ەلىمىزدە 25 مىڭ شاقىرىم جول قىسقى كۇتىممەن قامتىلعان

قىسقى كۇتىممەن قامتىلعان اۆتوجولداردىڭ جالپى ۇزىندىعى حالىقارالىق جانە رەسپۋبليكالىق تاس جولداردى قوسا العاندا 25 مىڭ شاقىرىمدى قۇرايدى، دەپ حابارلايدى Kazinform.

اتالعان كولەمنىڭ 21 مىڭ شاقىرىمىنا «كاجسەرۆيس» ج ش س كۇشتەرى، ال تاعى 4 مىڭ شاقىرىمىنا رەكونسترۋكتسيالاۋ جانە كۇردەلى جوندەۋ وبەكتىلەرىندە مەردىگەرلىك ۇيىمدار قىزمەت كورسەتەدى.

«قىسقى كۇتىمدى قامتاماسىز ەتۋ ءۇشىن 1033 بىرلىك قار تازالاۋ تەحنيكاسى جۇمىلدىرىلعان، سونداي-اق قىسقى جاعدايلاردا سەنىمدىلىك پەن تيىمدىلىكتى قامتاماسىز ەتۋ ءۇشىن شامامەن 218 بىرلىك قوسىمشا تەحنيكا جالعا الىندى.

بۇگىنگى تاڭدا 515 وندىرىستىك بازا ساقاداي ساي، ونىڭ ىشىندە جىلىتۋ پۋنكتتەرى، قازاندىقتار، گاراجدار، اۆتوتۇراقتار مەن قويمالار پايدالانۋعا دايىن»، - دەپ جازدى كولىك مينيسترلىگى.

ەلىمىز بويىنشا بارلىق قاجەتتى جابدىقتارمەن قامتىلعان 121 -جىلىتۋ پۋنكتى بار. قيىن جاعدايعا تاپ بولعان پايدالانۋشىلار ءۇشىن العاشقى باسپانا. بۇل پۋنكتتەر وزدەرىنىڭ اس ۇيىمەن، پايدالانۋشىلارعا ارنالعان دەمالىس بولمەلەرىمەن جانە كولىككە ارنالعان جىلى بوكستارمەن جابدىقتالعان.

«سوندىقتان جولدا «جول- پايدالانۋ ۋچاسكەسى» دەگەن جازۋى بار ماڭدايشالاردى قاداعالاۋعا كەڭەس بەرەمىز.

قىسقى كۇتىمنىڭ اجىراماس بولىگى كوكتايعاققا قارسى ماتەريالداردى دايىنداۋ بولىپ تابىلادى. قازىرگى ۋاقىتتا 26 مىڭ توننا تۇز، 94 مىڭ م3 قۇم، 33 مىڭ م3 ۇنتاق، 778 توننا رەاگەنت جانە 25 مىڭ م3 قۇم- تۇز قوسپاسى بار»، - دەلىنگەن حابارلامادا.

اعاشتاردى كەسۋ، شوپتەردى شابۋ، «جىلدامدىقتى شەكتەۋ»، «تايعاق جول» ۋاقىتشا جول بەلگىلەرىن جانە قاردان قورعاۋ قالقاندارىن ورناتۋ جۇمىستارى جالعاسۋدا. قارلى ۋچاسكەلەردىڭ جالپى ۇزىندىعى 2,5 مىڭ شاقىرىمدى قۇرايدى.

سونداي-اق، ەگەر ءسىز جولدا قالساڭىز جانە قوڭىراۋ شالۋ مۇمكىندىگى بولسا، 1403 ءنومىرى بويىنشا تاۋلىك بويى جۇمىس ىستەيتىن call-ورتالىققا حابارلاسا الاتىنىڭىزدى ەسكە سالامىز.