ەلىمىزدە دەموگراف مامانداردى دايارلاۋ ۇسىنىلدى

استانا. KAZINFORM - سەنات ءتوراعاسىنىڭ كەڭەسشىسى جۇلدىزاي ىسقاقوۆا قازاقستاننىڭ جوعارى وقۋ ورىندارىندا دەموگرافيا بويىنشا جاڭا ءبىلىم بەرۋ باعدارلاماسىن اشۋدى ۇسىندى.

سەنات ءتوراعاسى كەڭەسشىسىنىڭ ايتۋىنشا، ەلىمىزدە دەموگرافيالىق دامۋ تۇجىرىمداماسىن قابىلداۋ قاجەت.

- ۇلتتىق ەكونوميكا مينيسترلىگىنىڭ جاۋابىندا بۇل قۇجاتتى قابىلداۋ ورىنسىز ەكەنى ايتىلعان. سەبەبى مەملەكەتتىك جوسپارلاۋ جۇيەسى تەڭگەرىمدى، قانداستاردى قابىلداۋ ماسەلەلەرى رەتتەلگەن، ال تۋۋدىڭ ءوسۋ ءۇردىسى بايقالادى. الايدا، مەنىڭ ويىمشا، 2021 -جىلدان باستاپ تۋۋ كورسەتكىشى كەرىسىنشە تومەندەپ جاتىر. سونداي-اق وڭىرلىك دامۋدا ايتارلىقتاي تەڭگەرىمسىزدىك بار. سوندىقتان، كوپتەگەن ەلدىڭ تاجىريبەسىنە سۇيەنە وتىرىپ، بىزگە دە وسى تۇجىرىمدامانى قاراستىرۋ قاجەت دەپ سانايمىن، - دەدى جۇلدىزاي ىسقاقوۆا سەناتتىڭ الەۋمەتتىك-مادەني دامۋ جانە عىلىم كوميتەتىندە وتكەن جيىندا.

بۇگىندە عىلىم جانە جوعارى ءبىلىم مينيسترلىگىنىڭ مالىمەتىنە سايكەس، «دەموگرافيا» ماماندىعى «تاريح» ءبىلىم بەرۋ باعدارلامالارى توبىنىڭ اياسىندا وقىتىلادى.

- ءبىراق، تاريح - وتكەندى زەرتتەۋ، ال دەموگرافيا - بولاشاققا باعىتتالعان عىلىم. ءبىز جوعارى وقۋ ورىندارىندا جاڭا باعدارلامانى اشۋ وڭاي ەمەس ەكەنىن تۇسىنەمىز. ونىڭ ۇستىنە، كوپتەگەن ۋنيۆەرسيتەت ك ە ا ق (كوممەرتسيالىق ەمەس اكسيونەرلىك قوعام) مارتەبەسىنە يە بولعاندىقتان، وزدەرى شەشىم قابىلدايدى. دەگەنمەن مەملەكەتتىك قولداۋ كورسەتۋدى سۇرايمىز، - دەدى سەنات سپيكەرىنىڭ كەڭەسشىسى.

ونىڭ ايتۋىنشا، وتكەن جىلى ەلورداداعى ل. گۋميلەۆ اتىنداعى ەۋرازيا ۇلتتىق ۋنيۆەرسيتەتى رەسەيدىڭ جوعارى ەكونوميكا مەكتەبى وكىلدەرىمەن كەزدەسۋ وتكىزىپ، اتالعان باعىتتى قولعا الۋ مۇمكىندىگىن تالقىلاعان.

- عىلىم جانە جوعارى ءبىلىم مينيسترلىگى بىزگە جاڭا باعىت اشۋ وڭاي ەمەس ەكەنىن ايتتى. سوندىقتان قازاقستان دەموگرافتارى قاۋىمداستىعى، ايەلدەر ىستەرى جونىندەگى ۇلتتىق كوميسسيا جانە ساراپشىلار قاۋىمداستىعىمەن قوسىمشا كەزدەسۋ وتكىزۋدى سۇرايمىز. قازىر الەۋمەتتانۋشىلار دەموگرافيالىق باعىتتاردى زەرتتەپ جاتىر، سول سياقتى پيلوتتىق جوبا رەتىندە ەۋرازيا ۋنيۆەرسيتەتىندە بولەك ماماندىق اشۋ مۇمكىندىگى بار. ول ءۇشىن مەملەكەتتىك گرانتتار قاجەت، شەشىلۋى ءتيىس كوپتەگەن ماسەلە بار، - دەپ قورىتىندىلادى جۇلدىزاي ىسقاقوۆا.

ايتا كەتسەك، سەناتتىڭ الەۋمەتتىك-مادەني دامۋ جانە عىلىم كوميتەتىندە «دەموگرافيالىق ءوسۋ - ۇلتتىڭ ستراتەگيالىق ارتىقشىلىعىنىڭ نەگىزى» تاقىرىبىندا بىلتىر وتكەن ۇكىمەت ساعاتىندا قابىلدانعان ۇسىنىمداردى ىسكە اسىرۋ قورىتىندىلارىن تالقىلاۋعا ارنالعان كەڭەيتىلگەن وتىرىس ءوتتى.

سونداي- اق اتالعان جيىندا قازاقستاندا دەموگرافيا جانە كوشى-قون سالاسىن رەتتەيتىن مەملەكەتتىك ورگان قۇرۋ ۇسىنىلدى.

ودان بولەك، قازاقستاندىقتاردىڭ سولتۇستىك وڭىرلەردەن كوشۋى جالعاسىپ جاتقانى ايتىلدى.