكى قۇتقارۋشىنىڭ ءبىرىنىڭ دەنەسى تابىلدى. تۋىستارى ونىڭ ايدوس شايمەردەننىڭ مۇردەسى ەكەنىن ناقتىلادى. بۇگىن، 19-شىلدەدە قايعىلى وقيعادان التى اي وتكەن سوڭ دەنەسى تابىلعان قۇتقارۋشى ايدوس شايمەردەن پاۆلودار وبلىسىندا جەرلەندى.بۇل تۋرالى وبلىس اكىمى اساين بايحانوۆ الەۋمەتتىك جەلىدەگى پاراقشاسىندا جازدى. اكىم قۇتقارۋشىنىڭ جاقىندارىنا كوڭىل ايتتى.
«بۇگىن، 19-شىلدە كۇنى «مايقايىڭ- التىن» ا ق تاۋ-كەن اۋدانىندا وپىرىلعان جەردەگى ىزدەستىرۋ جۇمىستارى بارىسىندا دەنەسى تابىلعان قۇتقارۋشى ايدوس شايمەردەننىڭ جانازاسىنا قاتىستىم. مارقۇمنىڭ تۋعان-تۋىستارى مەن جاقىندارىنا كوڭىل ايتامىن. مارقۇمعا يمان بايلىعىن بەرسىن»، - دەدى اكىم.
وبلىس اكىمى اۆتوبۋس جۇرگىزۋشىسىنىڭ دەنەسىن تابۋ ءۇشىن ىزدەستىرۋ جۇمىستارى جالعاسىپ جاتقانىن جەتكىزدى.
«دەنەسى ءالى تابىلماعان اۆتوبۋس جۇرگىزۋشىسى ايىپ تىلەۋبەرگەنوۆتىڭ وتباسىمەن كەزدەستىم. جاقىن ارادا ءبىز ونى تاۋىپ، تۋىستارىنا بەرە الامىز دەگەن ۇمىتتەمىن. ودان كەيىن ىزدەستىرۋ جۇمىستارى جۇرگىزىلىپ جاتقان جەردە بولدىم. وندا توپىراقتىڭ سىرعىپ، قۇلاۋ قاۋپى بولعاندىقتان، جۇمىستار تۇراقتى نەگىزدە ازداعان ۇزىلىستەرمەن جۇرگىزىلدى. 17-ماۋسىمدا سكانەرلەۋ ارقىلى اۆتوبۋستىڭ ناقتى ورنالاسقان جەرىن انىقتاۋ ءۇشىن «التىن الماس» ا ق ماماندارى تارتىلدى. زەرتتەۋ ناتيجەلەرى بويىنشا پايدا بولعان شۇڭقىردىڭ ەڭ تۇبىنەن 12 مەتر تەرەڭدىكتە اۆتوبۋستىڭ بولجامدى ورنالاسقان جەرى انىقتالدى. قازىر شۇڭقىردىڭ تۇبىندە توپىراقتى قايتا ەكسكاۆاتسيالاۋدى جالعاستىرىپ جاتىر. جۇمىستار اسا ساقتىقپەن جانە بارلىق قاۋىپسىزدىك نورمالارىن ساقتاي وتىرىپ جۇرگىزىلىپ جاتىر»، - دەدى ول.
ەسكە سالا كەتەيىك، پاۆلودار وبلىسىنداعى مايقايىڭ التىن كەنىشىندە ىشىندە ادامدار بار اۆتوبۋس بيىلعى 4-قاڭتار كۇنى جەر استىنا ءتۇسىپ كەتتى.
كەيىن وقيعا ورنىنان ەكى ادامنىڭ دەنەسى تابىلدى.
كەيىن قۇتقارۋشىلار توپىراقتىڭ ءجيى قوزعالۋىنا بايلانىستى جەر قازۋ جۇمىستارىن توقتاتقان بولاتىن.
ال مامىر ايىندا مايقايىڭ التىن كەنىشىندە قوس قۇتقارۋشىنى ىزدەۋ جۇمىستارى قايتا جاندانعانى تۋرالى حابارلاعانبىز.
مارقۇم ايدوستىڭ جارى نۇرسۇلۋ شايمەردەن بۇعان دەيىن كۇيەۋىنىڭ ءتىرى ەكەنىنە ەشقانداي ءۇمىتى جوق ەكەنىن، قۇتقارۋشىلار مۇردەسىن قازىپ بەرسە، ارۋلاپ جەر قوينىنا تاپسىرۋ سوڭعى تىلەگى ەكەنىن ايتقان ەدى.
«ءبىزدىڭ وتباسىمىز بۇل كۇندى ۇزاق ۋاقىتتان بەرى تاعاتسىزدانا كۇتكەن ەدىك. قۇتقارۋشىلار جاقىن ادامدارىمىزدى تاۋىپ الاتىنىنا سەنىمدىمىز. كاسىپورىن باسشىلىعى ايتقانداي، ەڭ اۋەلى ويىق ماڭىندا كەن جىنىستارىن قازۋ جۇمىستارى جۇرگىزىلەدى. سودان سوڭ كاسىبي اسكەريلەندىرىلگەن اۆاريالىق-قۇتقارۋ قىزمەتتەرىنىڭ رەسپۋبليكالىق ورتالىق شتابى پاۆلودار فيليالىنىڭ قۇتقارۋشىلارى ىسكە كىرىسەدى. قازىرگى ۋاقىتتا جۇمىستار تاۋلىك بويى جۇرگىزىلىپ جاتىر. باس ديرەكتور قايروللا جۇرسىنبايەۆ جەر استىندا جاتقان قوس ازاماتتى تاۋىپ العان سوڭ عانا شاحتا ىسكە قوسىلاتىنىن جەتكىزدى»، - دەگەن ەدى بۇعان دەيىن نۇرسۇلۋ شايمەردەن Kazinform اگەنتتىنىنىڭ تىلشىسىنە بەرگەن سۇحباتىندا.
اۆتور
ەلميرا ورالبايەۆا
