ەلىمىزدە 2 پايىزدىق يپوتەكاعا كىمدەر ءوتىنىش بەرە الادى

بيىل وسى باعىتتا 12,6 مىڭ قارىز بەرۋ جوسپارلانعان. وعان 175,1 ميلليارد تەڭگە قاراستىرىلعان. بۇل تۋرالى و ك ق وتكەن باسپا ءسوز ماجىلىسىندە ق ر ونەركاسىپ جانە قۇرىلىس مينيسترلىگىنىڭ قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتىنىڭ ءتوراعاسى باقىتجان جۇنىسبەكوۆ مالىمدەدى.

ونىڭ ايتۋىنشا، 2 پايىزدىق جەڭىلدەتىلگەن يپوتەكا تۇرعىن ۇيگە مۇقتاج رەتىندە ەسەپتە تۇرعان الەۋمەتتىك وسال ساناتتاعى ازاماتتارعا بەرىلەدى.

2 پايىزدىق يپوتەكاعا مىنا ازاماتتار ءوتىنىش بەرە الادى:

- ۇلى وتان سوعىسىنىڭ ارداگەرلەرى؛

- جەتىم بالالار؛

- كوپبالالى انالار مەن كوپبالالى وتباسىلار؛

- I جانە II توپتاعى مۇگەدەكتىگى بار ادامدار؛

- مۇگەدەكتىگى بار بالالاردى تاربيەلەپ وتىرعان وتباسىلار؛

- جەڭىلدىكتەرى بويىنشا ۇلى وتان سوعىسىنىڭ ارداگەرلەرىنە تەڭەستىرىلگەن ارداگەرلەر؛

- باسقا مەملەكەتتەردىڭ اۋماعىنداعى ۇرىس قيمىلدارىنىڭ ارداگەرلەرى؛

- جەسىرلەر.

- يپوتەكا الۋ ءۇشىن وتباسىنىڭ ءار مۇشەسىنە شاققانداعى تابىس 5 ەڭ تومەنگى كۇنكورىس دەڭگەيىنەن، ياعني 254255 تەڭگەدەن اسپاۋعا ءتيىس. بيىلعى سەگىز ايدىڭ قورىتىندىسى بويىنشا 3954 ازامات وسى باعدارلاما ارقىلى باسپانالى بولدى،-دەدى كوميتەت ءتوراعاسى.

سونداي-اق، ونىڭ ايتۋىنشا، قالعان ساناتتاعى ازاماتتارعا تابىس دەڭگەيىنە شەكتەۋ قويىلمايتىن 5 پايىزدىق يپوتەكا قولجەتىمدى. جىل باسىنان بەرى بۇل مۇمكىندىكتى 2252 ازامات پايدالانعان.

ايتا كەتەيىك، بۇعان دەيىن ەلىمىزدىڭ 17 وڭىرىندە جاس ماماندار جەڭىلدەتىلگەن يپوتەكامەن ءۇي الا الاتىنى حابارلاندى.