ەلوردالىق كلينيكا قايتىس بولعان ادامداردى وزىنە تىركەپ، مەملەكەتتەن قارجى الىپ وتىرعان

استانا. KAZINFORM - الەۋمەتتىك مەديتسينالىق ساقتاندىرۋ قورىنىڭ ساراپشىلارى مونيتورينگ بارىسىندا مىندەتتى الەۋمەتتىك مەديتسينالىق ساقتاندىرۋ (م ءا م س) جانە تەگىن مەديتسينالىق كومەكتىڭ كەپىلدەندىرىلگەن كولەمى (ت م ك ك ك) قاراجاتتارىن پايدالانۋدا ءبىرقاتار ءىرى بۇزۋشىلىقتاردى انىقتادى.

مەديتسينالىق ساقتاندىرۋ قورى باسپا ءسوز قىزمەتىنىڭ حابارلاۋىنشا، ەمحانا 16 مىڭ ازاماتتى وزىنە زاڭسىز تىركەپ، سول ءۇشىن 100 ميلليون تەڭگەدەن استام پايدا تاپقان.

الەۋمەتتىك مەديتسينالىق ساقتاندىرۋ قورى مەديتسينالىق كومەكتىڭ ساپاسى مەن كولەمدەرىنە تۇراقتى تۇردە مونيتورينگ جۇرگىزىپ وتىرادى. قور اتالعان جۇمىستى جۇرگىزۋ ناتيجەسىندە استاناداعى جەكەمەنشىك ەمحانانىڭ 16 مىڭ ازاماتتى، ونىڭ 13 مىڭنان استامى بالانى وزىنە زاڭسىز تىركەگەنىن انىقتادى. ازاماتتاردى تىركەۋ الەۋمەتتىك مەديتسينالىق ساقتاندىرۋ قورىنان قارجىلاندىرۋعا قول جەتكىزۋ ءۇشىن وسى اتالعان تۇلعالاردىڭ نەمەسە ولاردىڭ زاڭدى وكىلدەرىنىڭ كەلىسىمىنسىز جاسالعان.

مۇنىڭ سەبەبى، بارلىق ەمحانالارعا تەگىن مەديتسينالىق كومەكتىڭ كەپىلدىك بەرىلگەن كولەمىنىڭ قاراجاتىنان ولارعا بەكىتىلگەن ءاربىر تۇرعىن ءۇشىن ايىنا 1617,64 تەڭگە مولشەرىندە بازالىق تولەم ەسەپتەلەدى. بەكىتىلگەن حالىقتىڭ جاس كوەففيتسيەنتى بويىنشا سوما ءاربىر ەمحانا بويىنشا جەكە رەتتەلەدى. ناتيجەسىندە اتالعان كلينيكا مەملەكەتتەن ءاربىر تىركەلگەن تۇرعىن ءۇشىن ايىنا شامامەن 1800 تەڭگە الىپ وتىرعان.

بۇل ەمحاناعا شەتەلگە تۇراقتى نەمەسە ۋاقىتشا تۇرۋعا كەتكەن ادامدار تىركەلگەن. سونىمەن قاتار قازاقستاننىڭ باسقا وڭىرلەرىندە تۇراتىن ازاماتتار دا بولدى. تۇرعىنداردىڭ ەلوردالىق ەمحاناعا ەشقاشان بارماعانى، الايدا مەديتسينالىق قىزمەت العاندىعى تۋرالى 1414-تەن حابارلاما الىپ نارازى بولعاندىعى جونىندە شاعىمدارى بار.

كەپىلدىك بەرىلگەن تولەمنەن بولەك، ەمحانا 16 مىڭ ازامات ءۇشىن ناقتى كورسەتىلمەگەن قىزمەتتەرگە م ءا م س جۇيەسىندە تولەم ۇسىنعان. سونىمەن بىرگە الەۋمەتتىك مەديتسينالىق ساقتاندىرۋ قورى 5-10 جىل بۇرىن قايتىس بولعاندىعى تىركەلگەن بالالارعا مەديتسينالىق قىزمەت «كورسەتۋ» فاكتىسىن انىقتادى.

ناتيجەسىندە ەلوردالىق ەمحانا جالپى سوماسى 100 ميلليون تەڭگەدەن اساتىن 33 مىڭنان استام قىزمەتتى «قوسىپ جازعان».

اتالعان فاكتى بويىنشا ماتەريالدار قۇقىق قورعاۋ ورگاندارىنا بەرىلدى. قازىرگى ۋاقىتتا استانا قالاسىنىڭ مامانداندىرىلعان ەكونوميكالىق سوتىندا الەۋمەتتىك مەديتسينالىق ساقتاندىرۋ قورى مەن ەلوردالىق ەمحانا اراسىندا بۇزۋشىلىق ءۇشىن ايىپپۇلدى قوسا زاڭسىز الىنعان سومانى قايتارۋ جونىندە سوت تالقىلاۋى ءجۇرىپ جاتىر.