لوس-اندجەلەس وليمپياداسىنا دايىندىقتى قازىردەن باستاۋ كەرەك - قۇدىرەت شاميەۆ
استانا. KAZINFORM - قازاقستان WT تاەكۆوندو فەدەراتسياسىنىڭ پرەزيدەنتى قۇدىرەت شاميەۆ kazinform تىلشىسىنە ارنايى سۇحبات بەرىپ، جاڭادان جاساقتالعان وتاندىق فەدەراتسيانىڭ از عانا مەرزىمدە ىستەگەن جۇمىستارىنا باعا بەردى.
سونداي-اق، ۇيىم باسشىسى وتاندىق تاەكۆوندونىڭ كوكجيەگىن كەڭەيتىپ، قازاق سپورتشىلارىن الەمدىك دەڭگەيدە تانىتۋ ءۇشىن قانداي جۇمىستار ىستەلىپ جاتقانىن ايتتى. بۇل تۋرالى ول قازاقستان ۇلتتىق قۇراماسىنىڭ بىرلەسكەن جاتتىعۋ جيىنىنا كەلگەندە مالىمدەدى.
- قۇدىرەت مىرزا، فەدەراتسيا جاڭادان قۇرىلعالى قانداي وزگەرىستەر بولىپ جاتىر؟ اتلەتتەردىڭ اياق الىسىن قالاي باقىلاپ وتىرسىز؟
- فەدەراتسيانىڭ قايتا جاساقتالعانىنا 5-6 ايدىڭ ءجۇزى بولدى. وسى ۋاقىت ارالىعىندا ءبىز ۇيىمعا تولىقتاي رەفورما جاساپ، كوماندانى قايتا جاساقتاپ، ۇلتتىق قۇراماعا باس باپكەر تاعايىندادىق. ودان بولەك، وتاندىق تاەكۆوندونىڭ اتاسى مۇستافا وزتۇرىك اتىنداعى تۋرنيردى ويداعىداي وتكىزدىك.
قازىر فەدەراتسيا، باپكەرەلەر قۇرامى مەن تورەشىلەر القاسىنىڭ قۇرامى تولىقتاي وزگەردى. بۇل ءبىزدىڭ جۇمىستىڭ باستاماسى عانا.
نەگىزگى ستراتەگيامىزدى قۇرعان كەزدە، الداعى جيىرما جىلدى قامتىدىق. ارينە، بۇل قىزمەتتى قانشا ۋاقىت اتقاراتىنىمىز بەلگىسىز. دەسە دە، ءبىز ناقتى جوسپار قۇرىپ، وزىمىزدەن كەيىن كەلەتىن كومانداعا دايىن جوبانى تاپسىرعىمىز كەلەدى. بۇگىندە لوس-اندجەلەس وليمپياداسىنا دايىندىق سيكلى باستالىپ كەتتى. جاڭادان تاعايىندالعان باس باپكەر ەسبول سۇلتانوۆتان ناتيجەلى جۇمىس كۇتەمىز. ال فەدەراتسيا باسشىسى رەتىندە، مەن سپورتشىلاردى تولىق قولداۋعا دايىنمىن. ايەلدەر كومانداسىندا تاجىريبەلى باپكەر ساۋلە سارداروۆا، يراننان كەلگەن وتە بىلىكتى مامان فاتيما سافارپۋر جۇمىس ىستەپ جاتىر.
شەتەلدەن باپكەر الدىراتىن كەزدە دە ءبىز جاقسى زەرتتەۋ جاسادىق. فاتيما حانىم ۇزاق جىل بويى يراننىڭ جاستار قۇراماسىن جاتتىقتىرىپ، الەمدىك جارىستاردا ۇزدىك ناتيجە كورسەتكەن. فەدەراتسيا رەتىندە سپورتشىلارعا جاعداي جاساۋ - بىزگە مىندەت. ماسساج جاسايتىن مامان، دارىگەر، پسيحولوگ بولسىن، بارىمەن جۇمىس ىستەلىپ جاتىر. قاجەتتى نارسەنىڭ بارلىعىن قامتىپ، بۇدان دا ۇلكەن دارەجەگە كوتەرۋگە تىرىسامىز. شەتەلدىك مامانداردى شاقىرۋعا، ولارمەن كەڭەس قۇرۋعا، تاجىريبە الماسۋعا نيەتتىمىز. ازىرگە ولارمەن كەلىسىم جۇرگىزىلىپ جاتىر.
- شەتەلدىك ماماندار تۋرالى ايتقاندا، بىزدە ورىندى سۇراق تۋىندايدى. بۇعان دەيىن تاەكۆوندودان قازاقستان قۇراماسىن كورەيالىق باپكەر جاتتىقتىردى. ەكى وليمپيادالىق سيكل بويى تىزگىندى ەشكىمگە بەرمەگەن، دەسە دە، ايتارلىقتاي ناتيجە كورسەتپەگەن ماماننىڭ قالاي تاڭدالعانى بىزگە جۇمباق. جالپى، شەتەلدەن باپكەر نەمەسە تورەشى شاقىرار كەزدە قاندايدا ءبىر مىندەتتەمەلەر قوياسىزدار ما؟
- البەتتە، ءبىز كەز كەلگەن ازاماتتى شاقىرماس بۇرىن قانشالىقتى مىقتى مامان ەكەنىنە، ونىڭ بىلىكتىلىگىنە، جەتىستىگىنىڭ قانداي دارەجەدە بولعانىن قاراۋعا مىندەتتىمىز. بۇل دا ءبىر ۇلكەن ءبىر امانات. نەگىزى، ۇستازدىق ەتۋ وڭاي ەمەس، ەكىنىڭ ءبىرىنىڭ قولىنان كەلە بەرمەيدى. بىلگەنىڭدى ۇيرەتۋ دە وڭاي ەمەس، ونى جان جاقتى ساراپتاپ قاراۋ كەرەك. ماسەلەن، بىزگە كەلگەن فاتيما حانىم - يرانداعى ۇزدىك باپكەرلەردىڭ ءبىرى. ءبىز ول كىسىنى سول ناتيجەسىنە قاراپ، شاقىردىق. جول ورتادان قوسىلعان ادامدارعا سەنىم ارتىپ، سپورتشىلاردىڭ دا، باپكەرلەردىڭ دە ۋاقىت الماعانى دۇرىس. بۇعان دەيىن قالاي شەشىم قابىلدانعانىن ايتا المايمىز. ويتكەنى قۇرام تولىقتاي جاڭا. ەسكى قۇرامنان ەشكىم قالمادى.
- فاتيما حانىممەن سويلەسۋدىڭ رەتى كەلدى مە؟ قانداي قاتەلىكتەرمەن جۇمىس ىستەۋ كەرەگىن، قىزداردىڭ الەۋەتىن ايتتى ما؟
- «ءار ەلدىڭ سالتى باسقا، يتتەرى قارا قاسقا» دەمەكشى، ولاردىڭ ءوز ءتاسىلى، ءبىزدىڭ ءوز ءتاسىلىمىز بار. ونىڭ ۇستىنە، ءار ءتاسىلدىڭ دە ءوز ارتىقشىلىعى مەن كەمشىلىگى كەزدەسەدى. فاتيما حانىم ءبىزدىڭ جاقتان ايتارلىقتاي ۇلكەن قاتەلىكتەردى كورسەتكەن جوق. ول كىسىنىڭ ءوز جوسپار-باعىتى قالىپتاستى. جالپى، ءبىزدىڭ قىزدار جامان ەمەس. ولاردى باعىتتاپ، ءبىر جولعا قويىپ جىبەرسە، ناتيجە كوپ كۇتتىرمەيدى دەپ ويلايمىن.
- شىنى كەرەك، وتاندىق تاەكۆوندوداعى كەيبىر كيكىلجىڭدەر ەل ىشىنە كەڭىنەن تارالىپ كەتتى. كەي ساتتەردە ماسەلەنىڭ قاتتى ۋشىققانىن دا بايقادىق. كوماندانى قايتا جاساقتاۋ كەزىندە بۇل پروبلەمالار تولىق شەشىلدى مە؟
- «تورتەۋ تۇگەل بولسا، توبەدەگى كەلەدى. التاۋ الا بولسا، اۋىزداعى كەتەدى» دەگەندەي، بىزدەگى ەڭ ۇلكەن ماقسات - كوماندادا بىرلىك ورناتۋ ەدى. تاەكوندوداعى قانشاما تالانتتىڭ باعى جانباي، بايقالماي جاتتى. قازىر ول نارسە ءجۇز پايىزعا بولماسا دا، 99 پايىزعا توقتادى. ەشكىممەن بايلانىسى جوق، ەشكىمگە كەسىرى تيمەگەن ازاماتتاردى جيناقتاۋعا تىرىستىق. وعان قوسا، سپورت سالاسىندا وزىندىك ءبىلىمى-ءىلىمى بار، تاجىريبەلى جانداردى قاتارعا قوستىق. ارينە ءبارىن بىردەي الىپ تاستاۋ مۇمكىن ەمەس. كەيبىرەۋىنە مۇمكىندىك بەرۋىمىز كەرەك. «سۇرىنبەيتىن تۇياق، جاڭىلمايتىن جاق جوق». بارلىق ادام قاتەلەسەدى. ولارمەن سويلەسىپ، ءوزىمىزدىڭ جوسپارىمىزبەن ءبولىسىپ، باعىت-باعدارىمىزدى ايتقان سوڭ باپكەرلەر، قالالىق فەدەراتسيالار، اتا-انالار بولسىن، كوبىنىڭ بەتى بەرى قارادى. قازىر سۇراعى جاۋاپسىز قالعان ادام جوق. فەدەراتسيا تىنىش. ەندى وسى بىرلىك، بەرەكەنى ۇستاپ قالۋ - ماقسات. وسىلاي جالعاسا بەرسە ءبارى جاقسى بولادى دەپ سەنەمىن.
- ەلىمىزدىڭ قاي ايماقتارىندا تاەكۆوندو كەنجەلەپ قالدى دەپ ايتا الاسىز؟
- بۇگىنگى ستاتيستيكا بويىنشا تاەكۆوندومەن اينالىساتىن سپورتشىلاردىڭ سانى - 24 مىڭ. الايدا، وڭىرلەرگە بارعاندا سول كورسەتكىشتىڭ ناقتى ەمەستىگىنە كوز جەتتى. تاراز، تۇركىستان، شىمكەنت، الماتى، قىزىلوردا سەكىلدى قالالار جاقسى ناتيجە بەرىپ جاتىر. اتىراۋ وبلىسى، ماڭعىستاۋ وبلىسى، پاۆلودار وبلىسى دا جامان ەمەس. ايتكەنمەن، تاەكۆوندومەن اينالىساتىندار سانى ونعا دا جەتپەيتىن وڭىرلەر بار. بۇل ايماقتاردى ءبىز جاقسى بىلەمىز. ءبىراق ولار تاەكۆوندوعا قاتىسۋشىلار سانىن 250-300 دەپ كورسەتىپ قويادى. انىعىنا كەلەگەندە ول سان ون ەسە، ءجۇز ەسە از بولىپ جاتادى. قازىرگى ماقسات - سول وڭىرلەرمەن قويان-قولتىق جۇمىس ىستەۋ. تاەكۆوندو قازاقتىڭ مەنتاليتەتىنە ساي كەلەتىندىكتەن، ودان ءارى وركەندەتىپ، ءوربىتۋىمىز كەرەك. مينيسترلىك ءوز تاراپىنان سپورتشىلارعا كومەكتەسىپ، جاعدايىن جاساپ، قارقىندى جۇمىس ىستەپ جاتىر.
ونىڭ ۇستىنە فەدەراتسيا تاراپىنان كەلىسىلگەن ستراتەگيا بار. سونىڭ ىشىندە وڭىردەگى باپكەرلەرمەن جۇمىس ىستەۋ قولعا الىنباق. مىسالى، ەسبول سۇلتان 3 ايدا ءبىر رەت وڭىرلەردەگى باپكەرلەردى جيناپ، باسىن قوسىپ، كىشىگىرىم سەمينار وتكىزىپ، تاجىريبە الماسىپ، بىلىكتىلىگىن ارتتىرماق. تورەشىلەرمەن دە وسىلاي جۇمىس ىستەۋ ويدا بار.
ايتا كەتەلىك، تاەكۆوندودان قازاقستان ۇلتتىق قۇراماسى بۇگىن بولگاريادا وتەتىن حالىقارالىق تۋرنيرگە اتتانادى. بۇل ەسبول سۇلتانوۆتىڭ باس باپكەر رەتىندەگى العاشقى جارىسى.
ەسكە سالساق قۇدىرەت شاميەۆ قازاقستان تاەكۆوندودان الەم چەمپيوناتىن وتكىزۋگە دايىن دەگەن ەدى.
اۆتور كۇنسۇلتان وتارباي
