ەلىمىزدەگى ۇزدىك روبوتوتەحنيكتەر انىقتالدى
الماتى. KAZINFORM - الماتىدا World Robot Olympiad - 2024 حالىقارالىق وليمپياداسىنىڭ رەسپۋبليكالىق كەزەڭى ءوتتى.
الماتىداعى فيزيكا-ماتەماتيكا باعىتىنداعى نازاربايەۆ زياتكەرلىك مەكتەبىنىڭ بازاسىندا جينالعان 272 وقۋشى ەكى كۇن بويى RoboMission, Future Innovators، RoboSports جانە Future Engineers ساناتتارىندا باق سىنادى. بيىلعى جارىسقا قاتىسۋشىلاردىڭ جارتىسىنان كوبى جالپى ءبىلىم بەرەتىن مەكتەپتەردەن كەلگەنىن، ولاردىڭ ىشىندە 16 كوماندا اۋىلدىق وقۋشىلاردان قۇرالعانىن اتاپ وتكەن ءجون.
WRO بايقاۋىنىڭ بيىلعى تاقىرىبى - «جەر- انا قامقورشىلارى». ەرەجەگە سايكەس RoboMission ساناتىندا وقۋشىلار ارنايى ارەنادا بەلگىلى ءبىر ميسسيالاردى ورىندايتىن روبوتتاردى باعدارلامالاپ، پراكتيكالىق تاپسىرمالاردى شەشەدى. ال، RoboSports ساناتتارىندا باعدالارلامالاۋ ارقىلى سپورتتىق سايىستارعا دەربەس تۇردە قاتىسا الاتىن روبوتتاردى جينايدى. Future Engineers ساناتىندا روبوتوتەحنيكا جانە ينجەنەريا پرينتسيپتەرىن قولدانا وتىرىپ، كۇردەلى تەحنيكالىق تاپسىرمالارعا ارنالعان ينجەنەرلىك شەشىمدەردى قۇراستىرادى. Future Innovators ساناتىنداعى ونەرتاپقىشتار ادامداردىڭ تابيعاتپەن ۇيلەسىمدى ءومىر سۇرۋىنە كومەكتەسەتىن، جويقىن تابيعي قۇبىلىستاردان قورعاي الاتىن، كليماتى قاتال جەرلەردە تۇرۋعا جاعداي جاسايتىن روبوت مودەلدەرىن ازىرلەيدى.
وليمپيادانىڭ اشىلۋ سالتاناتىندا «نازاربايەۆ زياتكەرلىك مەكتەپتەرى» د ب ب ۇ باسقارما ءتوراعاسى ءانۋار جانعوزين جاس روبوتوتەحنيكتەردىڭ الدىندا ەرەكشە ميسسيا تۇرعانىن اتاپ ءوتىپ، ولارعا ۇلكەن سەنىم ارتاتىنىن ءبىلدىردى.
- بيىلعى تاقىرىپ - وتە وزەكتى. قورشاعان ورتانى قورعاۋ، تابيعاتقا جاناشىرلىق تانىتۋ - ءاربىرىمىزدىڭ مىندەتىمىز. دەگەنمەن ەكولوگيالىق ماسەلەلەر جىل وتكەن سايىن كۇردەلەنىپ، ولاردى شەشۋ ءۇشىن جاڭا تەحنولوگيالار مەن يننوۆاتسيالىق تاسىلدەر قاجەت بولۋدا. سوندىقتان بيىلعى جارىستا ۇسىنىلاتىن جوبالار تابيعات پەن ادامزاتتىڭ ۇيلەسىمدى ءومىر سۇرۋىنە ۇلەس قوسادى دەپ سەنەمىن. بۇل مىندەتتەردى شەشۋ ءسىز سياقتى جاستاردىڭ قولىندا،- دەدى باسقارما ءتوراعاسى.
Future Innovators, ياعني شىعارماشىلىق سانات بويىنشا تورەشىلەرگە 50 جوبا ۇسىنىلدى. جاس روبوتوتەحنيكتەردى سۋ تاسقىنى، جەر سىلكىنىسى، جاھاندىق جىلىنۋ، ەكولوگيا، اۋىز سۋ تاپشىلىعى جانە باسقا دا عالامدىق ماسەلەلەر الاڭداتادى. مىسالى، ەلورداداعى نازاربايەۆ زياتكەرلىك مەكتەبىنىڭ وقۋشىلارى تاير تۇرسىنحان مەن قالياقپار بايمۇحان سۋ تاسقىنى كەزىندە ادامدارعا كومەك كورسەتەتەتىن روبوت ازىرلەدى.
- بۇگىنگى كۇنى پلانەتامىزدىڭ تەمپەراتۋراسى ءبىر گرادۋسقا كوتەرىلدى جانە بۇل پروتسەسس جالعاسۋدا. بۇل ميلليونداعان تەكشە مەتر سۋدىڭ بۋلانۋىنا جانە جاۋىن- شاشىننىڭ كوبەيۋىنە اكەلۋدە، سونىڭ سالدارىنان سۋ تاسقىندارىنىڭ قاۋپى دە ارتىپ كەلەدى. بيىلعى كوكتەمدە وسىنداي تاسقىنداردىڭ كۋاسى بولدىق. سوندىقتان ءبىز ادامدارعا ءقاۋىپتى ايماقتان تەز شىعۋعا جانە قاۋىپسىز جەرگە جەتۋگە كومەكتەسەتىن قۇتقارۋشى روبوت جاساۋدى قولعا الدىق،- دەيدى تاير تۇرسىنحان.
جامبىل وبلىسى بايزاق اۋدانىنىڭ ن. كيىكبايەۆ اتىنداعى اۋىلدىق مەكتەپ- گيمنازياسىنىڭ وقۋشىلارى بەكسۇلتان ايدار مەن جانسۇلتان وشاقباي اۋىل شارۋاشىلىعىمەن اينالىساتىن ادامدارعا ارنالعان «ەكواۋىل» جوباسىن تانىستىردى. بۇل باستاما قاشىقتا ورنالاسقان اۋىلدىق ايماقتارداعى جۇمىستى جەڭىلدەتۋ ءۇشىن اۆتوماتتاندىرۋعا جانە كۇن، جەل، سۋ سياقتى جاڭارتىلاتىن ەنەرگيا كوزدەرىن پايدالانۋعا باعىتتالعان.
وليمپيادانىڭ ناتيجەسى بويىنشا RoboMission. Elementary, RoboMission. Junior جانە RoboMission. Senior ساناتتارىندا استاناداعى روبوتەك مەكتەبىنەن كەلگەن گلەب ليستوپادنيي مەن ءادىلحان مۋكۋشيەۆ، اماندوس اۋباكىر مەن اكەجان جەتپىسبايەۆ، اڭسار ساۋربايەۆ پەن مارات كازكەنوۆ جەڭىمپاز اتاندى.
RoboSports ساناتىندا ورالدىق ونەرتاپقىشتار نۇرداۋلەت حامزا مەن ارۋجان كۋرماتوۆا، Future Engineers ساناتىندا قىزىلورداداعى نازاربايەۆ زياتكەرلىك مەكتەبىنىڭ وقۋشىلارى ەرنۇر ءسادۋ مەن الديار اپپاز جەڭىس تۇعىرىنان كورىندى.
تالدىقورعانداعى نازاربايەۆ زياتكەرلىك مەكتەبىنىڭ ورەندەرى الينۇر رينات ۇلى مەن نۇرالي نۇرجان Future Innovators. Elementary ساناتىندا، سەرجان قالدىبەك پەن اقنيەت مولداكەريموۆ Future Innovators. Junior ساناتىندا، ىڭكار قۇرمانبايەۆا مەن ايىم باۋىرجان قىزى Future Innovators. Senior ساناتىندا ءبىرىنشى ورىنداردى يەلەندى.
ايتا كەتەيىك، رەسپۋبليكالىق چەمپيوناتتا ۇزدىك ناتيجە كورسەتكەن كوماندالار قاراشا ايىندا WRO 2024 وليمپياداسىنىڭ تۇركيادا وتەتىن الەمدىك كەزەڭىندە ەل نامىسىن قورعايدى.
ەسكە سالساق، «نازاربايەۆ زياتكەرلىك مەكتەپتەرى» د ب ب ۇ - 2014 -جىلدان بەرى World Robot Olympiad حالىقارالىق روبوتوتەحنيكا وليمپياداسىنىڭ قازاقستانداعى ۇلتتىق ۇيىمداستىرۋشىسى. 10 جىل ىشىندە NIS ەلىمىزدەگى روبوتوتەحنيكا سالاسىنىڭ دامۋىنا جانە وتاندىق كوماندالاردىڭ حالىقارالىق دەڭگەيدەگى جەتىستىكتەرىنە ايتارلىقتاي ۇلەس قوستى.
