ماۋلەن اشىمبايەۆ: بالالارعا قازاقشا كونتەنت جاساۋشىلاردى قولداۋ ءبىر كۇندىك شارا بولماۋ كەرەك
استانا. KAZINFORM - سەنات ءتوراعاسى ماۋلەن اشىمبايەۆ مادەنيەت جانە اقپارات مينيسترلىگىن بالالارعا قازاق تىلىندە كونتەنت جاساۋشىلاردى جۇيەلى قولداۋعا شاقىردى.
پارلامەنت سەناتى ماسس- مەديا تۋرالى ءماجىلىس قابىلداعان ءۇش بىردەي زاڭدى قاراپ جاتىر. اڭگىمە «ماسس- مەديا تۋرالى»، «كەيبىر زاڭنامالىق اكتىلەرگە ماسس- مەديا ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى»، «اكىمشىلىك قۇقىق بۇزۋ تۋرالى كودەكسكە ماسس- مەديا ماسەلەلەرى بويىنشا وزگەرىستەر ەنگىزۋ تۋرالى» زاڭدار تۋرالى بولىپ وتىر.
نەگىزگى زاڭدى تالقىلاۋ كەزىندە سپيكەر م. اشىمبايەۆ مادەنيەت جانە اقپارات ۆيتسە- ءمينيسترى قانات ىسقاقوۆقا ناقتى ۇسىنىس ايتتى.
«قانات جۇماباي ۇلى، وسى ماسەلەگە وراي جانە ەكىنشى سۇراققا بايلانىستى ايتساق، كەشە قازاق تىلىندە كونتەنت جاسايتىن كرەاتيۆتى يندۋستريا وكىلدەرىنىڭ فورۋمىنا قاتىسىپ كەلدىك. سول جەردە دە وسى قازاق تىلىندە بالالارعا كونتەنت جاساپ جۇرگەن ماماندار ءبىراز ماسەلەنى كوتەردى. ءبارى قارجىلىق كومەك ماسەلەسىن ايتىپ جاتىر. سونداي- اق، ماركەتينگ ماسەلەلەرى دە تىلگە تيەك بولدى. جالپى اقپاراتتارعا قول جەتكىزۋ مۇمكىندىكتەرى تۋرالى دا ماسەلەلەر كوتەرىپ جاتىر. سىزدەر اقىلداسىپ، ماسس- مەديا تۋرالى زاڭدى دەپۋتاتتار قابىلداپ جاتسا، سونىڭ اياسىندا بالالارعا قازاق تىلىندە كونتەنت جاساپ جۇرگەن مامانداردى ورتالىقتاردى قولداۋلارىڭىز كەرەك. بىزدە وتە جاقسى، جاس ماماندار ءوسىپ كەلە جاتىر. كەشە ءبىز ولاردى كوردىك، ويلارىنا، ۇسىنىستارىنا ريزا بولدىق. ءبىز جالپى مەملەكەت تاراپىنان وسىنداي كومپانيالارعا ءبىر كۇندىك ەمەس، جۇيەلى تۇردە كومەك بەرۋىمىز كەرەك. گرانت كۇيىندە بولسىن، باسقا فورمالاردا بولسىن، جاس تالانتتاردى قولداۋ باعىتىندا جۇمىس ىستەۋىمىز كەرەك»، - دەدى سەنات ءتوراعاسى.
