مارات احمەتجانوۆ: اقمولا وبلىسى - ەلىمىزدەگى اگرارلىق سەكتوردىڭ جۇرەگى
استانا. قازاقپارات - «JańaDala/GreenDay 2024» كورمەسىن ۇيىمداستىرۋ ءۇشىن اقمولا وبلىسىنىڭ تاڭدالۋى تەگىن ەمەس. اتالعان وبلىستىڭ شارۋالارى ەلىمىزدىڭ اگروونەركاسىپ كەشەنىنىڭ دامۋىنا اجەپتاۋىر ۇلەس قوسىپ وتىر.
اقمولا وبلىسى اقكول اۋدانىنداعى «ەڭبەك» ج ش س ەگىس دالاسىندا ءوتىپ جاتقان ءداستۇرلى فورۋمنىڭ اشىلۋ سالتاناتىندا وبلىس اكىمى مارات احمەتجانوۆ جەرگىلىكتى اۋىل شارۋاشىلىعى سالاسىنداعى وڭ كورسەتكىشتەردى تىلگە تيەك ەتتى.
اتاپ ايتساق، 2023 -جىلدىڭ قورىتىندىسى بويىنشا اقمولا وبلىسىنىڭ تاۋار اينالىمى 2 ميلليارد دوللاردى (950,5 ميلليارد تەڭگە) قۇراعان. بۇل - 2022 -جىلمەن سالىستىرعاندا 27 پايىزعا ارتىق. 2023 -جىلى ءوڭىردىڭ فرانتسيامەن سىرتقى ساۋدا اينالىمى 2022 -جىلمەن سالىستىرعاندا 23 ەسە ءوسىپ، 72 ميلليون دوللارعا (34,2 ميلليارد تەڭگە) جەتتى. گەرمانيامەن ساۋدا اينالىمى 5 ەسەگە دەيىن ءوسىپ، 181 ميلليون دوللاردى قۇراعان (86 ميلليارد تەڭگە).
«بۇگىندە ءبىزدىڭ وبلىس رەسپۋبليكانىڭ ءىرى استىق ەگەتىن وڭىرلەرىنىڭ ءبىرى بولىپ تابىلادى. اقمولا وبلىسىندا قازاقستانداعى بارلىق قۇس ەتىنىڭ 30 پايىزى، تاۋىق جۇمىرتقاسىنىڭ 16 پايىزى وندىرىلەدى. سونداي-اق ءبىزدىڭ ءوڭىر ازىق-تۇلىك تاۋارلارىن ءوندىرۋ بويىنشا كوشباسشىلاردىڭ ءبىرى. جۋىردا اوك باعىتىندا جالپى سوماسى 130 ميلليارد تەڭگەدەن كەم ەمەس 79 دان استام ءىرى ينۆەستيتسيالىق جوبانى ىسكە اسىرۋ جوسپارلانىپ وتىر»، - دەدى وبلىس باسشىسى.
ايتا كەتەيىك، جەرگىلىكتى وندىرۋشىلەردىڭ ەت جانە كونسەرۆى ونىمدەرى رەسەي فەدەراتسياسىنا، ق ح ر-عا، ءسۇت ونىمدەرى ر ف-عا، ۇن ونىمدەرى جاقىن شەت ەلدەرگە (قىرعىزستان، وزبەكستان، تاجىكستان، اۋعانستان، ق ح ر) جانە بىرىككەن اراب امىرلىكتەرىنە ەكسپورتتالادى
