ەلىمىزدە اپاتتى وقيعالاردان باسپانانى مىندەتتى ساقتاندىرۋ ەنگىزىلمەك

استانا. KAZINFORM - ەلىمىزدە اپاتتى وقيعالاردان باسپانانى مىندەتتى ساقتاندىرۋ ەنگىزىلۋى مۇمكىن. بۇگىندە قارجى نارىعىن رەتتەۋ جانە دامىتۋ اگەنتتىگى ونىڭ ءتۇرلى نۇسقاسىن قاراستىرىپ جاتىر.

«قازىرگى ۋاقىتتا اگەنتتىك قازاقستان ءۇشىن اپات تاۋەكەلدەرىنەن ساقتاندىرۋدىڭ نەعۇرلىم قولايلى مودەلىن تاڭداۋ ماقساتىندا مەملەكەتتىك ورگاندارمەن جانە حالىقارالىق ساراپشىلارمەن بىرلەسكەن جۇمىس جۇرگىزىپ جاتىر. مودەلدىڭ ءارتۇرلى نۇسقاسى قاراستىرىلۋدا جانە قاراستىرىلعان نۇسقالاردىڭ ءبىرى ازاماتتاردىڭ اتىنا تىركەلگەن تۇرعىن ءۇيدى اپات تاۋەكەلدەرىنەن مىندەتتى ساقتاندىرۋدى ەنگىزۋ بولماق»، - دەلىنگەن اگەنتتىكتىڭ رەسمي ساۋالىنا بەرگەن ۆەدومستۆو جاۋابىندا.

اتالعان اگەنتتىك وسى جىلدىڭ سوڭىنا دەيىن ەل ازاماتتارىنىڭ باسپاناسىن ساقتاندىرۋدىڭ وڭتايلى مودەلىن ايقىنداپ الماق. سودان كەيىن ونى قوعام تالقىسىنا شىعارۋدى كوزدەپ وتىر. ايتا كەتەرلىگى، 2024-جىلدىڭ 19-تامىزىنا دەيىنگى دەرەككە قاراعاندا، ەلىمىزدىڭ ساقتاندىرۋ ۇيىمدارىنا سۋ تاسقىنىنا بايلانىستى وقيعالاردان ساقتاندىرۋ تۋرالى 134 ءوتىنىم كەلىپ تۇسكەن. ونىڭ 120 سى - جەكە تۇلعالاردان، ال 44 ءى - زاڭدى تۇلعالاردان.

«بۇگىندە ساقتاندىرۋ تولەمدەرىنە مالىمدەلگەن جالپى سوما 907 ميلليون تەڭگەنى قۇرايدى. ونىڭ 394,2 ميلليون تەڭگەسى - جەكە تۇلعالاردار، 512,5 ميلليون تەڭگەسى - زاڭدى تۇلعالاردان. قالعان وتىنىمدەردى ساقتاندىرۋ كومپانيالارى قاراستىرىپ جاتىر»، - دەپ ناقتىلايدى اگەنتتىكتەن.

ەلىمىزدە جىلجىمايتىن مۇلىكتى ساقتاندىرۋ ەرىكتى تۇردە جۇرگىزىلمەك. مۇنداي ساقتاندىرۋ قۇقىعى 24 ۇيىمنىڭ 15 ىندە بار.

ادەتتە مۇلىكتى ەرىكتى ساقتاندىرۋ شارتتارى جەر سىلكىنىسى، سۋ تاسقىنى، لاي كوشكىن، داۋىل جانە باسقا دا تابيعي توسىن جايتتاردى قوسا العانداعى اپاتتاردان بولاتىن تاۋەكەلدەردى جابادى. مۇنداي ءپوليستىڭ قۇنى ءارتۇرلى جانە جىلجىمايتىن مۇلىكتىڭ ورنالاسقان جەرى، ونىڭ قۇنى، جابىندى مولشەرى مەن ءتۇرى جانە ساقتاندىرۋ جاعدايىنىڭ تاريحى سىندى كوپتەگەن فاكتورعا بايلانىستى بولۋى مۇمكىن.

ق ن ر د ا پاتەردى نەمەسە جەكە ءۇيدى ساقتاندىرۋدىڭ ورتاشا قۇنى بىرنەشە مىڭنان ونداعان مىڭ تەڭگەگە دەيىن بولۋى مۇمكىن ەكەندىگىن العا تارتادى. ال جالپى ساقتاندىرۋ سوماسىن ساقتاندىرۋ كومپانياسىنان انىقتاۋ قاجەت.