ەلوردادان - ەكىباستۇزعا: كەنشىلەر شاھارىنا قونىس اۋدارعانداردىڭ ءومىرى 5 جىلدا قالاي وزگەردى
ءبىر اپتا ىشىندە كيىم-كەشەكتەرىن جيناستىرىپ، استانادان ەكىباستۇزعا جول تارتۋ قازىمبايەۆتار وتباسى ءۇشىن ءجونى كەلىسكەن شەشىمنىڭ ءبىرى بولدى.
ماريا لەونيدوۆنانىڭ سوزىنشە، ولار ەلوردادا ساياجايدان شاعىن ءۇي جالداپ تۇرعان. وتە كەدەي تۇردى دەۋگە كەلمەس، دەيتۇرعانمەن جالاقى ءبارىبىر جەتپەيتىن. 2019 -جىلى كوشى-قون باعدارلاماسىنا قاتىسۋعا بەل بۋدى. سول ۋاقىتتا كەنشىلەر قالاسىنا 1300 دەن استام ادام اتتانعان. ۇلكەن قالادان جىراق جەردە ءومىر ءسۇرۋدىڭ قانداي ارتىقشىلىقتارى بارى تۋرالى Kazinform ءتىلشىسى انىقتاپ كوردى.
ماريا قازىمبايەۆانىڭ تۋعان جەرى قوستاناي وبلىسى، ال جولداسى استانادان 100 شاقىرىم جەردەگى پەتروۆكا اۋىلىنان. ەكەۋى ەلوردادا تانىستى. سول جەردە شاڭىراق كوتەرىپ، جىلدار وتە ءتورت بالا دۇنيەگە كەلدى. جۇپتاسقاندارىنا بۇگىندە 15 جىل وتە شىعىپتى.
ماريا لەونيدوۆنا ەكىباستۇزعا كوشەر الدىندا استاناداعى اگروقالاشىق اۋدانىندا، ساياجاي ءۇيىن جالداپ تۇرعاندارىن ەسىنە الدى. ءۇيدىڭ جاعدايى جامان بولعان جوق، الايدا تولەمى دە سوعۇرلىم كوپ ەدى، وتباسىنىڭ تابىسى جەتپەدى. 2018 -جىلى بەس بالاسى بارلار عانا كوپبالالى وتباسى دەپ ەسەپتەلەتىن، ال ول تۇستا وتباسىندا ءتورتىنشى بالا جارىق دۇنيە ەسىگىن اشتى. ناتيجەسىندە باسپاناعا كەزەگىنە بۇل سانات بويىنشا تۇرا المادى.
- قونىس اۋدارار الدىندا بالام ءبىر جاسقا ەندى تولعان، سوندىقتان جۇمىس ىستەمەدىم. ۇيدە تاپسىرىسپەن اياق كيىك تىگەتىنمىن. جولداسىم كولىك جۇرگىزۋشى بولىپ ەڭبەك ەتتى. قولىنا الاتىنا 120 مىڭ تەڭگە. ءبىزدىڭ وتباسىندا 6 ادام بولعاندىقتان جولداسىمنىڭ ەڭبەكاقىسى جەتپەيتىن. 2019 -جىلدىڭ 21-مامىرى كۇنى ەكىباستۇزعا قونىس اۋدارۋشىلاردىڭ ەكىنشى لەگى اتتاندى، سول كەزدە مەنىڭ تانىسىما بۋحالتەر كەلىپ، ەكىباستۇزدا كوپبالالى وتباسىلارعا پاتەر بەرىلەتىنىن ايتىپتى. تانىسىم مەنىڭ باسىمدا باسپانا جوعىن بىلەتىن، ەستىگەن جاڭالىعىن بىردەن ماعان جەتكىزدى. مەن قۇجاتتارىمدى اپارىپ بەردىم، كەيىن پاۆلودار وبلىسىنان وكىلدەر كەلگەن كەزدە تاعى باردىم. اڭگىمەلەسۋدەن ءوتۋ كەزىندە ءوزىم اياق كيىم تىگە الاتىنىمدى، ال كۇيەۋىمدە ەلەكتروليفتەر ماماندىعى بويىنشا ديپلوم بارى تۋرالى ايتتى، - دەيدى
ماريانىڭ پىكىرىنشە، قونىس اۋدارۋعا جولداسىنىڭ ديپلومى سەپ بولعان. اتالعان وڭىرگە ءبىلىمى بار ادامدار قاجەت ەدى. ەرلى- زايىپتىلار ءبىر اپتا اقىلداسا كەلە، جاڭا مەكەنگە كوشسە ەشتەڭە جوعالتپايتىندارىنا كوزدەرى جەتتى. كەيىن قالاپ جاتساق ەلورداعا كوشىپ كەلەمىز دەپ شەشتى. ءسويتىپ 2019 -جىلدىڭ 1-ماۋسىمىندا ولار ەكىباستۇزعا تابان تىرەدى.
كەنشىلەر قالاسىندا وتباسىعا اۋماعى 80 شارشى مەتر بولاتىن ءۇش بولمەلى پاتەر بەرىلدى. قازىر بالالارىنىڭ جەكە بولمەسى بار. كوپبالالى انانىڭ ايتۋىنشا، مۇنداعى قولايلى جاعدايدى استانادا تۇرعان جىلدارمەن سالىستىرۋعا كەلمەيدى. پاتەر جالدامالى بولسا دا بۇرىنعى باسپاناعا بەرىپ كەلگەندەي كوپ سوما تالاپ ەتپەيدى. ءارى تاعى ءبىر ارتىقشىلىعى - بالالارىن بىردەن بالاباقشاعا رەسىمدەگەن.
- استانادا تۇرعاندا كىشى ۇلىمىزدى تۋىلا سالا بىردەن بالاباقشاعا كەزەككە قويعانبىز. ول 6 جاسىندا مەكتەپكە باردى، الايدا بالاباقشاعا بارا المادى. ال ەكىباستۇزعا كوشىپ كەلگەندە بىزگە ءبىراز ۋاقىتتان سوڭ بالاباقشاعا تەگىن ورىن ۇسىنىلدى. ەڭ كىشى قىزىمىز مۇندا مەكتەپتە باردى، ۇلكەنىمىز ينستيتۋتقا ءتۇستى. استانادا بالاباقشا ءۇشىن تولەۋگە مۇمكىندىك بولمادى، قالا ۇلكەن، كەزەك تە قالىڭ ەدى. بالاقشادا بالا تەز داميتىنى راس. مەن بالالارىمدى مەكتەپكە مۇلدە دايىنداعان جوقپىن، ولار بارلىعىن بالاباقشادان ۇيرەندى. قازىر ءوزىمنىڭ جەكە كاسىپكەرلىگىم بار، بيگە ارنالعان اياق كيىمدەر تىگەمىن. ەكىباستۇزدىڭ وزىندە مۇنداي اياق كيىمدەرگە تاپسىرىس جوق، ءبىراق قازاقستان بويىنشا الدىراتىندار بار. جۋىقتا ءبىز استانا وپەرا جانە بالەت تەاترى ءۇشىن تاپسىرىستى اياقتادىق، - دەيدى ماريا لەونيدوۆنا.
ەكىباستۇزعا كوشىپ كەلگەن سوڭ ارادا ءۇش كۇن وتكەندە جولداسى جۇمىسقا ورنالاستى. اۋەلى كولىك جۇرگىزۋشى بولسا، ودان سوڭ ەڭبەكاقىسى كوپ دەپ جىلىجايعا كەتتى. ال قازىر «بوگاتىر- كومىردە» ەڭبەك ەتىپ ءجۇر.
- ەكىباستۇزدا كوڭىلگە قونبايتىنى - قالا شاعىن جانە ويىن-ساۋىق ورتالىقتارى ساناۋلى عانا. ءبىر ورىنعا عانا بارا بەرەسىڭ. استانادا ونداي ورتالىقتار كوپ ەكەنى راس. ءبىراق بۇل ايتارلىقتاي ماسەلە ەمەس. بىردە ءبىزدىڭ بالاباقشادا ىستەيتىن الدەبىر ايەل ادام جۇمىستان شىعىپ كەتتى. سەبەبىن سۇراعانىمدا: «استاناعا كوشىپ بارعىمىز كەلەدى»، - دەپ جاۋاپ قايتاردى. مەن: «ول جاقتا نە بىتىرەسىڭ؟ باسىندا باسپاناڭ بولماسا، ەلوردادا ءومىر ءسۇرۋ قيىن»، - دەگەن ەدىم. ارادا ءبىراز ۋاقىت وتكەندە مەن ول كىسىنى ۇشىراستىرىپ قالدىم. قىزىق بولعاندا مەنىڭ باستاپقىدا ايتقان سوزدەرىمدى قايتالادى. ەلورداعا قونىس اۋدارىپ، راسىندا ول جاقتا تۇرۋدىڭ اۋىر ەكەنىنە كوز جەتكىزىپتى. ۇلكەن قالادا يپوتەكا الساڭ، ۇنەمى سونىڭ تولەمى ءۇشىن جۇمىس ىستەۋگە تۋرالى كەلەدى ءارى قازىرگى ۇيلەردىڭ باعاسى دەگەن ۇشىپ تۇر عوي. ءبىز الداعى 10 جىلدا، بالالارىمىز مەكتەپ بىتىرگەنشە ەشقايدا كەتپەيمىز. استانادا مۇنداعىداي ەڭبەكاقى جوق، - دەپ قوستى ماريا قازىمبايەۆا.
ايىمبەتوۆتەر وتباسى دا 2019 -جىلى ەلوردادان كوشىپ، ەكىباستۇز قالاسىندا ءۇش بولمەلى پاتەرگە يە بولدى. كامشات امەرقۇل قىزىنىڭ سوزىنشە، استاناداعى ەمحانادا دارىگەر بولىپ ىستەسە دە جالاقىسى 53 مىڭ تەڭگە عانا بولىپتى.
- وقۋىمدى ءتامامداپ، تۇرمىسقا شىققان سوڭ 2013 -جىلى جولداسىمنىڭ جۇمىسى بويىنشا استاناعا كوشىپ بارعانبىز. ول قۇرىلىسشى بولىپ ەڭبەك ەتتى. 2013-2019 -جىلدار ارالىعىندا جاتاقحانالاردا، بىرنەشە وتباسىمەن جالدامالى پاتەرلەردە تۇردىق. 2019 -جىلى كوشەر الدىندا مەنىڭ ءتورت بالام بار ەدى، ءارى بارلىعى كىشكەنتاي بولاتىن. جاتاقحانادا، نەبارى 9 شارشى مەترلىك بولمەدە تۇردىق، - دەپ سول جىلداردىڭ قيىندىعىن ەسىنە الدى كامشات ايىمبەتوۆا.
استانادا تۇرعاندا جولداسى تۇندە جۇمىس ىستەپ كەلىپ، كۇندىز كامشات ەمحاناعا شىققاندا بالالارىمەن ۇيدە وتىراتىن. بالالارىنىڭ ۇلكەنى 6-دا، ال ەڭ كىشكەنتايلارى 4 جاستا بولاتىن. اقشا جەتپەگەندىكتەن بالالارى بالاباقشاعا بارمايتىن.
- ارىپتەسىم ەكىباستۇزدا جالدامالى پاتەر بەرەدى، جۇمىسقا ورنالاستىرادى ەكەن، سول جاققا كوشىپ بارىڭدار دەپ اقىل قوستى. مەن پاۆلودار وبلىسى تۋرالى بىلمەيتىنمىن، ەكىباستۇزدىڭ قايدا ورنالاسقانىنان دا بەيحابارمىن. ءبىزدىڭ ءوزىمىز وڭتۇستىك وڭىردەن، تۇركىستان وبلىسىنان كوشىپ كەلگەنبىز. اقىرى جولداسىمىز ەكەۋىمىز اقىلداسا كەلە، وسىندا قونىس اۋدارۋدى ۇيعاردىق. 2019 -جىلدىڭ تامىزىندا ەكىباستۇزعا كەلدىك، - دەپ اڭگىمەسىن جالعاستىردى كامشات ايىمبەتوۆا.
العاشقى كەزدەرى جولداسى ەكىباستۇزدا تۇراقتى جۇمىس تاپپادى، بالالاردى قاراپ، كەيدە تاكسيدە ىستەپ ءناپاقا تاپتى. قازىر جەرگىلىكتى م ا ە س-تە ەڭبەك ەتىپ ءجۇر. كامشاتتىڭ ءوزى قالالىق ەمحانادا جۇمىس ىستەيدى. كوپبالالى انانىڭ ويىنشا، قارجى جەتكىلىكسىز بولسا ەلورداعا كوشىپ بارۋدىڭ قاجەتى جوق.
ەكىباستۇز اكىمدىگىنەن حابارلاعانداي، 2019 -جىلدىڭ مامىر- جەلتوقسان ايلارى ارالىعىندا كەنشىلەر قالاسىنا 243 وتباسى كوشىپ كەلگەن، ولاردىڭ جارتىسى كوپبالالى شاڭىراقتار. ناقتىراق ايتساق، 1325 ادام، سونىڭ ىشىندە 873 بالا تىركەلدى.
- بارلىق وتباسىلارعا جالدامالى باسپانا بەرىلدى. وتباسىلاردا ەڭبەككە جارامدى 443 ادام بولسا، سولاردىڭ 280 ى تۇراقتى ەڭبەك ورىندارىنا ورنالاستىرىلدى. اتاپ ايتقاندا، «بوگاتىر-كومىرگە» 2 ادام، «ەكىباستۇز م ا ە س-1» ج ش س-نا 1 ادام، «Greenhouse-Kaztomat» ج ش س-نا 5 ادام، «KBIEnergy» ج ش س- نا 5 ادام، «ەكىباستۇزجىلۋەنەرگو» ج ش س-نا 2 ادام، «گورەلەكتروسەت» ا ق-نا 2 ادام، «ق ت ج» ا ق-نا 2 ادام، «ەنەرگوۋپراۆلەنە» ج ش س-نا 1 ادام، حالىققا قىزمەت كورسەۋ ورتالىعىنا 1 ادام، «ەكىباستۇز ق. اكىمدىگىنىڭ جەر قاتىناستارى ءبولىمى» م م-نە 1 ادام، ءبىلىم سالاسىنا 28 ادام، دەنساۋلىق ساقتاۋ سالاسىنا 21 ادام، كاسىپكەرلىك قىزمەتكە 9 ادام، تاماقتانۋ ۇيىمدارىنا 5 ادام، وزگە دە قىزمەت كورسەتۋ سالالارىنا 195 ادام. 2019 -جىلدىڭ باسىندا 724 بوس جۇمىس ورنى جاريالانسا، سونىڭ 280 ى بىلىكتى مامانداردىڭ كوشىپ كەلۋى ەسەبىنەن جابىلدى، - دەپ حابارلارى ەكىباستۇز قالالىق اكىمدىگىنەن.
شەنەۋنىكتەر قونىس اۋدارۋدان ەشكىم ۇتىلعان جوق دەپ ەسەپتەيدى. ايتپاقشى، بەس جىل وتكەن سوڭ وتباسىلار جالدامالى باسپانانى زاڭداستىرىپ الۋ قۇقىعىنا يە بولادى. 2024 -جىلدىڭ تامىز ايىنان باستاپ ءوتىنىش بەرۋ باستالىپ كەتىپتى. بۇگىندە 10 وتباسى پاتەردى ءوز مەنشىكتەرىنە وتكىزىپ العان.
اۆتور
مۇرات اياعان
