ماۋلەن اشىمبايەۆ قازاقشا كونتەنت جاساۋشىلار فورۋمىنا قاتىستى

استانا. KAZINFORM - سەنات ءتوراعاسى ماۋلەن اشىمبايەۆ پالاتانىڭ ءبىر توپ دەپۋتاتىمەن بىرگە QazaqSham فورۋمىنا قاتىستى. وندا پالاتا سپيكەرى كرەاتيۆتى يندۋستريا سالاسىنداعى جاڭا جوبالارمەن تانىستى.

Сенат Төрағасы
Фото: Н.Байбулин

سونداي- اق قاتىسۋشىلارمەن مەملەكەت باسشىسى باستاماشى بولعان قازاق تىلىندە كونتەنتتەر دايىنداۋ بارىسىن جانە وسى باعىتتاعى باسقا دا وزەكتى ماسەلەلەردى تالقىلادى. ءىس-شارادا سونداي-اق كرەاتيۆتى يندۋستريا جانە وتاندىق مەديا وكىلدەرى بولدى.

ءوز سوزىندە سەنات ءتوراعاسى كەيىنگى جىلداردا ەلىمىزدە كرەاتيۆتى يندۋستريا قارقىندى دامىپ كەلە جاتقانىن اتاپ ءوتتى. ەل پرەزيدەنتى قاسىم-جومارت توقايەۆتىڭ تاپسىرماسىمەن اتالعان سالانى دامىتۋ ءۇشىن ينستيتۋتسيونالدىق نەگىز قالىپتاستى. مادەنيەت جانە اقپارات مينيسترلىگىندە ارنايى دەپارتامەنت قۇرىلدى.

سونداي-اق سەكتوردى ءارى قاراي جەتىلدىرۋگە جانە مەملەكەت تاراپىنان قولداۋعا ارنالعان ناقتى شارالار قابىلدانىپ جاتقانى ايتىلدى. اتاپ ايتقاندا، وسى باعىتتا ەڭبەك ەتىپ جۇرگەن ازاماتتار ءۇشىن سالىقتىق جەڭىلدىكتەر قاراستىرىلدى. سونىڭ ناتيجەسىندە از عانا ۋاقىتتىڭ ىشىندە كرەاتيۆتى يندۋستريا سۋبەكتىلەرى 8 پايىزعا ارتتى.

سونىمەن قاتار ەلىمىز بويىنشا ءتيىستى ينفراقۇرىلىم قالىپتاستىرۋ ءۇشىن جۇيەلى جۇمىس قولعا الىنىپ جاتقانى بەلگىلى. بۇل باعىت جاڭا كەشەندى شەشىمدەر قاجەت ەتەتىنى انىق.

«پرەزيدەنتىمىز قاسىم-جومارت كەمەل ۇلى توقايەۆ ۇلتتىق قۇرىلتايدىڭ ءۇشىنشى وتىرىسىندا قازاقستاننىڭ مادەني تولقىنى وڭىرلىك جانە حالىقارالىق دەڭگەيدە كەڭىنەن تانىلا باستاعانىنا نازار اۋداردى. قازىرگى تاڭدا ۇلتىمىزدىڭ زور جاسامپازدىق الەۋەتى كينو، مۋزىكا، ادەبيەت جانە ونەردىڭ باسقا دا سالالارىندا ايقىن كورىنىس تاۋىپ كەلەدى. بۇل باعىتتا ەلىمىزدە تالانتتى جاستار كوپ»، - دەگەن پالاتا سپيكەرى فورۋمدى ۇيىمداستىرۋشىلارعا العىس ءبىلدىردى.

ءىس- شارا بارىسىندا قاتىسۋشىلار كرەاتيۆتى يندۋستريانى ءتيىمدى دامىتۋعا ءتيىستى جاعداي قاجەت ەكەنىن ايتىپ، ءوز ۇسىنىستارىن جەتكىزدى. ولاردىڭ قاتارىندا قۇقىقتىق بازا قالىپتاستىرۋ، سالانى مەملەكەتتىك قولداۋ، ونىمدەردى كوممەرتسيالاندىرۋعا جاردەمدەسۋ، وڭىرلەردە كرەاتيۆتى جوبالاردى دامىتۋ سياقتى تىڭ باستامالار بار.

«QazaqSham فورۋمى - قازاق تىلىندە كونتەنت دايىنداۋ اياسىندا مەملەكەتتىڭ، بيزنەستىڭ، شىعارماشىل تۇلعالاردىڭ جانە ءبىلىم بەرۋ مەكەمەلەرىنىڭ كۇش- جىگەرىن بىرىكتىرە وتىرىپ، كرەاتيۆتى يندۋستريانىڭ وزەكتى ماسەلەلەرىن تالقىلايتىن، سونداي-اق، ونى ساپالى جاڭا دەڭگەيگە شىعارۋعا مۇمكىندىك بەرەتىن الاڭ. بۇل باستاما جاڭا ۇزدىك جوبالارمەن تانىسۋعا، كونتەنتمەيكەرلەردىڭ ءوزارا تاجىريبە الماسۋىنا، مەملەكەتتىك تىلدەگى مازمۇندى ارتتىرۋ تاسىلدەرىن سارالاۋعا جول اشادى. وزدەرىڭىز بايقاعانداي، اتقاراتىن جۇمىس از ەمەس. وسى رەتتە سىزدەردىڭ ءار باستامالارىڭىز بەن ۇسىنىستارىڭىز ماڭىزدى. الداعى ۋاقىتتا كرەاتيۆتى يندۋسترياعا قىزىعۋشىلار كوبەيىپ، فورۋمعا قاتىسۋشىلار قاتارى ارتا تۇسەدى دەپ سەنەمىن»، - دەگەن ماۋلەن اشىمبايەۆ كرەاتيۆتى يندۋستريا سالاسىندا ەڭبەك ەتىپ جۇرگەن تاراپتاردى سەكتوردى ءارى قاراي دامىتۋ جولىندا بىرلەسىپ جۇمىس ىستەۋگە شاقىردى.

فورۋمدا كاسىپكەر، «Phenomenal Kids» جوباسىنىڭ نەگىزىن قالاۋشى ازات ابىكەن، تاريحشى، ارحەولوگ-ەكسپەريمەنتاتور نۇرقوجا ەرسايىن، پروديۋسەر ازامات دەمەگەن، «Balafunny» YouTube-ارناسىنىڭ نەگىزىن قالاۋشى التىناي ەسەنجانوۆا، ماڭعىستاۋ وبلىسىنداعى «Aktown» جوباسىنىڭ نەگىزىن قالاۋشى نۇرسۇلتان مىرزابەك، «Qonzhyq App» جوباسىنىڭ وكىلى اينۇر مالىبەكوۆا جانە باسقا قاتىسۋشىلار ءسوز سويلەدى.

ءىس- شارانىڭ سوڭىندا قاتىسۋشى كومپانيالار بالالار ارنالعان وزەكتى تاقىرىپتار جونىندە قازاق تىلىندە كونتەنت ازىرلەۋ جانە بىرلەسىپ ءوندىرۋ تۋرالى مەموراندۋمعا قول قويدى.

سوڭعى جاڭالىقتار