ەلوردادا كەشەندى 63 ءىرى جوبانى ىسكە اسىرۋ كوزدەلگەن
استانا. KAZINFORM -ەلوردادا ەكى پەريناتالدىق ورتالىق سالىنادى. بۇل تۋرالى بۇگىن استانا اگلومەراتسياسىن دامىتۋدىڭ 2024-2028 -جىلدارعا ارنالعان كەشەندى جوسپارىنىڭ جوباسى تالقىلانعان ۇكىمەت وتىرىسىندا ەلوردا اكىمى جەڭىس قاسىمبەك ايتتى.
«اقمولا وبلىسىنىڭ اكىمدىگىمەن ءبىز اگلومەراتسياعا كىرەتىن اۋدانداردى سينحروندى دامىتۋ بويىنشا بەلسەندى شارالار قابىلداپ جاتىرمىز. استانا قالاسى وبلىستىڭ اگروونەركاسىپتىك كاسىپورىندارى ءۇشىن جاقىن ماڭداعى ەڭ ءىرى وتكىزۋ نارىعى بولعاندىقتان، كەشەندى جوسپاردا 63 ءىرى جوبانى ىسكە اسىرۋ كوزدەلگەن. ونىڭ ىشىندە جىلىجاي كەشەنى، ەكى كوكونىس قويماسى، وندىرىستىك كەشەن، ءۇش ءىرى قويما جانە لوگيستيكالىق ورتالىق قۇرىلىسى بار. قازىرگى ۋاقىتتا ولاردىڭ 7 ءسى ىسكە قوسۋ بارىسىندا جانە جىلدىڭ سوڭىنا دەيىن پايدالانۋعا بەرەمىز دەپ جوسپارلاپ وتىرمىز»، - دەدى ول.
جەڭىس قاسىمبەكتىڭ ايتۋىنشا، اقمولا وبلىسىنىڭ اكىمدىگىمەن استانا نارىعىنا جۇمىس ىستەيتىن ينۆەستورلار ءۇشىن جەر ۋچاسكەلەرىن باسىمدىقپەن ءبولۋ تۋرالى كەلىسىمگە قول جەتكىزىلدى.
ينۆەستورمەن زاماناۋي قوقىس جاعۋ زاۋىتىن سالۋ بويىنشا كەلىسسوزدەر اياقتالۋدا. بۇل زاۋىت جىلۋ جانە ەلەكتر ەنەرگياسىن قوسىمشا وندىرەتىن بولادى. زاۋىت تاۋلىگىنە 1500-2000 توننا قاتتى تۇرمىستىق قالدىقتاردى قايتا وڭدەۋگە مۇمكىندىك بەرەدى. سونىمەن قاتار اگلومەراتسيا قۇرامىنا كىرەتىن ەلدى مەكەندەردەگى كوممۋنالدىق قالدىقتاردى جيناۋ مەن اكەتۋ ەسكەرىلدى.
«ەلوردا مەكتەپتەرى مەن كوللەدجدەرىندە استانا اگلومەراتسياسىنىڭ جاقىن ماڭداعى ەلدى مەكەندەرىنەن 10 مىڭنان استام بالا وقيدى. وقۋشى ورىندارىنىڭ تاپشىلىعى ماسەلەسىن شەشۋ ءۇشىن وبلىسپەن شەكتەسەتىن تۇرعىن الاپتاردا وسى جىلى 3 مەكتەپتىڭ قۇرىلىسىن اياقتاۋ جوسپارلانعان. ونىڭ ەكەۋى - «جايلى مەكتەپ» جوباسى اياسىندا. ءارقايسىسى 2000 ورىنعا ارنالعان»، - دەدى قالا باسشىسى.
ول ستاتيستيكاعا سايكەس، قالالىق ستاتسيونارلارداعى ورىنداردىڭ 17 پايىزدان استامىن باسقا وڭىرلەردەن كەلگەن ناۋقاستار پايدالاناتىندىعىن ايتتى.
«ءبىز قوسىمشا دەنساۋلىق ساقتاۋ نىساندارىنا قاجەتتىلىك بار ەكەنىن كورىپ وتىرمىز. سوندىقتان ءۇشىنشى كوپسالالى اۋرۋحانا مەن ەكى پەريناتالدىق ورتالىق سالۋ ماسەلەسى وزەكتى بولىپ تۇر. ەكى پەريناتالدىق ورتالىقتىڭ قۇرىلىسىن بيىل باستايمىز. ءۇشىنشى كوپسالالى اۋرۋحانا بويىنشا جوبالاۋ بيىل اياقتالادى. 2025-جىلى قۇرىلىستى باستاۋىمىز قاجەت»،- دەدى ەلوردا اكىمى.
