ەلىمىزدىڭ ەڭ ءىرى استىقتى ءوڭىرى بيىل 5,1 ميلليون گەكتار القاپتان ءونىم الادى
استانا. KAZINFORM - ونىڭ ىشىندە ءداندى جانە بۇرشاقتى داقىلدار 4,2 ميلليون گەكتارعا ەگىلەدى دەپ جوسپارلانىپ وتىر، دەپ حابارلايدى ۇكىمەتتىڭ باسپا ءسوز قىزمەتى.
قوستاناي وبلىسىنا جۇمىس ساپارى اياسىندا پرەمەر-مينيستر ولجاس بەكتەنوۆ كوكتەمگى دالا جۇمىستارىنىڭ بارىسىن تەكسەرىپ، ءوڭىردىڭ اۋىل شارۋاشىلىعى قۇرىلىمدارى وكىلدەرىمەن اگروونەركاسىپ كەشەنىن دامىتۋدىڭ وزەكتى ماسەلەلەرىن تالقىلادى.
پرەمەر-مينيسترگە «سەلو ۆوستوچنوە» ج ش س جۇمىسىن كورسەتۋ ارقىلى سالانى مەملەكەتتىك قولداۋ شارالارىنىڭ تيىمدىلىگى تۋرالى باياندادى. اعىمداعى ەگىس ناۋقانىندا فەرمەرلەر تۇقىمدارمەن، ديزەل وتىنى جانە مينەرالدى تىڭايتقىشتارمەن تولىق قامتاماسىز ەتىلگەن. «سەلو ۆوستوچنوە» جشس ديرەكتورى يۆان پوپوۆيچ بيىل جالپى جازدىق ەگىس 54 مىڭ گەكتاردى قۇرايتىنىن حابارلادى. ونىڭ ىشىندە بيداي 47 مىڭ گەكتار القاپقا، ارپا 5,3 مىڭ گەكتارعا ەگىلدى. شارۋاشىلىق وسىرىلگەن استىقتى ىشكى نارىقتىڭ قاجەتتىلىكتەرىن جابۋ ءۇشىن وتكىزەدى.
ءوز كەزەگىندە قوستاناي وبلىسى اكىمىنىڭ ورىنباسارى ارمان ابەنوۆ وڭىردەگى كوكتەمگى ەگىس جۇمىستارىنىڭ قارقىنى تۋرالى باياندادى. ەلىمىزدىڭ ەڭ ءىرى استىقتى ءوڭىر بيىل 5,1 ميلليون گەكتار القاپتان ءونىم الادى، ونىڭ ىشىندە ءداندى جانە بۇرشاقتى داقىلدار 4,2 ميلليون گەكتارعا ەگىلەدى دەپ جوسپارلانۋدا. ءارتاراپتاندىرۋ شەڭبەرىندە مايلى داقىلداردىڭ، الەۋمەتتىك ماڭىزى بار جانە جەمشوپ داقىلدارىنىڭ ۇلەسى ارتىپ كەلەدى. بيىل فەرمەرلەر مينەرالدى تىڭايتقىشتاردى ەنگىزۋدىڭ كولەمىن 1,3 ەسەگە - 337,6 مىڭ تونناعا دەيىن ۇلعايتۋدى جوسپارلاپ وتىر. قارجى ينستيتۋتتارى ارقىلى جەڭىلدەتىلگەن نەسيەلەۋ باعدارلامالارى بويىنشا اۋىل شارۋاشىلىعى قۇرىلىمدارىنا 91,5 ميلليارد تەڭگە ءبولىندى، بۇل وتكەن جىلدىڭ دەڭگەيىنەن 1,2 ەسە كوپ.
سونداي-اق 2025-جىلى وڭىردە اوك سالاسىندا قۇنى 52,5 ميلليارد تەڭگەنى قۇرايتىن 36 ينۆەستيتسيالىق جوبانى پايدالانۋعا بەرۋ جوسپارلانۋدا، بۇل 600 دەن استام جاڭا جۇمىس ورنىن اشۋعا مۇمكىندىك بەرەدى. بۇل رەتتە 2027-جىلعا دەيىن 93 جوبا مەن 4,4 مىڭ جۇمىس ورنىن اشۋ كوزدەلگەن.
ەگىس القابىندا پرەمەر-مينيستر قوستاناي وبلىسىنىڭ ءىرى اۋىل شارۋاشىلىعى تاۋارىن وندىرۋشىلەرىمەن كەزدەستى. اۋىل شارۋاشىلىعىن دامىتۋدىڭ وزەكتى ماسەلەلەرى، ونىڭ ىشىندە IV ۇلتتىق قۇرىلتايدا پرەزيدەنتتىڭ جالپى ءونىم شىعارۋ مەن ەڭبەك ونىمدىلىگىن ارتتىرۋ جانە استىقتى تەرەڭ وڭدەۋ كولەمىن ۇلعايتۋ جونىندەگى مىندەتتەرىن ەسكەرە وتىرىپ تالقىلاندى. وسىمدىك شارۋاشىلىعىن عانا ەمەس، اۋىلدا جىل بويى جۇمىسپەن قامتۋدى قامتاماسىز ەتەتىن سالا رەتىندە مال شارۋاشىلىعىن دا دامىتۋعا نازار اۋدارىلۋدا. كەزدەسۋ بارىسىندا «التىنسارينو» ج ش س باسشىسى بوريس كنيازيەۆ، «AB agro» ج ش س باسشىسى نۇرقانات ءتاجنياز، «سىما-ك» ج ش س باسشىسى مانات كاربوزوۆ جانە باسقالارى ءسوز سويلەدى. اينالىم قاراجاتىن تولىقتىرۋ ءۇشىن شارۋالاردى سۋبسيديالاۋ، مال شارۋاشىلىعى سالاسىنداعى ينۆەستيتسيالىق جوبالاردى جەڭىلدىكپەن قارجىلاندىرۋ، سالا ءۇشىن بىلىكتى ماماندار دايارلاۋ، سونداي-اق اۋىلدىق ەلدى مەكەندەردى دامىتۋعا بيزنەستىڭ بەلسەندى قاتىسۋى ماسەلەلەرى كوتەرىلدى.
«التىنسارينو» ج ش س ديرەكتورى بوريس كنيازيەۆ جىل سايىن كوپتەگەن كاسىپورىندار پايدالاناتىن جەڭىلدەتىلگەن نەسيەلەۋ باعدارلاماسىنىڭ ماڭىزدىلىعىن اتاپ ءوتتى. ماسەلەن، شارۋاشىلىق تەحنيكاسىنىڭ نەگىزگى بولىگى - 326 تراكتور، 56 تۇقىم سەبۋ كەشەنى جانە 87 ونىمدىلىگى جوعارى كومبايندار مەملەكەتتىك قولداۋ باعدارلامالارى ارقىلى ساتىپ الىندى.
- ءبىز اۋىل شارۋاشىلىعىن قولداۋعا 700 ميلليارد تەڭگە ءبولىپ، بۇل كورسەتكىشتى 1 تريلليون تەڭگەگە جەتكىزگىمىز كەلەدى دەگەن شەشىمدى قۋانا قابىلدادىق. بۇل وتە جاقسى. ءبىز ءارتۇرلى سالالاردا - قۇرىلىس، ج ج م، سالىقتار بويىنشا قولداۋعا يە بولىپ وتىرمىز. مەملەكەتتىڭ قامقورلىعىنا ءونىم ءوندىرىسىن ۇلعايتۋ ارقىلى جاۋاپ بەرۋ قاجەت ەكەنىن تۇسىنەمىز. سونداي-اق ادامدارعا، الەۋمەتتىك مادەني ومىرگە قامقورلىق جاساۋ كەرەك، بۇعان دا نازار اۋدارامىز. مىسالى، ءبىزدىڭ شارۋاشىلىق 10 اباتتاندىرىلعان ءۇي سالىپ جاتىر. وتكەن جىلى گازداندىرۋعا، اسفالت توسەۋگە، ءۇي سالۋعا جانە اباتتاندىرۋعا شامامەن 1 ميلليارد تەڭگە جۇمسالدى. مەملەكەت كومەكتەسىپ، ءسىز دە ءوزىڭىز ينۆەستيتسيا سالساڭىز، جاقسى ناتيجە الاسىز. بىرگە بولعاندا كەز كەلگەن جۇكتى كوتەرۋ ءارقاشان وڭاي، - دەپ اتاپ ءوتتى «التىنسارينو» ج ش س ديرەكتورى بوريس كنيازيەۆ.
«AB agro» ج ش س ديرەكتورى نۇرقانات ءتاجنياز 12 مىڭ باسقا ارنالعان قوي فەرماسىن قۇرۋ جوسپارىمەن ءبولىستى. وڭىردە جۇزەگە اسىرىلىپ جاتقان اوك ينۆەستيتسيالىق جوبالارىن قارجىلاندىرۋ بويىنشا سولتۇستىك قازاقستان وبلىسىنىڭ تاجىريبەسىن كەڭەيتۋ باعدارلاماسىنا قاتىسۋ ماسەلەسى كوتەرىلدى.
«سىما-ك» ج ش س ديرەكتورى مانات كاربوزوۆ ءوز كەزەگىندە مەملەكەتتىك قولداۋ شارالارى اياسىندا شارۋاشىلىق ءۇش جىل ىشىندە مال باسىن ەكى ەسەگە - 1,5 مىڭ باسقا دەيىن ارتتىرعانىن جەتكىزدى.
شارۋالارمەن كەزدەسۋ بارىسىندا ولجاس بەكتەنوۆ ۇكىمەت اگروونەركاسىپ كەشەنىن قولداۋ بويىنشا جۇيەلى جۇمىس جۇرگىزىپ جاتقانىن ايتتى.
- سىزدەر بىلەسىزدەر، سوڭعى جىلدارى پرەزيدەنتتىڭ تاپسىرماسىنا سايكەس ءبىز اۋىل شارۋاشىلىعى سالاسىنا كوپ كوڭىل بولۋدەمىز. بىلتىردان بەرى قوماقتى قارجى قۇيىلدى. سالىستىراتىن بولساق، 2022-جىلعا دەيىن قارجىلاندىرۋ 70 ميلليارد تەڭگەدەن اسپاعان. بيىل 700 ميلليارد تەڭگە ينۆەستيتسيا سالىپ جاتىرمىز. مەملەكەتتىك قولداۋ 10 ەسە ءوستى. كورسەتكىشتەرگە قاراساق تا، اۋىل شارۋاشىلىعىنىڭ جالپى ىشكى ءونىمى شامامەن %4 دى قۇرايدى. كوپ ەمەس، ءبىراق بۇل ۇلتتىق قاۋىپسىزدىك ماسەلەسى. ءبىز ءوزىمىزدى نەگىزگى ازىق-تۇلىك تۇرلەرىمەن قامتاماسىز ەتۋىمىز كەرەك. كەلەسى جىلى قولداۋ كولەمىن ارتتىرامىز، - دەپ اتاپ ءوتتى ولجاس بەكتەنوۆ.
سونىمەن قاتار اۋىلدىق اۋماقتاردى دامىتۋدىڭ جانە بيزنەستىڭ الەۋمەتتىك جاۋاپكەرشىلىگىنىڭ ماڭىزدىلىعى اتاپ ءوتىلدى. مەملەكەتتىڭ قولداۋىنا يە بولىپ وتىرعان اۋىل شارۋاشىلىعى تاۋارىن وندىرۋشىلەر ءوز كەزەگىندە اۋىلدا ءومىر ءسۇرۋ ساپاسىن ارتتىرۋ ءۇشىن ءوز ۇلەستەرىن قوسىپ، بارلىق قاجەتتى جاعدايلاردى جاساۋعا ءتيىس.
وسىعان دەيىن قوستاناي وبلىسىندا كيىكتەردىڭ كوكتەمگى اۋە ساناعى جۇرگىزىلگەنىن جازدىق.
