ەلورداداعى قالالىق فورۋمدا اكەنىڭ قوعامداعى ءرولى تالقىلاندى

استانا. KAZINFORM - استانا قالاسىنىڭ ءبىلىم باسقارماسى ادىستەمەلىك ورتالىعىنىڭ ۇيىمداستىرۋىمەن ە. راحماديەۆ اتىنداعى مەملەكەتتىك اكادەميالىق فيلارمونيادا «اكە تاربيەسى - عاسىرعا ازىق» اتتى قالالىق فورۋم ءوتتى. قوعامداعى اكەنىڭ ءرولىن ايقىنداۋدى ماقسات ەتكەن جيىندا ورامدى ويلار ايتىلدى.

فورۋمدى استانا قالالىق ءبىلىم باسقارماسىنىڭ باسشىسى قاسىمحان سەنعازىيەۆ اشىپ، اكە تاربيەسى ارقىلى سالاۋاتتى قوعام قالىپتاستىرۋعا، وتباسى ينستيتۋتىن ساقتاۋعا جول اشىلاتىنىن اتاپ ءوتتى.

اكەنىڭ بالا تاربيەسىندەگى ۇلەسىن دارىپتەۋ ماقساتىندا ۇيىمداستىرىلاتىن ءىس-شاراعا ءماجىلىس دەپۋتاتى بولات كەرىمبەك، ق ر وقۋ-اعارتۋ مينيسترلىگى تاربيە جۇمىسى جانە قوسىمشا ءبىلىم بەرۋ دەپارتامەنتىنىڭ ديرەكتورى مەرۋەرت مەدەتبەكوۆا، ق ر مادەنيەت جانە اقپارات مينيسترلىگىنىڭ جاستار جانە وتباسى ىستەرى كوميتەتىنىڭ ءتوراعاسىنىڭ مىندەتىن اتقارۋشى ءبىرجان ءالىمجانوۆ، «اكەلەر وداعى» رەسپۋبليكالىق قوعامدىق بىرلەستىگىنىڭ ءتوراعاسى ماقسۇتبەك ايتماعانبەت، ۇكىمەتتىك ەمەس قوعامدىق ۇيىمداردىڭ مۇشەلەرى، باق وكىلدەرى قاتىستى. سونداي-اق مەكتەپكە دەيىنگى جانە ورتا ءبىلىم بەرۋ ۇيىمدارىنان 100-گە جۋىق بەلسەندى اكە توبە كورسەتتى.

كەش بارىسىندا رەكوردشى سپورتشى، ارمرەستلينگتەن الەم چەمپيونى، «تولاعاي» الىپتار سايىسى جوباسىنىڭ اۆتورى تيمۋر سپاتايەۆ «بالالاردى تاربيەلەۋدەگى سپورتتىڭ ءرولى» تاقىرىبىندا اڭگىمە ءوربىتتى. «ەرەكشە بالالاردى تاربيەلەۋ: اتا-انالاردىڭ مىندەتتەرىنە جاڭا كوزقاراس» تاقىرىبىندا ءاليحان بوكەيحان اتىنداعى بينوم مەكتەپ ليتسەيىنەن قاتىسقان بەلسەندى اكە سامات كارين وي تولعادى.

فورۋمدا قالالىق «اكەلەر قاۋىمداستىعى» بىرلەستىگىنىڭ جىل بويى اتقارىلعان جۇمىستارى قورىتىندىلانىپ، ۇلتتىق تاربيەدەگى قۇندىلىقتار ايتىلدى. ۇسىنىستار قارالدى. قالالىق اكەلەر قاۋىمداستىعىنىڭ ءتوراعاسى بەكدايىر كۇزەمباي اكە دەگەن ۇلى سوزگە داق تۇسىرمەۋ كەز كەلگەن ەر ازاماتتىڭ مىندەتى ەكەنىن اتاپ ءوتتى.

«ءبىز اكە كورگەن، اكەنىڭ اقىلىنان عيبرات العان جاندارمىز. بالا كۇنىمىزدە قانداي دا ءبىر ماسەلە تۋىنداسا، انالارىمىز «اكەلەرىڭ بىلەدى، اكەلەرىڭ شەشەدى» دەپ وتىراتىن. اكە قادىرىن شەشەلەرىمىز ارقىلى ءبىلىپ وتىراتىنبىز. بىزگە: «اكەلەرىڭدى سىيلاڭدار، ول سەندەر ءۇشىن كۇندىز- ءتۇنى ەڭبەك ەتىپ ءجۇر»، - دەيتىن. قازىر وي تارازىسىنا سالىپ، سارالاي كەلە بۇل ءسوزدىڭ استىندا قانشاما ءمان-ماعىنا، تاربيە بارىن تۇسىندىك. ناعىز اكە نان تاۋىپ قانا قويماي، بالاعا دا كوڭىل ءبولۋى كەرەك. قازىر زامانا تالابى، ۋاقىت ولشەمى، ادامداردىڭ كوزقاراسى وزگەرگەن. ونى ەشكىمدە جوققا شىعارا المايدى.

اكەنىڭ مەيىرىمىنە بولەنبەگەن بالا - ەرتەڭ رۋحتى، ەلىن، جەرىن، ۇلتىن سۇيەتىن ازامات بولا الا ما؟ ونداي ۇرپاق ەرتەڭ باسقا بىرەۋگە جالتاقتاپ تۇرماي ما؟ سول ءۇشىن اكە تۇزدە ءجۇرىپ، ءۇيدىڭ دە جايىن ويلاعانى ابزال. ەشبىر اتا- انا بالاسىن جامان بولسىن دەمەيدى. ءبىراق، اتا-اناسى تەكتى بولا تۇرا، كەي بالالارىمىز ءتۇزۋ جولدان تايىپ جاتادى. سوندا بۇل قالاي دەگەن سۇراق تۋادى. ونىڭ جاۋابى بىلاي ەكەن. بالانىڭ قالىپتاسۋىنا اتا- اناسى، تۋعان-تۋىس، دوستارى، ۇستازدارى جانە ورتاسى اسەر ەتەدى. ول قايسىسىن جانىنا جاقىن تۇتسا، قايسىسىمەن كوبىرەك ۋاقىت وتكىزسە، مىنەز-قۇلقى دا سوعان ۇقساپ كەتەدى ەكەن. ال، ءسىز بالاڭىزعا قانشالىقتى كوڭىل ءبولىپ ءجۇرسىز؟ اكە، انا رەتىندە قاشان اشىق سىرلاسىپ، پىكىرلەستىڭىز؟ دوسى كىم، قورشاعان ورتاسى قانداي؟ مىنە، بۇل - ويلاناتىن ماسەلە»، - دەدى ول.

كەش سوڭىندا ق ر ۇلتتىق ۇلان انسامبلىنىڭ سوليسى، №78 مەكتەپ گيمنازياسىنان كەلگەن بەلسەندى اكە اسحات امىرعاليەۆ «اكە» جانە «اكە تۋرالى وي» اندەرىن شىرقاپ، جينالعاندارعا كوتەرىڭكى كوڭىل-كۇي سىيلادى.

اۆتور

ورالحان قوجانوۆ