ەلىمە تاريحي جۇلدە سىيلاعانىم ءۇشىن باقىتتىمىن - ناريمان قۇربانوۆ
پاريج. KAZINFORM - فرانسيا استاناسى پاريج قالاسىندا ءوتىپ جاتقان وليمپيادا ويىندارىندا سپورتتىق گيمناستيكادان كۇمىس مەدال جەڭىپ العان ناريمان قۇربانوۆ جەڭىستەن كەيىنگى اسەرىن ءبولىستى.
«سناريادقا كەلدىم دە، كومبيناتسيا باستالار الدىندا باسقا ەشتەڭە ويلاماي، تەك جاتتىعۋدى سوڭىنا دەيىن ورىندادىم. ءىس- قيمىلدىڭ ءبارىن قالاي ءساتتى ورىنداپ شىققانىمدى ءوزىم دە تۇسىنبەي تۇرمىن. ۇزاق جىلدار بويى جاساپ جۇرگەن كومبيناتسيانى اۆتوماتتى تۇردە ورىنداپ شىقتىم. قازىرگى وليمپيادالىق تسيكلدى ەسەپكە الار بولساق، مەن باعدارلاما سوڭىندا ءجيى قۇلايتىنمىن. بۇل مەنىڭ تەحنيكالىق نەمەسە تاكتيكالىق تۇرعىداعى كەمشىلىگىم ەمەس. پسيحولوگيالىق تۇرعىدان بەرىلىپ قوياتىنمىن. بۇگىن بار تاجىريبەمدى جيناپ، ەڭ ماڭىزدى تۋرنيردە بىلگەنىمدى تۇگەل ورىندادىم. سونىڭ ناتيجەسىندە وسىنداي جەتىستىككە قول جەتكىزىپ وتىرمىن»، - دەدى سپورتشى.
سونىمەن قاتار، پاريج وليمپياداسىنىڭ مەدالى العاش تانىستىرىلعاندا سونىڭ سۋرەتىن وزىنە ساقتاپ قويعانىن، سول مەدالعا قول جەتكىزۋدى ارمانداعانىن دا اتاپ ءوتتى.
«وسى ماۋسىمداعى ءاربىر جارىس الدىندا سول سۋرەتكە قاراپ، وسى مەدالدى قايتسەم دە الامىن دەپ الدىما ماقسات قويدىم. مىنە، بۇگىن سول ماقساتقا جەتتىم. جانە سول ماقساتقا جەتۋ ءۇشىن جۇمىس ىستەدىم. ەلىمىزدە بۇل مەدالدى قالاي قابىلدايتىنىن، حالىقتىڭ قالاي قۋانىپ جاتقانىن جاقسى تۇسىنەمىن. ءقازىر بۇل مەدالدى ۇستاعاننان بۇرىن ەلىمىزدىڭ قۋانىپ جاتقانىن كورۋ - مەن ءۇشىن باقىت. ەلىمە تاريحي جۇلدە سىيلاعانىم ءۇشىن باقتتىمىن»، - دەدى قۇربانوۆ.
ەستەرىڭىزگە سالا كەتەيىك، بۇگىن ەل قورجىنىنا پاريج وليمپياداسىنىڭ تۇڭعىش كۇمىس جۇلدەسى ءتۇستى.
ونى سپورتتىق گيمناستيكانىڭ ات سناريادىنداعى جاتتىعۋدا ناريمان قۇربانوۆ جەڭىپ الدى.
اۆتور
كۇنسۇلتان وتارباي
