ەلوردادا «اباي اكادەمياسى» ماماندارى ابايتانۋدىڭ وزەكتى ماسەلەلەرىن تالقىلادى

استانا. KAZINFORM - ل. ن. گۋميليەۆ اتىنداعى ەۋرازيا ۇلتتىق ۋنيۆەرسيتەتى جانىنداعى «اباي اكادەمياسى» عىلىمي-زەرتتەۋ ينستيتۋتى «اباي ورتالىقتارى جانە ابايتانۋدىڭ قازىرگى وزەكتى ماسەلەلەرى» اتتى دوڭگەلەك ۇستەل وتكىزدى.

ۇلى اقىننىڭ ادەبي مۇراسىن ادام مەن قوعام، ءبىلىم مەن عىلىم، ءدىن مەن ءداستۇر، مەملەكەت پەن بيلىك، ءتىل مەن مادەنيەت باعىتتارى اياسىندا جاڭاشا زەردەلەۋ ارقىلى ۇلى اقىندى باسەكەگە قابىلەتتى قوعام قۇرۋ مەن ينتەللەكتۋالدى ۇلت قالىپتاستىرۋدىڭ تەمىرقازىعى رەتىندە ناسيحاتتاۋدى ماقسات ەتكەن جيىندا اباي ورتالىقتارىنىڭ اتقارىلىپ جاتقان جۇمىستارى جايلى اقپاراتتار ۇسىنىلىپ، اباي تانۋعا قاتىستى وزەكتى ماسەلەلەر تالقىلاندى.

«اباي اكادەمياسى» عىلىمي-زەرتتەۋ ينستيتۋتىنىڭ ديرەكتورى جاندوس اۋباكىر ق ر پرەزيدەنتى قاسىم-جومارت توقايەۆ جۇكتەگەن مىندەتتەردىڭ ءساتتى ورىندالىپ، ەلىمىزدەگى ابايتانۋ ورتالىقتارىمەن جانە بەلگىلى ابايتانۋشى عالىمدارمەن بىرلەسىپ كەشەندى تالدامالىق زەرتتەۋلەر جالعاسىپ جاتقانىن اتاپ ءوتتى.

سونىمەن قاتار 2019 -جىلدان باستاپ «اباي اكادەمياسى» ع ز ي قابىرعاسىندا 80 نەن استام عىلىمي-تانىمدىق ەڭبەكتەر جارىق كورگەنىنە توقتالدى.

«2020 -جىلى اباي قۇنانباي ۇلىنىڭ 175 -جىلدىعىنا وراي ل. ن. گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ تىكەلەي قارجىلاندىرۋىمەن «اباي اكادەمياسىندا» ارنايى جوبالار اياسىندا «اباي اكادەمياسى» اتتى سەريامەن 23 اكادەميالىق باسىلىمدار وقىرماندارعا ۇسىنىلدى. 2021-2022 -جىلدارى اباي مۇراسىن كەڭىنەن ناسيحاتتاۋ ماقساتىندا عىلىم جانە جوعارى ءبىلىم مينيسترلىگى عىلىم كوميتەتىنىڭ تاپسىرىسى نەگىزىندە 48 عىلىمي-تانىمدىق كىتاپ ازىرلەندى»، - دەدى جاندوس اۋباكىر.

2023 -جىلى 12 عىلىمي- تانىمدىق ەڭبەك دايىندالىپ، عىلىمي زەرتتەۋ ينستيتۋتىنىڭ زەرتتەۋ جۇمىستارىنىڭ ساپالى ءارى جوعارى دەڭگەيدە ىسكە اسىرىلۋىنا ەلىمىزدىڭ ابايتانۋشى عالىمدارى، جەتەكشى زەرتتەۋشىلەر، عىلىم دوكتورلارى، پروفەسسورلار مەن اكادەميكتەر جانە «اباي ورتالىقتارى» ءوز ۇلەستەرىن قوسقانىن اتاپ وتكەن ءجون. بۇل باعىتتاعى جۇمىستار ءوز جالعاسىن تابا بەرمەك.