ەلىمىزدىڭ 16 وڭىرىندە اۋا رايىنا بايلانىستى ەسكەرتۋ جاريالاندى

استانا. KAZINFORM - «قازگيدرومەت» ر م ك ەلىمىزدىڭ بارلىق وڭىرىندە اۋا رايىنا بايلانىستى ەسكەرتۋ جاريالادى.

2-قىركۇيەكتە قازاقستان اۋماعىنىڭ باسىم بولىگىندە اتموسفەرالىق فرونتالدى بولىمدەر ءالى دە اۋا-رايىنىڭ تۇراقسىز سيپاتىن ساقتايدى: نايزاعايمەن جاڭبىر جاۋادى، ەلدىڭ شىعىسىندا، وڭتۇستىك-شىعىسىندا قاتتى جاڭبىر، بۇرشاق، داۋىل كۇتىلەدى. رەسپۋبليكانىڭ باتىسىندا، سولتۇستىك- باتىسىندا، سولتۇستىگىندە انتيتسيكلون سىلەمىنىڭ اسەرىنەن-جاۋىن-شاشىنسىز اۋا رايى بولادى. رەسپۋبليكا بويىنشا جەلدىڭ كۇشەيۋى كۇتىلەدى. ق ر سولتۇستىك-باتىسىندا، سولتۇستىگىندە تۇنگى جانە تاڭەرتەڭگى ساعاتتاردا تۇمان بولادى. ەلدىڭ وڭتۇستىگىندە شاڭدى داۋىل كۇتىلەدى.

سولتۇستىك قازاقستان وبلىسىنىڭ سولتۇستىگىندە، اقمولا، قاراعاندى وبلىستارىنىڭ سولتۇستىگىندە، شىعىسىندا توپىراق بەتىندە 2 گرادۋس اياز كۇتىلەدى.

اباي، ۇلىتاۋ، جەتىسۋ وبلىستارىندا، باتىس قازاقستان وبلىسىنىڭ باتىسىندا، اتىراۋ وبلىسىنىڭ ورتالىعىندا، شىعىسىندا، ماڭعىستاۋ وبلىسىنىڭ سولتۇستىك- شىعىسىندا، ورتالىعىندا، قىزىلوردا وبلىسىنىڭ سولتۇستىك- باتىسىندا، ورتالىعىندا، اقتوبە وبلىسىنىڭ وڭتۇستىگىندە، باتىسىندا، ورتالىعىندا، الماتى وبلىسىنىڭ سولتۇستىگىندە، ورتالىعىندا، شىعىس قازاقستان وبلىسىنىڭ باتىسىندا، قاراعاندى وبلىسىنىڭ باتىسىندا، شىعىسىندا، قوستاناي وبلىسىنىڭ وڭتۇستىگىندە جوعارى ءورت قاۋىپى ساقتالادى.

قىزىلوردا، تۇركىستان، جامبىل، اتىراۋ، ماڭعىستاۋ، باتىس قازاقستان وبلىستارىندا، ۇلىتاۋ وبلىسىنىڭ وڭتۇستىگىندە، اباي وبلىسىنىڭ باتىسىندا، سولتۇستىك-باتىسىندا، وڭتۇستىگىندە، ورتالىعىندا توتەنشە ءورت قاۋپى ساقتالادى.