گۋمانيتارلىق جۇك تيەلگەن 190 نان استام جۇك كولىگى گازا سەكتورىنا جەتتى
استانا. قازاقپارات - 21-مامىردا سوعىس ءجۇرىپ جاتقان گازا سەكتورىنا گۋمانيتارلىق كومەك، ونىڭ ىشىندە ۇن، بالالار تاعامى مەن مەديتسينالىق قۇرال-جابدىقتار تيەلگەن تاعى 100 جۇك كولىگى جەتتى. بۇل تۋرالى يزرايلدىڭ COGAT ۇكىمەتتىك ۇيىمى مالىمدەدى، دەپ حابارلايدى DW اقپارات اگەنتتىگى.
- بارلىق كومەك مۇقيات قاۋىپسىزدىك تەكسەرىسىنەن كەيىن تاپسىرىلدى. بۇل يزرايل قورعانىس ارمياسىنىڭ لاۋازىمدى تۇلعالارىنىڭ ۇسىنىسى بويىنشا جانە ساياسي باسشىلىقتىڭ ديرەكتيۆاسىنا سايكەس جاسالدى. ءبىز گازا سەكتورىنا گۋمانيتارلىق كومەك كورسەتۋدى جالعاستىرامىز، بۇل كومەك حاماس لاڭكەستىك ۇيىمىنىڭ قولىنا تۇسپەۋى ءۇشىن بار كۇش- جىگەرىمىزدى سالامىز، - دەلىنگەن COGAT جازباسىندا.
ءبىر كۇن بۇرىن گازا سەكتورىنا وسىنداي گۋمانيتارلىق جۇك تيەلگەن 93 جۇك كولىگى كەلگەنى اتاپ ءوتىلدى.
گۋمانيتارلىق كومەك يزرايل، مىسىر جانە گازا سەكتورى شەكارالارىنىڭ تۇيىسكەن جەرىندەگى كەرەم-شالوم باقىلاۋ-وتكىزۋ بەكەتىنە كەلدى. مۇندا گۋمانيتارلىق قىزمەتكەرلەر ونى كەيىننەن جەرگىلىكتى تۇرعىندار اراسىندا تاراتۋ ءۇشىن جۇك كولىكتەرىنە سالىپ جىبەرۋى كەرەك. دۇنيەجۇزىلىك ازىق-تۇلىك باعدارلاماسى (WFP) وكىلدىگىنىڭ باسشىسى انتۋان رەنار 78 جۇك كولىگى «ءوز ساعاتىن كۇتىپ تۇرعانىن» حابارلادى.
- ءبىز جۇكتەرىمىزدىڭ تونالمايتىنىنا كوز جەتكىزۋىمىز كەرەك، - دەدى ول Associated Press اگەنتتىگىنە.
بۇعان دەيىن توناۋ كومەك جەتكىزۋگە كەدەرگى كەلتىرگەن.
يزرايل گازا تۇرعىندارىنا كومەك حاماس-تىڭ جەتكىزىلىمدەردى يەمدەنۋىنە جول بەرمەۋ ءۇشىن قاۋىپسىز تاراتۋ ايماقتارى قۇرىلعاننان كەيىن قايتا باستالاتىنىن مالىمدەدى. الايدا، بۇل مەحانيزم شامامەن تەك 25-مامىردا جۇمىس ىستەي باستايدى، دەپ حابارلادى بۇعان دەيىن يزرايل پرەمەر-ءمينيسترى بينيامين نەتانياحۋدىڭ حالىقارالىق ىستەر جونىندەگى كەڭەسشىسى كەرولاين گليك.
