ليۆيا جاعالاۋىنداعى تانكەر جارىلىسى: كەمە قازاقستاندىق مۇنايدى تاسىمالداماعان
استانا. KAZINFORM - ليۆيا جاعالاۋىندا 1 ميلليون باررەل مۇناي تاسىمالدايتىن Vilamoura تانكەرىندە جارىلىس بولدى. ق ر ەنەرگەتيكا مينيسترلىگى بورتتاعى مۇنايدىڭ قازاقستاندىق ەمەس ەكەنىن مالىمدەدى، دەپ حابارلايدى Kazinform.
بۇعان دەيىن ب ا ق- تا تانكەردە قازاقستاندىق مۇناي بولۋى مۇمكىن دەگەن اقپارات تاراعان بولاتىن.
Bloomberg جيناعان كەمەلەردى قاداعالاۋ دەرەكتەرىنە سايكەس، ۆيلامۋرا ءساۋىر ايىنىڭ باسىندا رەسەيدىڭ ۋست- لۋگا پورتىنا كەلىپ، وندا قازاقستاندىق مۇنايدى تيەگەن. مامىر ايىندا تانكەر رەسەيدىڭ نوۆوروسسيسك پورتىنىڭ جانىنداعى كاسپيي قۇبىر كونسورتسيۋمىنىڭ تەرمينالىنا دا كەلدى، ول نەگىزىنەن قازاقستاندىق مۇنايدى جونەلتەدى.
وقيعاعا قاتىستى ق ر ەنەرگەتيكا مينيسترلىگى تۇسىنىك بەردى.
- وقيعا ليۆيا پورتتارىنىڭ بىرىندە سوڭعى تيەۋ جۇرگىزىلگەن جەكە تانكەرمەن بولعان، وقيعا كەزىندە بورتتا قازاقستاندىق مۇناي بولعانى تۋرالى اقپارات شىندىققا جاناسپايدى، - دەلىنگەن ۆەدومستۆو مالىمدەمەسىندە.
ايتا كەتەيىك، قازىر تانكەردى سۇيرەپ گرەكياعا جەتكىزۋگە تىرىسىپ جاتىر، كەلگەننەن كەيىن كەلتىرىلگەن شىعىندى باعالاۋ جۇرگىزىلەدى.
TMS Tankers وپەراتور كومپانياسى وكىلىنىڭ ايتۋىنشا، جارىلىس سالدارىنان كەمەنىڭ ماشينا زالىن سۋ باسقان. جارىلىستىڭ ناقتى سەبەبى ءالى انىقتالعان جوق. جارىلىس سالدارىنان قورشاعان ورتانىڭ لاستانۋى تىركەلگەن جوق، بۇكىل ەكيپاج قاۋىپسىز.
