ەلىمىزدە ۋاقىت بەلدەۋى قايتا وزگەرۋى مۇمكىن بە

استانا. KAZINFORM - بيىل ەلىمىز ءبىرىڭعاي ۋاقىت بەلدەۋىنە كوشتى. وزگەرىسكە قارسى شىققان قازاقستاندىقتار بۇرىن قولدانىستا بولعان ۋاقىت بەلدەۋىن قايتارۋ جونىندەگى پەتيتسيا جاريالادى.

ساۋدا جانە ينتەگراتسيا ۆيتسە- ءمينيسترى قايرات تورەبايەۆ پەتيتسياعا قاتىستى تۇسىنىك بەردى.

«پەتيتسيا بيىل 19-ساۋىردە باستالدى. قازىر 1 مىڭنان استام ادام داۋىس بەرگەن، ءبىز ەسكەرتۋلەردى مۇقيات باقىلايمىز. رەگلامەنت بويىنشا ءبىز الدىمەن پەتيتسيانىڭ ناتيجەسىن كۇتەمىز، سودان كەيىن ونى قاراستىرامىز. ازىرگە ۋاقىت بەلدەۋىنىڭ وزگەرۋىنە قاتىستى ايتۋعا ەرتە. قازىر مينيسترلىكتىڭ ۇستانىمىن ايتۋ مۇمكىن ەمەس. ءبىز باسقا مەملەكەتتىك ورگاندارمەن بىرلەسىپ القالى تۇردە قابىلداعان رەسمي ۇستانىمدى ۇستانامىز»، - دەدى قايرات تورەبايەۆ ماجىلىستەگى بريفينگىدە.

ونىڭ ايتۋىنشا، پەتيتسياعا داۋىس بەرۋ ناتيجەسى بەلگىلى بولعان سوڭ ماسەلەگە قايتا قارالادى.

«بيىل جەلتوقساندا پەتيتسيا بەرۋ مەرزىمى اياقتالعاننان كەيىن بۇل ماسەلەگە قايتا ورالامىز. بارلىق مەملەكەتتىك ورگاندارمەن قارايتىن بولامىز. ەندى ءبىز جەلتوقسان ايىندا شەشىلەتىن ماسەلەنى گيپوتەتيكالىق تۇردە تالقىلايتىن بولامىز. 50 مىڭ داۋىسقا جەتكەن جاعدايدا، ماسەلە ۇكىمەت ىشىندە قايتادان ىسكە قوسىلادى»، - دەپ تولىقتىردى ۆيتسە- مينيستر.

ەسكە ساالا كەتەيىك، 1-ناۋرىزدان باستاپ قازاقستاندا ۋاقىت ءبىر ساعات ارتقا جىلجىدى.