ماماندار شيەنىڭ دەنساۋلىققا قانداي پايداسى بار ەكەنىن ايتتى

استانا. قازاقپارات - ديەتولوگتار شيەنىڭ دەنساۋلىققا پايداسى تۋرالى ايتتى، دەپ حابارلادى «چەمپيونات».

ديەتولوگ ءارى نۋتريتسيولوگ شەللي باللستىڭ ايتۋىنشا، شيە جيدەگى - س دارۋمەنى مەن كاليگە باي. بۇل اعزاعا قاجەتتى قورەكتىك زاتتاردىڭ كۇندەلىكتى نورماسىنىڭ %10 دان استامىن قامتيدى. س ۆيتامينى يممۋنيتەتتى ساقتاۋدا ماڭىزدى ءرول اتقارادى، ال كالي بۇلشىقەت، قان اينالىمى جانە جۇيكە جۇيەلەرىنىڭ دۇرىس جۇمىس ىستەۋى ءۇشىن قاجەت.

كارديولوگ-ديەتولوگ ميشەل رۋتەنشتەين شيەدە قابىنۋدى ازايتىپ، جاسۋشالاردىڭ زاقىمدالۋىمەن كۇرەسۋ ارقىلى جۇرەكتىڭ جالپى جۇمىسىن جاقسارتاتىن انتيوكسيدانتتار كوپ ەكەنىن اتاپ ءوتتى.

ادەتتە، شيەنىڭ ءتۇسى نەعۇرلىم قوشقىل بولسا، سوعۇرلىم ولاردىڭ قۇرامىندا پوليفەنول مەن انتيوكسيدانت كوپ بولادى.

جيدەك ۇيقىنى جاقسارتۋعا كومەكتەسەتىن مەلاتونينگە دە باي. وندا اس قورىتۋ جۇيەسى مەن ىشەك ميكروبيوماسىن رەتتەيتىن جاسۇنىق مول. سونداي-اق قانداعى قانت دەڭگەيىن رەتتەۋگە كومەكتەسەدى جانە تاماقتانعاننان كەيىن توقتىق سەزىمىن كۇشەيتەدى.