مايقايىڭداعى التىن كەنىشىندە التى جارىم اي جاتقان ءبىر قۇتقارۋشىنىڭ مۇردەسى تابىلدى

پاۆلودار. KAZINFORM - مايقايىڭداعى وپىرىلىپ تۇسكەن كەنىش تۇبىندە التى جارىم اي ۋاقىت جاتقان ەكى قۇتقارۋشىنىڭ ءبىرىنىڭ دەنەسى تابىلدى. تۋىستارى ونىڭ ايدوس شايمەردەننىڭ مۇردەسى ەكەنىن ناقتىلادى.

ايتا كەتەيىك، ا. شايمەردەن - ويىق استىندا جاتقان ەكى ازاماتتىڭ ءبىرى بولعان ەدى. كاسىبي اسكەريلەندىرىلگەن اۆاريالىق- قۇتقارۋ قىزمەتتەرىنىڭ رەسپۋبليكالىق ورتالىق شتابى پاۆلودار فيليالىندا جەدەل الدىن الۋ جۇمىستارى جونىندەگى ۆزۆود كومانديرىنىڭ ورىنباسارى بولىپ قىزمەت اتقارعان.

مايقايىڭداعى ويىقتان ءبىر قۇتقارۋشىنىڭ ءمايىتى تابىلعانى تۋرالى اقپاراتتى باياناۋىل اۋدانىنىڭ اكىمى ارداق كىسەنتايەۆ راستادى.

«جاڭا عانا مايقايىڭ كەنتىندەگى شاحتا باسىندا بولدىق. كەنىشتەگى اۆتوبۋس وپىرىلىپ ءتۇسىپ كەتكەن جەردى قازىپ جاتقان «مايقايىڭ التىن» ا ق قىزمەتكەرلەرى ەكى قۇتقارۋشىنىڭ ءبىرىنىڭ مۇردەسىن توپىراق اراسىنان الىپ شىقتى. ول جەردە اتالعان كاسىپورىننىڭ وكىلدەرىنەن بولەك، پوليتسەيلەر، توتەنشە جاعدايلار قىزمەتكەرلەرى دە ءجۇر. الدىن الا بولجام بويىنشا، تابىلعان مۇردە ايدوس شايماردەندىكى. ناقتىسى ارنايى ساراپتامادان سوڭ بەلگىلى بولادى. جاعدايدىڭ، قازۋ جۇمىستارىنىڭ ءارى قارايعى رەتى قالاي بولاتىنىن ايتا المايمىن. ونى التىن كەنىشىنىڭ باسشىلىعى شەشەدى»، - دەدى ارداق كىسەنتايەۆ.

ال مارقۇم ايدوس شايمەردەننىڭ جارى نۇرسۇلۋ شايمەردەن تابىلعان ءمايىتتىڭ ءوزىنىڭ جولداسىنىڭ دەنەسى ەكەنىن راستايتىنىن جەتكىزدى.

ەسكە سالا كەتەيىك، پاۆلودار وبلىسىنداعى مايقايىڭ التىن كەنىشىندە ىشىندە ادامدار بار اۆتوبۋس بيىلعى 4-قاڭتار كۇنى جەر استىنا ءتۇسىپ كەتتى.

كەيىن وقيعا ورنىنان ەكى ادامنىڭ دەنەسى تابىلدى.

كەيىن قۇتقارۋشىلار توپىراقتىڭ ءجيى قوزعالۋىنا بايلانىستى جەر قازۋ جۇمىستارىن توقتاتقان بولاتىن.

ال مامىر ايىندا مايقايىڭ التىن كەنىشىندە قوس قۇتقارۋشىنى ىزدەۋ جۇمىستارى قايتا جاندانعانى تۋرالى حابارلاعانبىز.

مارقۇم ايدوستىڭ جارى نۇرسۇلۋ شايمەردەن بۇعان دەيىن كۇيەۋىنىڭ ءتىرى ەكەنىنە ەشقانداي ءۇمىتى جوق ەكەنىن، قۇتقارۋشىلار مۇردەسىن قازىپ بەرسە، ارۋلاپ جەر قوينىنا تاپسىرۋ سوڭعى تىلەگى ەكەنىن ايتقان ەدى.

«ءبىزدىڭ وتباسىمىز بۇل كۇندى ۇزاق ۋاقىتتان بەرى تاعاتسىزدانا كۇتكەن ەدىك. قۇتقارۋشىلار جاقىن ادامدارىمىزدى تاۋىپ الاتىنىنا سەنىمدىمىز. كاسىپورىن باسشىلىعى ايتقانداي، ەڭ اۋەلى ويىق ماڭىندا كەن جىنىستارىن قازۋ جۇمىستارى جۇرگىزىلەدى. سودان سوڭ كاسىبي اسكەريلەندىرىلگەن اۆاريالىق- قۇتقارۋ قىزمەتتەرىنىڭ رەسپۋبليكالىق ورتالىق شتابى پاۆلودار فيليالىنىڭ قۇتقارۋشىلارى ىسكە كىرىسەدى. قازىرگى ۋاقىتتا جۇمىستار تاۋلىك بويى جۇرگىزىلىپ جاتىر. باس ديرەكتور قايروللا جۇرسىنبايەۆ جەر استىندا جاتقان قوس ازاماتتى تاۋىپ العان سوڭ عانا شاحتا ىسكە قوسىلاتىنىن جەتكىزدى»، - دەگەن ەدى بۇعان دەيىن نۇرسۇلۋ شايمەردەن Kazinform اگەنتتىنىنىڭ تىلشىسىنە بەرگەن سۇحباتىندا.

ال ەكىنشى قۇتقارۋشى - جەدەل اۆتوكولىك جۇرگىزۋشىسى ايىپ تىلەۋبەرگەنوۆتى ىزدەۋ جۇمىستارى الداعى ۋاقىتتا جالعاسادى.

اۆتور
مۇرات اياعان