ەلىمىزدىڭ ءتورت وڭىرىنە سۋ تاسقىنى مەن قار كوشكىنى قاۋپى ءتونىپ تۇر

جامبىل وبلىسى

5- 7-ءساۋىر كۇندەرى جامبىل وبلىسىنىڭ تاۋلى جانە تاۋ بوكتەرىندەگى اۋداندارىندا قاتتى جاڭبىر جاۋۋى ىقتيمال، سوعان بايلانىستى بەتكەيلىك اعىن قالىپتاسىپ، وزەندەردەگى سۋ دەڭگەيى كوتەرىلەدى دەپ كۇتىلەدى.

سۋ دەڭگەيى قاۋىپتى مەجەدەن اسقان جاعدايدا وزەن جايىلمالارىندا ورنالاسقان ەلدى مەكەندەردى، شارۋاشىلىق قۇرىلىستاردى جانە جەرگىلىكتى ماڭىزى بار جولداردى سۋ باسۋ قاۋپى ساقتالادى.

قوستاناي وبلىسى

4- 7 ءساۋىر ارالىعىندا وبلىس اۋماعىندا جاڭبىر تۇرىندەگى جاۋىن-شاشىن، كەي جەرلەردە قاتتى جاۋىن (وبلىستىڭ وڭتۇستىك- باتىسى، باتىسى جانە سولتۇستىك- باتىسى) كۇتىلەدى.

وسىعان بايلانىستى سۋ مولشەرىنىڭ ارتۋى، قارقىندى جەرۇستى اعىنىنىڭ قالىپتاسۋى جانە قاۋىپتى گيدرولوگيالىق قۇبىلىستاردىڭ دامۋى بولجانىپ وتىر. اتاپ ايتقاندا، اۋلالاردى جانە شارۋاشىلىق نىساندارىن سۋ باسۋ، جەرگىلىكتى ماڭىزى بار اۆتوجولداردىڭ كەي ۋچاسكەلەرىنەن سۋدىڭ اسۋى، سونداي- اق ويپاڭ جەرلەردە سۋ جينالۋى مۇمكىن.

الماتى قالاسى جانە الماتى وبلىسى

6- 10-ءساۋىر ارالىعىندا قار جامىلعىسىنىڭ قالىڭ بولۋىنا جانە جىلىمىق اياسىندا جاۋىن- شاشىن كۇتىلۋىنە بايلانىستى ۇلكەن الماتى جانە كىشى الماتى وزەندەرى الاپتارىندا قار كوشكىنى قاۋپى ساقتالادى.

ماماندار ىقتيمال كوشكىندى قوزدىرىپ الماۋ ءۇشىن قار باسقان بەتكەيلەرگە شىقپاۋعا كەڭەس بەرەدى. تاۋلى ايماقتاردا اسا ساق بولعان ءجون.

اقمولا وبلىسى

6- 8 ءساۋىر ارالىعىندا اۋا تەمپەراتۋراسىنىڭ وڭ كورسەتكىشتە ساقتالۋىنا بايلانىستى (كۇندىز 18+…23+ گرادۋس، تۇندە 4+…9+ گرادۋس) وبلىستىڭ وڭتۇستىك جانە ورتالىق بولىكتەرىندە وزەندەردىڭ مۇزى تولىق سوگىلىپ، سەڭ جۇرەدى دەپ كۇتىلەدى.

وسىعان بايلانىستى وزەندەردەگى سۋ دەڭگەيى كوتەرىلىپ، قاۋىپتى مەجەدەن اسۋى مۇمكىن. سونىڭ سالدارىنان ەرىگەن قار سۋى اۆتوجولداردى، ەلدى مەكەندەردى، تۇرعىن ۇيلەر مەن شارۋاشىلىق قۇرىلىستاردى باسۋى ىقتيمال.

ەسكە سالا كەتەيىك، 6-ساۋىرگە قاراعان ءتۇنى اقمولا وبلىسىندا «شوپتىكول» بوگەتى بۇزىلىپ، جەدەل شتاب قۇرىلدى.

سونىمەن قاتار استانا - قورعالجىن رەسپۋبليكالىق اۆتوجولىنىڭ 75-شاقىرىمىنداعى ۋچاسكەنى سۋ باسۋدان امان الىپ قالۋ مۇمكىن بولدى.

قازىرگى ۋاقىتتا توتەنشە جاعدايلار مينيسترلىگى، جەرگىلىكتى اتقارۋشى ورگاندار جانە تۇرعىندار ەرىگەن قار سۋىن دالا ايماعىنا بۇرۋ ءۇشىن بوگەت دەڭگەيىن كوتەرۋ جۇمىستارىن جۇرگىزىپ جاتىر.