ماڭعىستاۋدا دالالى القاپ ەرەكشە كۇيگە ەندى
اقتاۋ. KAZINFORM - ماڭعىستاۋ وبلىسىنداعى «ماناشى» مەملەكەتتىك تابيعي قاۋمالىندا بيىل وسىمدىك اتاۋلى جىلداعىدان مول شىعىپ، القاپ ەرەكشە كۇيگە ەندى.
ۇزاق جىلداردان كەيىن قاۋلاي وسكەن ءشوپ دالانىڭ ءسانىن كىرگىزە تۇسكەن. «قىزىلساي» مەملەكەتتىك وڭىرلىك تابيعي پاركىنىڭ باسشىسى مىڭبەرگەن قاراتاۋوۆ بۇل قۇبىلىستى جاقسىلىققا بالاپ وتىر.
«قاۋمال سوڭعى رەت 2016-2017 -جىلدارى وسىنداي كۇيگە ەنگەن ەدى. ودان كەيىنگى جىلدارى ءشوپ جاقسى شىقپادى. دالا تاقىر بولماسا دا اسا بيىك كوتەرىلمەيتىن. نەگىزىنەن قاي ۋاقىتتا دا ءۇستىرت جازىعىندا ءشوپ بولادى. ءبىراق بيىلعى كورىنىس بارشامىزدى قۋانتىپ وتىر. بەينەۋ اۋدانىنداعى 5-شى رازەزد بەن سەيسەم اتا قورىمى ارالىعىندا قازىر قۇلپىرىپ تۇر. ماناشىنىڭ بۇدان ارعى اۋماقتارىنداعى كورىنىس باسقاشا»، - دەيدى مىڭبەرگەن قاراتاۋوۆ.
ينسپەكتورلار قاۋمالدا وسىمدىك اتاۋلى گۇلدەپ، جازىق دالادانىڭ توپىراعىن كورسەتپەستەي ءوسۋىن ىلعالدىڭ مول تۇسۋىنەن دەپ وتىر.
قازىر «قىزىلساي» مەملەكەتتىك وڭىرلىك تابيعي پاركىنىڭ قىزمەتكەرلەرى وزدەرىنە قاراستى جەرلەردى تۇراقتى قاداعالاپ، اڭ- قۇستاردى بروكونەرلەردىڭ اتۋىنا توسقاۋىل بولىپ ءجۇر.
«ماناشى» مەملەكەتتىك تابيعي قاۋمالى 2015 -جىلى قۇرىلعان. جەر كولەمى 172573,2 گەكتار بولاتىن بۇل جەر وبلىسقا قاراستى ماڭعىستاۋ مەن بەينەۋ اۋداندارى ارالىعىندا ورنالاسقان.
2021 -جىلى ماڭعىستاۋ وبلىسى بويىنشا قۋاڭشىلىق جاعدايى تىركەلدى. سول ۋاقىتتا ءوڭىر شارۋالارى شىعىنعا باتىپ، جايىلىمنان تىستەيتىن ءشوپ تاپپاعان مال اتاۋلى تەگىس قىرىلعان ەدى.
اۆتور
جانكەلدى قارجان
