ەلىمىزدە ءدارى-دارمەك باعاسى قانشالىقتى ءوستى
استانا. KAZINFORM - ق ر دەنساۋلىق ساقتاۋ مينيسترلىگىنىڭ سانيتاريالىق-ەپيدەميولوگيالىق باقىلاۋ كوميتەتى ءدارى باعاسىن زاڭسىز كوتەرىپ ساۋدالاعان ءدارىحانالار انىقتالعانىن ءمالىم ەتتى.
«2023 -جىلمەن سالىستىرعاندا، قازىرگى كەزدە دارىلىك زاتتارعا باعانىڭ ءوسۋى بايقالدى (%13)، ءبىراق ۋاكىلەتتى ورگان بەكىتكەن شەكتى باعادان اسپادى. كەيبىر دارىلىك زاتتارعا باعانىڭ ماۋسىمدىق ءوسۋى انىقتالعان. دارىلىك زاتتار باعاسىنىڭ ءوسۋى شيكىزات، تاسىمالداۋ قۇنىنىڭ وسۋىنە جانە ينفلياتسياعا تىكەلەي تاۋەلدى. دەگەنمەن كەيبىر دارىلىك زاتتارعا باعانىڭ تومەندەگەنىن ايتا كەتۋ كەرەك»، - دەلىنگەن مينيسترلىكتىڭ Kazinform اگەنتتىگىنە بەرگەن جاۋابىندا.
«حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكسىنە سايكەس، ۋاكىلەتتى ورگان جىلىنا 2 رەت بولشەك جانە كوتەرمە ساۋدادا وتكىزۋگە ارنالعان دارىلىك زاتتىڭ ساۋدالىق اتاۋىنا شەكتى باعانى بەكىتەدى. قازىر ق ر دەنساۋلىق ساقتاۋ ءمينيسترىنىڭ 2023 -جىلعى 7-تامىزداعى № 465-بۇيرىعىمەن 6890 دارىلىك زاتتىڭ ساۋدالىق اتاۋىنا شەكتى باعا قويىلدى. ق ر اكىمشىلىك قۇقىق بۇزۋشىلىق تۋرالى كودەكسىنىڭ 426-بابىنا سايكەس، ءدارى-دارمەكتى بەكىتىلگەن شەكتى باعادان اسىرا ساتقانى ءۇشىن جاۋاپكەرشىلىك كوزدەلگەن.
«كوتەرمە-بولشەك ساۋدا جەلىسىندە 2024 -جىلدىڭ باسىنان بەرى ءدارى- دارمەكتى شەكتى باعادان اسىرا ساتۋ بويىنشا 12 فاكتى انىقتالدى، 2,1 ميلليون تەڭگە سوماسىندا ايىپپۇل سالىندى. سونىمەن قاتار شەكتى باعادان اسىرا ساتۋ فاكتىسى انىقتالعان جاعدايدا، مەديتسينالىق جانە فارماتسيەۆتيكالىق باقىلاۋ كوميتەتىنىڭ اۋماقتىق دەپارتامەنتتەرىنە دالەلدى قۇجاتتارمەن (ءدارى-دارمەك جانە ساتۋ تۇبىرتەگىمەن) نەمەسە DARIKZ موبيلدى قوسىمشاسى ارقىلى ءوتىنىش قالدىرۋعا بولادى»، - دەپ اتالىپ وتكەن ۆەدومستۆو اقپاراتىندا.
بۇدان بۇرىن حابارلانعانداي، ءبىرىنشى جارتىجىلدىقتىڭ قورىتىندىسى بويىنشا قازاقستاندا 87,3 ميلليارد تەڭگەنىڭ دارىلىك زاتتارى ءوندىرىلدى، بۇل 2023 -جىلدىڭ ءبىرىنشى جارتىجىلدىعىمەن سالىستىرعاندا %20,1 عا ارتىق.
ق ر دەنساۋلىق ساقتاۋ مينيسترلىگى ازاماتتارعا ءدارى-دارمەكتىڭ شەكتى بولشەك ساۋدا باعاسىن باقىلاۋ ءۇشىن Dari.kz موبيلدىك قوسىمشاسىن پايدالانۋدى ۇسىندى.
