ماروككو زاماناۋي برونەتەحنيكا وندىرىسىنە دايىندالىپ جاتىر
استانا. KAZINFORM - ماروككودا زاماناۋي جەرۇستى اسكەري بروندالعان WhAP 8x8 تەحنيكالارىن جەرگىلىكتى دەڭگەيدە شىعاراتىن اۋقىمدى اسكەري-ونەركاسىپتىك جوبانى ىسكە قوسۋعا دايىندىق جۇمىستارى باستالدى، دەپ جازادى ازەرتادج.
ماروككولىق Akhbarona باسىلىمى حابارلاعانداي، جوبا بەررەشيد مۋنيتسيپاليتەتىندە قۇرىلاتىن «TATA Advanced Systems Maroc (TASM)» ونەركاسىپتىك كاسىپورنىنىڭ اۋماعىندا جۇزەگە اسىرىلادى.
اۋقىمدى ءارى امبيتسيالى اسكەري جوبا اياسىندا بارلىعى 400 WhAP 8x8 بروندالعان ماشينا شىعارۋ كوزدەلگەن. ونىڭ ىشىندە 150 ءى ماروككونىڭ كورولدىك قارۋلى كۇشتەرىنە ءارتۇرلى جاۋىنگەرلىك كونفيگۋراتسيالار مەن مىندەتتەرگە بەيىمدەلگەن تۇردە جەتكىزىلمەك.
زاۋىتتاعى وندىرىستىك ينتەگراتسيا دەڭگەيى باستاپقى كەزەڭدە %35 بولادى، كەيىن بۇل كورسەتكىش %50 عا دەيىن ارتادى دەپ جوسپارلانعان. قۇرىلىستى 36 ايدىڭ ىشىندە اياقتاۋ كوزدەلىپ وتىر. كاسىپورىن جىلىنا 100 بروندالعان تەحنيكا وندىرە الادى جانە شامامەن 90 تىكەلەي جانە 250 جاناما جۇمىس ورنىن اشادى. Akhbarona باسىلىمى بۇل جوبانى ەلدىڭ اسكەري ءوندىرىس سالاسىنداعى ساپالى سەرپىلىس دەپ باعالايدى.
جوبا ماروككو ءۇشىن قورعانىس ونەركاسىبىندە جاڭا ستراتەگيالىق مۇمكىندىكتەر اشىپ، ەلدىڭ ايماقتاعى بەدەلىن ارتتىرادى. سونداي-اق بۇل باستاما تەحنولوگيالىق جانە اسكەري تۇرعىدان تاۋەلسىزدىككە ۇمتىلاتىن ماروككونى بولاشاق قاۋىپتەرگە توتەپ بەرۋگە دايىندايدى.
بۇدان بۇرىن حابارلانعانداي، 2025-جىلدىڭ مامىرىنا دەيىن ماروككو 7,2 ميلليون تۋريست قابىلداپ، وتكەن جىلدىڭ وسى كەزەڭىمەن سالىستىرعاندا كورسەتكىشتى 22 پايىزعا ارتتىردى.
