ماڭعىستاۋدا امال مەرەكەسى باستالدى
اقتاۋ. KAZINFORM - ماڭعىستاۋلىقتار 14-ناۋرىز كۇنى جىلدا «اداي اتا - وتپان تاۋ» تاريحي-مادەني كەشەنىندە باس قوسىپ، كورىسەدى. بيىل دا سول ادەتتەن تانباي ءبىر كۇن بۇرىن وتپان تاۋدا جينالدى.
مەرەكەلىك شارالاردى ۇيىمداستىرۋ القاسىنىڭ مۇشەسى سۇيىندىك ريزانىڭ ايتۋىنشا، ەكى كۇندە جيىرمادان استام شارا جوسپارلانعان.
- وتپان تاۋعا 58 اعاش ءۇي تىگىلدى. شامامەن 10 مىڭداي ادامدى قارسى الۋعا مۇمكىندىك بار. امال مەرەكەسىن كورۋ ءۇشىن قازاقستاننىڭ تۇكپىر- تۇكپىرىنەن قوناقتار كەلىپ جاتىر. سونداي-اق، مەرەكەلىك ءىس- شاراعا اتسالىسامىز دەپ ازەربايجان، تۇركيا، وزبەكستان مەن تۇرىكمەنستان ەلدەرىنەن ءداستۇرلى انشىلەرى كەلدى. وسى جاڭا «امالدىڭ اق تاڭى» اتتى وبلىستىق سۋرەتشىلەر پلەنەرىنىڭ اشىلۋ سالتاناتى ءوتتى. تەاترلاندىرىلعان كورىنىس كورسەتىلىپ، «بىرلىك وتى» جاعىلدى، - دەيدى سۇيىندىك ريزا.
امال مەرەكەسىنە ارنايى كەلگەن مەيماندار بيىلعى شارالاردىڭ جوعارى دەڭگەيدە ۇيىمداستىرىلعانىن اتاپ ءوتتى.
- امال مەرەكەسى ءۇشىن ماڭعىستاۋ وڭىرىنە ارنايى كەلدىم. بۇرىن تەلەارنا ارقىلى كورەتىن بولساق، بۇگىن ءوزىم كۋا بولىپ تۇرمىن. وتپان تاۋىنا كوتەرىلىپ، اداي اتا كەسەنەسىندە بولدىق. حالىقتىڭ كوڭىل-كۇيى جاقسى. وتە جوعارى دەڭگەيدە ۇيىمداستىرىلعان. امالدان امالعا امان- ەسەن جەتە بەرەيىك! ەلىمىز تىنىش بولسىن!، - دەيدى اقتوبە قالاسىنىڭ تۇرعىنى سالتانات اگيسوۆا.
شەتەلدىك قوناقتار دا ماڭعىستاۋلىقتارعا اقجارما تىلەگىن ارنادى.
- ماڭعىستاۋ ولكەسى، سونداي-اق كۇللى قازاق حالقى ءۇشىن ەرەكشە مەيرام - امال مەرەكەسىنە قاتىسۋ مەن ءۇشىن ۇلكەن مارتەبە. حالىقتىڭ قوناقجاي قاسيەتى، جىلى قابىلداعانى قۋانتادى. ۇلتتىق كيىم كيگەن كوپشىلىكتىڭ ءبىر- بىرىمەن قول الىسىپ كورىسۋى ادەمى كورىنىس. بارشا قازاقستاندىقتاردى امال مەرەكەسىمەن قۇتتىقتايمىن!، - دەيدى وزبەكستان رەسپۋبليكاسىنىڭ ءارتىسى روزا رادجاپوۆا.
امال مەرەكەسى اياسىندا قازاقشا كۇرەس، تۇيە پالۋان، توعىزقۇمالاق سياقتى ۇلتتىق سپورت تۇرلەرىنەن جارىستار، وشاق بايگە، تاي جارىس پەن الامان بايگە، شاشاق قۇلاقتى تازى يتتەرىنىڭ جارىسى جوسپارلانعان.
سونداي-اق، مۇرات وسكىنبايەۆ اتىنداعى ماڭعىستاۋ وبلىستىق فيلارمونياسىنىڭ ونەرپازدارى مەن تۇركيا، ازەربايجان، وزبەكستان، قىرعىزستان مەملەكەتتەرى انشىلەرىنىڭ قاتىسۋىمەن گالا- كونسەرت ءوتتى. جىر-تەرمە كەشى بولىپ، وعان وننان استام جىراۋ قاتىستى.
