ەلىمىزدە بەنزين مەن ديزەل باعاسىن مەملەكەت رەتتەمەۋى مۇمكىن
استانا. KAZINFORM - ەنەرگەتيكا مينيسترلىگى ەلىمىزدە بەنزين مەن ديزەل قۇنى الەمدەگى ەڭ تومەن باعالاردىڭ ءبىرى بولىپ قالا بەرەدى دەپ سەندىرىپ وتىر. ءبىراق بۇل جاعداي كورشى ەلدەرمەن سالىستىرعاندا ايتارلىقتاي باعا الشاقتىعىنا اكەلەدى.

- مىسالى، قازاقستاندا اي-92 بەنزينىنىڭ باعاسى ليترىنە - 205 تەڭگە، رەسەي فەدەراتسياسىندا - 288 تەڭگە، قىرعىزستاندا - 385 تەڭگە، وزبەكستاندا 489 تەڭگەنى قۇرايدى. قازاقستاندا ديزەل وتىنى ليترىنە - 295 تەڭگە، رەسەي فەدەراتسياسىندا - 355 تەڭگە، قىرعىزستاندا - 427 تەڭگە، وزبەكستاندا 528 تەڭگە تۇرادى. وسىلايشا، اي-92 بەنزينى باعاسىنداعى ايىرماشىلىق %40 دان %138 عا دەيىن، ال ديزەل قۇنى %20 دان %79 عا دەيىن جەتەدى. بۇل جانار-جاعارماي تاپشىلىعىن تۋدىرىپ، زاڭسىز شەتەلگە اكەتۋ قاۋپىن تۋدىرادى، - دەلىنگەن حابارلامادا.
وسى ورايدا ەنەرگەتيكا مينيسترلىگى باعا بەلگىلەۋدىڭ تۇراقتى مودەلى ساياساتىنا كوشىپ جاتىر.
- ول سۇرانىس پەن ۇسىنىس اراسىنداعى نارىقتىق تەڭگەرىمدى قۇرۋعا، جانار-جاعارماي تاپشىلىعىن جويۋعا، مۇناي وڭدەۋ سالاسىن جاڭعىرتۋدى ىنتالاندىرۋعا، جاڭا جۇمىس ورىندارىن قۇرۋعا جانە ۇزاق مەرزىمدى ينۆەستيتسيالاردى تارتۋعا باعىتتالعان. بۇل ساياساتتىڭ نەگىزگى پرينتسيپتەرى كەز كەلگەن وزگەرىستى بولجاۋعا بولاتىندىعىن بىلدىرەدى. ازاماتتاردىڭ مۇددەسىن قورعاۋ ءۇشىن الەۋمەتتىك قولداۋ شارالارىن كورسەتۋ جالعاسادى، ال اۋىل شارۋاشىلىعى وندىرۋشىلەرى اشىق ءارى قولايلى باعا بويىنشا ديزەل وتىنىنا كەپىلدى تۇردە قول جەتكىزە الادى، - دەپ ءتۇسىندىردى ۆەدومستۆودان.
سونداي-اق ەنەرگەتيكا مينيسترلىگى مۇددەلى ورگاندارمەن بىرلەسىپ نارىقتى باقىلاۋدى كۇشەيتەدى، زاڭنامانىڭ ورىندالۋىن جانە جانار-جاعارمايدىڭ ىشكى نارىققا ۇزدىكسىز جەتكىزىلۋىن قامتاماسىز ەتپەك.
بىلتىر ەنەرگەتيكا مينيسترلىگى بارلىق ايماقتا جانارماي قورى ۇزدىكسىز تولىقتىرىلىپ وتىر دەگەن مالىمدەمە جاسادى.