ماقپال ءجۇنىسوۆا «التايدىڭ ار جاعىنان كەلگەن ارۋ» ءانىنىڭ شىعۋ تاريحىن ايتتى
استانا. قازاقپارات - ءانشى اتالعان ءاندى العاش ورىنداعان كەزىندە تۇسىرىلگەن ۆيدەونى جاريالادى. الەۋمەتتىك جەلىدەگى پاراقشاسىندا ماقپال ءجۇنىسوۆا «التايدىڭ ار جاعىنان كەلگەن ارۋ» ءانىن العاش ورىنداعان كەزدەرى جايلى جازدى، دەپ حابارلادى turkystan.kz.
«1989 -جىلى وسى ءاننىڭ اۆتورى - مارقۇم تىنىشباي راحىم ارنايى مەنى تەلەارناعا شاقىردى. سول ۋاقىتتا اعامىز تەلەارنادا قىزمەتتە بولاتىن. «ماقپالجان، وسى ءاننىڭ تۇساۋىن ءوزىڭ كەسىپ بەر» دەدى. ال مەن «ويبۋ، اعا! بۇل جىگىتتەر ايتاتىن ءان عوي. «التايدىڭ ار جاعىنان كەلگەن جىگىت» دەپ جازعانىڭىزدا ايتار ەدىم» دەپ كۇلدىم. ءبىراق كەلىسىمىمدى بەرىپ: «اعا، ءبىر اپتادان سوڭ «قازاق كونسەرتتە» ءبىر كونسەرت بولادى. سوندا ورىنداپ، تۇساۋىن كەسىپ بەرەيىن» دەدىم. ول كىسى قاتتى قۋاندى. 1990 -جىلى راديوعا جازۋىمدى ءوتىندى، ارتىنشا گەرمانيادا مەنىڭ العاش لازەرنىي ديسكوم شىقتى. سوعان وسى ءان ەندى. كەيىننەن جەتىسايدا گاسترولدە جۇرگەندە ءبىر قاراتورى ساكەن قالىموۆ دەگەن جىگىت ماعان كەلىپ، وسى ءاندى ورىنداعىسى كەلەتىنىن ايتتى. مەن بىردەن «ءيا، بۇل ءاندى جىگىت ورىنداسا تىپتەن جاقسى بولادى» دەپ رۇقسات ەتتىم. سودان ساكەن قالىموۆ «تاماشانىڭ» ساحناسىندا ەستراداعا لايىقتى وڭدەپ، ايتىپ شىققان سوڭ ءاننىڭ باعى جانعان ەدى. تىنىشباي اعامىز دا ومىردەن رازى بولىپ ءوتتى»، - دەپ جازدى ماقپال ءجۇنىسوۆا.
