ماكرون زايىبى تۋرالى جالعان مالىمدەمە جاساعان ايەلدى سوتقا بەردى

استانا. KAZINFORM - فرانسيا پرەزيدەنتى ەممانۋەل ماكرون مەن زايىبى بريجيت ماكرون بلوگەر كەنديس وۋەنسكە قارسى جالا جابۋ تۋرالى سوتقا ارىز بەردى. بۇل تۋرالى BBC حابارلادى.

ارىز ا ق ش-تىڭ دەلاۆەر شتاتىنداعى سوتقا جولدانعان. وندا كەنديس وۋەنس تاراتقان اقپارات «ساندىراققا تولى، جالا جابۋعا نەگىزدەلگەن جانە شىندىقتان مۇلدە الشاق» دەپ سيپاتتالادى.

الەۋمەتتىك جەلىلەردە ميلليونداعان جازىلۋشىسى بار وۋەنس بۇعان دەيىن بىرنەشە رەت بريجيت ماكروننىڭ جىنىسىن اۋىستىرعانىن مالىمدەگەن. سونداي-اق ول «بريجيتكە اينالۋ» اتتى بەينەروليكتەر سەرياسىن جاريالاعان.

اتالعان كونسپيرولوگيالىق تەوريا بىرنەشە جىلدان بەرى ينتەرنەتتە تاراپ ءجۇر. وندا فرانسيانىڭ ءبىرىنشى حانىمى جان-ميشەل ترونە ەسىمىمەن دۇنيەگە كەلگەن دەلىنەدى. الايدا بۇل - بريجيت ماكروننىڭ اعاسىنىڭ اتى جانە تەوريا ناقتى دالەلدەرگە نەگىزدەلمەگەن.

ماكرون جۇبىنىڭ مالىمدەۋىنشە، ولار ادۆوكاتتارى ارقىلى وۋەنسكە بىرنەشە مارتە بۇل جالعان اقپاراتتان باس تارتۋ تۋرالى تالاپ قويعان. الايدا جاۋاپ بولماعاندىقتان، جاعدايدى شەشۋدىڭ جالعىز جولى - سوتقا جۇگىنۋ دەپ شەشكەن.

ارىز مازمۇنىندا وۋەنس جالعان مالىمدەمەلەرىن ادەيى جالعاستىرىپ، جاپپاي جالا جابۋ ناۋقانىن باستاعانى جازىلعان. سونىمەن قاتار، ول ماكرون مەن بريجيتتىڭ تۋىستىق بايلانىسى بارىن، ءتىپتى فرانسيا پرەزيدەنتى رەتىندە ماكروندى ورتالىق بارلاۋ باسقارماسىنىڭ سانانى باسقارۋ باعدارلاماسى ارقىلى تاڭدادى دەپ مالىمدەگەن.

- ەگەر بۇل جالا جابۋدىڭ ايقىن مىسالى بولماسا، وندا ونداي مىسال مۇلدە جوق، - دەدى ماكروندار وتباسىن سوتتا قورعايتىن ادۆوكات توم كلەر.

ايتا كەتەيىك، بۇعان دەيىن ماكرون بالالارعا نەلىكتەن الەۋمەتتىك جەلىلەردى پايدالانۋعا تىيىم سالۋدى ۇسىنعانىن حابارلادىق.