ەلىمىزدە ەڭ تومەنگى جالاقىنى ەسەپتەۋ ادىستەمەسى وزگەرۋى مۇمكىن

  استانا. KAZINFORM -قازاقستاندا ەڭ تومەنگى جالاقى جاڭا ءادىس-تاسىلمەن ەسەپتەلۋى مۇمكىن. بۇل تۋرالى ق ر كاسىپوداقتار فەدەراتسياسى ءتوراعاسىنىڭ ورىنباسارى مۇحتار تىنىكەيەۆ ءمالىم ەتتى.

«ەگەر جۇمىس بەرۋشىلەر جالاقىنى %7-10 عا كوتەرەمىز دەسە، بۇل شىن مانىندە يندەكستەۋ، ول ايلىقتى كوتەرۋ دەگەن ءسوز ەمەس. كاسىپوداقتار فەدەراتسياسى يندەكستەۋدى زاڭنامالىق تۇرعىدان رەتتەۋدى تالاپ ەتەدى. بۇل الەمدىك تاجىريبە. ەكىنشىدەن، ەڭ تومەنگى جالاقىنى ەسەپتەۋ ادىستەمەسىنىڭ بولۋىن ءبىز تالاپ ەتكەنبىز. بىزدە ەڭ تومەنگى جالاقى ۇزاق ۋاقىت بويى 24 مىڭ تەڭگە، 2020 -جىلدان باستاپ 42 مىڭ تەڭگە، سودان كەيىن 60 مىڭ تەڭگە بولدى»، - دەدى مۇحتار تىنىكەيەۆ ەڭبەك قۇقىعى ماسەلەلەرىنە ارنالعان دوڭگەلەك ۇستەل بارىسىندا.

سپيكەردىڭ مالىمدەۋىنشە، ەلىمىزدە ەڭ تومەنگى جالاقىنى ەسەپتەۋ ادىستەمەسى بولعان جوق.

«حالىقارالىق ەڭبەك ۇيىمى ماقۇلداعان يندەكس بار. مىسالى، ۇكىمەت قازاقستاندا ورتاشا جالاقى 300 مىڭ تەڭگە دەپ مالىمدەسە، وندا ەڭ تومەنگى جالاقى وسى سومانىڭ %50 ى بولۋى ءتيىس. وسى ورايدا ءبىزدىڭ وتىنىشىمىزدەن كەيىن ۇكىمەت ەڭ تومەنگى جالاقى ادىستەمەسىن ەسەپتەۋمەن اينالىساتىن دۇنيەجۇزىلىك بانكتى شاقىردى. مەنىڭ ويىمشا، قازىر بۇل جۇمىس اياقتالۋعا جاقىن جانە جاقىن ارادا ۇكىمەت جاڭا ءادىستى قوعامعا ۇسىنادى»، - دەپ تولىقتىردى. م. تىنىكەيەۆ.

بۇگىن استانادا «ەڭبەك قۇقىعىنىڭ وزەكتى ماسەلەلەرى. ەڭبەك قۇقىقتارى جانە ولاردى قورعاۋ: زاڭ جانە پراكتيكا» تاقىرىبىندا دوڭگەلەك ۇستەل ءوتتى. شاراعا پارلامەنت دەپۋتاتتارى، عالىمدار مەن ساراپشىلار قاتىستى.